Iyol i hiden a mi ijime wa u or palegh ieren i gengese iyol shin kenden a iyol i nan sha la ker. Or u nan hiden a iyol i nan ijime yô, nan nengen ér nan hemba mbagenev ga. Hanma orumace u nan hiden a iyol i nan ijime yô, gba u nana fa ér nan ngu orsholibo, shi nan ngu a mbamyen shi nana kôrcio u eren hanma kwagh cii ga.

Mose yange kehen ityough sha ci u i na un tahav yum ga. Ashighe kpishi or ka nana lu or u hiden a iyol a nan ijime shin nana lu or u kehen ityou kpa, ka shighe u i ne nan tahav la ka i fa ye. Orgen u ngeren akaa kaa ér: “Ior kpishi ka ve wa ishima a ican; kpa aluer wea soo u fan inja i or tsembelee yô, na nan tahav, tsô u fa tu u nan.” Mose yange ver se ikyav i dedoo sha gbaa ne. Yange ver se ikyav nena?

Yehova yange tsua Mose ér a lu orhemen Mbaiserael; sha nahan yô, Yehova na un tahav kpishi. Nahan kpa, mayange tahav mbu Mose lu a mi mbura na un hingir u gengese iyol ga. U tesen ikyav yô, nenge ase er Mose yange er kwagh u tesen iyol i hiden a mi ijime shighe u i pine un mpin u taver kpishi sha kwagh u dyako yô. (Numeri 27:1-11) Mpin ne lu u beelee ga, sha ci u mlumun u a na la, una hingir tindi u Mbaiserael vea kuran sha ikyov ikyov yô.

Mose una nenge sha ikyaa ne nena? Una hen ér, er un lu orhemen Mbaiserael yô, un kuma u tsuan kwagh u a lu u vough sha ikyaa ne yôô? Una suur sha mkav na, shin una tôô ér er un tse sha won kpishi yô, ka un kwagh u ican ga, shin una tôô ér er un kav mnenge u Yehova sha akaa yô, a taver un ga?

Kape or u gengese iyol yange ma nan er je la. Kpa Mose yô er nahan ga. Bibilo kaa a vese ér: “Mose va a kwagh ve la hen TER.” (Numeri 27:5) Nenge ase yô, er Mose hemen Mbaiserael kuma anyom 40 nahan kpa, a suur sha mfe na ga, lu sha Yehova. Kwagh ne tese se wang ér Mose lu or u hiden a iyol na ijime sha mimi.

Mose shi yange hen ér ka un tseegh i gbe u una lu a tahav ga. Zum u Yehova na Mbaiserael mbagenev tahav u ôron kwagh er uprofeti nahan la, kwagh ne doo Mose kpen kpen. (Numeri 11:24-29) Zum u terkem u Mose wa un kwagh ér a tsua ior a pande ityom a wa ve sha ikyev la kpa, Mose hide a iyol ijime, ungwa kwaghwan la. (Ekesodu 18:13-24) Kwagh ugen yô, shighe u zulum u Mose una kpe la, er lu a gbong gbong her la je, a sôn Yehova ér a ver orgen u nana hemen Mbaiserael zum u una kera lu ga la. Yehova tsough Yosua yô, Mose shi sue Yosua a ishima na cii; a taver ior asema ér ve ungwa imo i Yosua u una hemen ve a nyôr a ve ken tar u ityendezwa la. (Numeri 27:15-18; Duteronomi 31:3-6; 34:7) Sha mimi yô, yange lu Mose kwagh u civirigh kpishi u hemen Mbaiserael ken mcivir u Yehova. Kpa hemen na la yange u hemba gban un kwagh a mkpeyol u mbagenev ga.

Mayange se gengese iyol sha ci u ma ian i se lu sha mi shin tahav mbu i ne se, gayô mfe u sha marami u se lu a mi la ga. Umbur wer, aluer se soo ser Yehova a er tom a vese yô, gba u se fa ser iyol i hiden a mi ijime hemba ngin hange hange a mfe u se lu a mi la. (1 Samuel 15:17) Aluer se mba ior mba hiden a ayol a ase ijime sha mimi yô, se nôngo sha afatyô wase se dondo kwaghwan u Bibilo ne, ér: “Suur sha TER a ishima you cii, de yier sha mkav wou ga.”—Anzaakaa 3:5, 6.

Ikyav i Mose la shi tese se ér, gba u se hemba veren ishima sha ian i se lu sha mi, shin sha tahav mbu se lu a mi la ga.

Ikyav i hiden a iyol ijime i Mose a ver se la ngi se a iwasen je he? Ngi se a iwasen je ka u ôron a ôr ga! Ka sea hiden a ayol a ase ijime sha mimi yô, se na i hemba saan mba ve we ndor a vese mbara iyol, shi ve hemba soon kwagh wase kpaa. Kpa u hemban cii yô, ka se doo Yehova Aôndo, u un kpa a hidi a iyol na ijime la ishima. (Pasalmi 18:35) “Aôndo hendan kwagh a mbagengeseyol, kpa ne mba ve hir ayol a ve ijime la mlumun u sha mhôôn.” (1 Peteru 5:5) Nenge ase er se lu a ityôkyaa i dedoo i dondon ikyav i Mose i hiden a iyol ijime la sha wono!