U fatyô u umbur iyange i í mar wan wou la kpa? Alaghga yange girim we iyol u kôron un je ka u henen a hen ga. Nahan kpa, Carlo vea kwase na yô, iember ve la nungwa ishimanyian sha mi, gadia i kaa a ve ér wan ve la ngu a icôron uange.

U ngu a wan u a gbe iwan yôô? Aluer u ngu a imba wan la yô, alaghga u hen wer u fatyô u nengen sha nan doo doo ga. Aluer kwagh ngu nahan kpa, de yen ishima ga. Mbamaren mbagenev kpa tagher a imba zayol ne, kpa ve hemba un. Nenge ase mbamtaver utar mba adooga u tagher a mi ne, man er kwaghfan u ken Bibilo la una wase u yô.

Mbamaren kpishi ka vea fa ér wan ve gba iwan yô, ve ure tsung. Kwase u ken tar u Mexico, u i yer un ér Juliana yô, kaa ér, “Zum u mbatwerev kaa a mo ér wan wase, ngu a angev mbu ken ityou yô, taver mo u lumun. Yange huan mo iyol.” Alaghga mbagenev vea er kwagh u kwase ugen ken tar u Italia yange er  la. A kaa ér: “Yange m kaa mer i de me gba maren wan la tsô, shin er kwagh ne doo sha ci u kasev mba sha kwav wam ga nahan kpaa. Hegen ne, wan wam ka una tagher a mbamzeyol mba angev mbun mbu ve a mi la yô, kunya u kôrom.”

Aluer u nenge wer kwagh ngu u ú er ga, shin kunya ngu kôron we yô, fa wer ior mbagen kpa ka i lu ve nahan. Aôndo gba angev ga. (Genese 1:27, 28) Shi yange gba mbamaren ér ve lumun a kwagh u sha gbaaôndo ga la fese ga. Inja na yô, er wan wou a dugh a iwan la, alaghga u “ule kpishi,” man shighe a kar je ve iwan la ia hoghol we ye.

Kpa wea nenge wer ka we u ne wan wou a gbe iwan di ye? Aluer ka nahan yô, umbur wer or môm fa er awambe a tsombor, shin ikyasen man akaa agen a benden a wanye la tsembelee ga. Vegher ugen di yô, alaghga u soo u nan nomou shin kwase wou ibo. Aluer ka nahan yô, palegh ieren la. Aluer we vea nomou shin kwase wou ne zua ave, ne mba nengen sha wan wen doo doo yô, a hemba wasen ne.—Orpasenkwagh 4:9, 10.

MHEN: Fa mlu u wan wou la. Bibilo kaa ér: “Ka sha kwaghfan i maa ya ye, shi ka sha mkav kpaa i taver un ye.”—Anzaakaa 24:3.

U fatyô u zuan a kwaghwan hen mbatwerev kua ken ityakerada igen i ia wase u yô. U fatyô u tôôn iniôngon i u lu nôngon wer u kav mlu u wan wou la karen sha or u nan lu nôngon ér nana fa u lamen zwa ugen tsembelee la. Sha hiihii la, a lu ican, kpa u fatyô u henen.

Carlo vea kwase na yange ve ker iwasen hen ortwer ve, kua hen nongo ugen u u lu a mfe sha kwagh u angev mbu wan ve la. Ve kaa ér: “Kwagh ne wase se u fan mbamzeyol mba adooga se tagher a mi la tseegh ga, kpa shi se fa akaa agen a or u nan lu a angev mbun nana fatyô u eren yô. Yange se kav nahan ser, wan wase una fatyô u eren akaa kpishi. Kwagh ne sur se ishima kpen kpen.”

Alaghga u nenge wer, tom u nengen sha wan u̱ a gbe iwan la na yô, ka u vôr gbeda gbeda. Kwase u ken tar u New Zealand, iti na ér Jenney, a kaa ér: “Yange i zua wan wam a angev mbu sha kuhe u ken gwangerjime, anyom kar di kpuaa tseegh tsô maa, mea nôngo mer me er akaa agen me seer sha ityom i hen ya yô, m vôr kpishi, tsô m gba vaan.”

Mtaver ugen yô, adooga u tagher a mtswenem. Orgen mba yer un ér Ben, ngu a wan u nomso u kpen alegh, shi wan ne ngu a angev mbu i yer ér Asperger’s syndrome la. Ben kaa ér: “Ior kpishi vea kav mlu wase jighilii ga.” Alaghga a sar u u lamen a or tsung je, kpa u nengen yô, azende a ou kpishi nga a ônov mba ve lu gbang gbang yô; nahan i taver we u pasen ve er i lu u ken ishima la.

MHEN: Ker iwasen, shi a na u iwasen yô, lumun. Juliana kaa ér: “Ashighe agen kunya ka u kôrom vea nomom u za pinen iwasen.” Nahan kpa, shi a kaa ér: “Se kav ser gba u se ker iwasen hen mbagenev kpaa. Mbagenev ka vea wase se yô, i kera huan se ga.” Zum u or u hen tsombor shin ijende i kôôsôô i kaa ér ia tema vea wan wou hen ma mtem shin ken mkombo u Mbakristu yô, de vende ga. Bibilo ôr injakwagh ér: “Huror yô, lu a dooshima gbem, man shi i mar anmgbian sha ci u ayange a ican.”—Anzaakaa 17:17.

