Dooshima wa u soon kwagh u mbagenev tsung. Or u nan lu a dooshima yô, ka nan tese sha ieren i nan, kua sha mkaanem ma nan ér kwagh u mba nan soo kwagh ve la, gba nan ishima, shi nan te iyol sha kwagh ve kpaa ga, ka a gba u nana er kwagh sha ci ve kpa, nan tangen iyol ga.

Mose yange tese ér Aôndo doo un ishima. Sha nyi gbenda? Yange dondon kwaghwan u a lu ken 1 Yohane 5:3 la. Ivur la kaa ér: “Ka dooshima u Aôndo ne, ka u se̱ kuran atindi a Na.” Mose yange er hanma kwagh u Aôndo kaa ér a er cii, hii shighe u i tindi un ityom i taver tsung, ér a za sha ishigh ki Farao la, zan zan shighe u Aôndo kaa ér a nalegh aga sha Zegemnger u Nyian la, Mose er sha imo i Aôndo vough. Yange a kaa a Mose ér a er kwagh u taver shin u taver ga kpa, a er. “[Mose] er vough.”—Ekesodu 40:16.

Mose yange tese ér Mbaiserael doo u ishima. Mbaiserael fa er Yehova lu hemen ve sha ikyev i Mose yô, nahan ve lu zan a mbamzeyol vev atô kposo kposo hen Mose. Bibilo kaa ér: “Ior tile hen Mose pepe je zan zan iyange kar been.” (Ekesodu 18:13-16) Hen ase er yange Mose una kegh ato u ungwan mbamzeyol mba ônov mba Iserael, hii pepe zan zan iyange been ve a lu un iyol yô. Nahan cii kpa, yange saan Mose iyol u wasen ior mba ve doo un ishima kpishi mban.

Mose keghen ato a Mbaiserael, mba ve doo un ishima la shi eren msen sha ci ve kpaa. Yange er msen sha ci u mba ve er kwagh a na dang la je kpaa! U tesen ikyav yô, zum u anngô u Mose u kwase, Miriam ôr kwagh u vihin sha Mose ve, Yehova haa un imande la, Mose er kwagh nahan. Er Mose ma ember sha mtsaha u Aôndo na Miriam la yô, fese je Mose er msen, a zamber a Yehova sha ci u Miriam, a kaa ér: “Aôndo ma U shi wanger un.” (Numeri 12:13) Lu dooshima mgbegha Mose ve er msen sha ci u Miriam nahan ye.

Se fatyô u dondon ikyav i Mose la sha u Aôndo doon se ishima tsung. Aluer Aôndo doo se ishima tsung yô, kwagh la una mgbegha se u kuran atindi a na sha ‘asema a ase je.’ (Mbaromanu 6:17) Ka sea kuran atindi a Aôndo inja er i kighir se a kighir ga yô, se na i saan un iyol. (Anzaakaa 27:11) Se ayol a ase kpa se zua a mtsera. Kera ga je kpa, ka sea civir Aôndo sha ci u a doo se ishima tsung yô, se kuran atindi a na ser gba u se er nahan tsee tsô ga, kpa ka i saan se iyol u eren kwagh u vough.—Pasalmi 100:2.

Gbenda ugen u se fatyô u dondon ikyav i Mose la yô, ka u lun a dooshima u tangen iyol ga la sha mbagenev. Shighe u azende ase shin mba hen tsombor wase ve lam a vese sha ma kwagh u a ze ve iyol yô, mdoo u ve doo se ishima la a mgbegha se u (1) keghen atô a ve zulee, shi (2) zungwen a ve imôngo, shi (3) tesen ve ser kwagh ve gba se ishima.

Shi se fatyô u eren msen sha ci u ior asev er Mose kpa er nahan. Ashighe agen vea ôr se mbamzeyol vev, kpa se lu a tuula iyol ga, nahan ishima ia vihi se kpishi. Alaghga je yô, se kaa ser, “ka mimi, ungwan yô, se ungwa, kpa ka msen tseegh se fatyô u eren sha ci ve ye.” Kpa umbur wer: “Msen u eren tsung u orperapera ngu a agee kpishi je.” (Yakobu 5:16) Mbamsen asev ka ve na Yehova a er kwagh sha ci u or wase la, u alaghga ma a er ga yô. Sha nahan yô, ka nyi je se er sha ci u ior asev, i ia hemba msen u se er sha ci ve laa? *

U nenge er se fatyô u henen akaa kpishi ken ikyav i Mose la kpa? Er Mose lu or di er se nahan kpa, yange ver ikyav i dedoo i hiden a iyol ijime man dooshima kua jighjigh u nan kpaa. Aluer se dondo ikyav i Mose ver la kôôsôô yô, se zua a mbamtsera kpishi shi se fatyô u wasen mbagenev kpaa.—Mbaromanu 15:4.