Ver ishima sha mkpeyol wou. Er ka i gba u a haa mkurem ken mato u iyouci u tôôn mbauangev hanma shighe ve, una za hemen u tôôn mbauangev nahan, gba u we kpa u eren akaa a wasen iyol you ker, er u yan kwagh tsembelee shi eren anumbe shi memen nahan, sha er u za hemen u nengen sha wan wou la tsembelee yô. Orgen u wan na a sombo a hee inya yô kaa nahan ér: “Wan wam zenden ga, nahan doo u me yaan kwagh tsembelee. Kera kpa ka mo m lu angahar a na ye!”

U er nan ve u zua a shighe u nengen sha mkpeyol wou we? Mbamaren mbagenev ka ve nengen sha wan ve u nan gbe iwan la ve musan. Nahan shighe u nom a lu nengen sha wan la, kwase a zua a ian i memen shi eren akaa agen, nom kpa nahan. Er ka i taver kpishi u eren kwagh ne nahan kpa, gba u u fa shi u pande shighe u u eren akaa a a lu hange hange ga la, sha er u hemba nengen sha iyol you yô. Kpa kwase ugen ken tar u India kaa ér: “U er nahan shighe a karen yô, a hingir ikye you.”

Lam a ijende you i u ne i jighjigh yô. Azende a ou aa lu a mbayev mba gban iwan ga je kpa, aa fatyô u surun we ishima. U fatyô u eren msen hen Yehova Aôndo kpaa. Msen una wase u jee? Kwase ugen ngu  a ônov uhar mba ve lu a angev mbu ka i mar mbayev mbagenev a mi, i yer mbu ér Cystic Fibrosis yô. A kaa ér: “Ashighe agen ka i lum haghelaa, je er me kpe a kpe nahan. Kpa ka m sôn Yehova mer a nam agee. Maa m nenge mer me fatyô u zan hemen.”—Pasalmi 145:18.

Wanye ka nana lu uange hen tsombor yô, i gba u ua tswer akaayan agen, shi ua pande zende kua shighe u mbamaren lun vea mbayev mbagenev imôngo la. Kwagh ne ka a na yô, i lu mbayev mbagenev mbara er i wa ve ikyo ga nahan. Heela tseegh ga, ashighe agen mbamaren ka ve tume ityough u nengen sha wan ve u gban iwan la je, ve kera ver ishima sha ivese ve ga. Orgen ken tar u Liberia kaa ér: “Ashighe agen kwase wam ka a kaa ér, un ngu hemban nengen sha wan, mo yô kwagh gbam sha kwagh u wan wase ga. Ka una ôr nahan yô, m nenge mer ngu lahan mo, nahan ashighe agen yô, ka una penda je m lôô.”

MHEN: Aluer u soo wer ônov ou mbagenev mbara ve fa er u we ve ikyo yô, eren akaa a a doon ve u eren la. Jenney, u se vande ôron kwagh na la kaa ér, “Ashighe agen ka se er kwagh u doon wan wase u vesen la, shighe ugen je yô, ka se za ya kwagh imôngo hen ijiir i teen kwaghyan i doon un la.”

Lamen a kwase wou shin nomou shi eren nen msen imôngo sha er ne kura ivese yen yô. Orgen ken tar u India u wan na a gbe ikyungu yô kaa ér: “Ashighe agen kwagh ne ngu a zam iyol vea kwase wam, shi ishima i vihi se kpaa. Nahan kpa, ka se ver shighe u lamen shi eren msen imôngo. Hanma sev yô, ka se tôô shighe se time sha ivur Bibilo, cii man ônov asev ve nder ye.” Mbamaren mbagenev ka ve tema ve tseegh, ve lam cii ve yav ye. Aluer u ngu lamen vea kwase wou shin nomou hanma shighe ne uhar tseegh, shi ne mba eren msen yô, kwagh ne una wase ivese yen shighe u mbamzeyol ve te sha a ven kpoghuloo la je kpaa. (Anzaakaa 15:22) Orgen vea kwase na kaa ér: “Ashighe a hemban doon cii ken uma wase yô, ka shighe u se tagher a uzayol mba hemban taver la.”

Bibilo tôndo zwa ér ica a gba ga tsô Aôndo una kar a angev man iwan cii kera, mbayev kua mbaganden cii vea kera gba angev shin iwan ga. (Mpase 21:3, 4) Hen shighe la, “Ma or u nan tem ker kpaa nana kera kaa er: Kwagh nyoon mo, ga.” *—Yesaia 33:24.

Hegen je kpa, u fatyô u nengen sha wan wou u a gbe iwan la dedoo. Carlo vea kwase na kaa ér, “Zum u i lu inja er kwagh môm ngu zan ka doon ga la kpa, mayange de yen ishima ga. Hemba veren ishima sha kwagh u wan wou una fatyô u eren la, gadia una fatyô u eren akaa imôngo je.”