ER SE vande henen ken ngeren u ken ijime la nahan, uma u Yesu yange lu a inja. Nahan aluer se soo ser uma wase a lu a inja yô, a gba u se dondo Yesu shi se ungwan imo na.

Jighilii yô, Yehova kaa ér se dondo Yesu shi se ungwan imo na, er ivur Bibilo i sha heen ne i er nahan. U zenden er Yesu zenden la wa u dondon ikyav na kua atesen a na sha hanma kwagh u se eren ken uma wase cii. Aluer se er nahan yô, Aôndo una lumun se shi uma wase una lu a inja kpaa.

Atesen a Yesu yange wa akaawan a aa wase se u dondon ikyav na la kpa ker. Se fatyô u zuan a akaawan ne agen ken Ityesen na i sha Uwo i i ze gwa yum la. De se time sha akaawan ne kpuaa, kua er se fatyô u dondon a ken uma wase la kpaa.

ER SE DONDO KWAGHWAN NE VE UNA WASE SE U LUN A UMA U INJAA YÔ:

Yesu yange tese ér sha gbaaôndo je, uumace mba a isharen i fan Aôndo. Sar se kpishi u zuan a mbamlumun sha mbampin mban: Er nan ve se lu uma sha tara? Er nan ior ve lu yan ican kpishi sha tara? Aôndo we ikyo sha kwagh wase mimi kpa? Uma ngu shin kuu? Saa se zua a mlumun sha mbampin mban ve uma wase una lu a inja ye. Yesu yange fa ér ka Mkaanem ma Aôndo tseegh maa fatyô u nan se mlumun u vough sha mbampin mban ye. Yange er msen hen Ter na kaa ér: “Ka kwaghôron Wou je a lu mimi ye.” (Yohane 17:17) Mkaanem ma Aôndo ma a fatyô u wasen se u fan un shi zuan a msaanyol mimii?

IKYAV I KWAGH U YANGE ER KPÔÔ KPÔÔ YÔ:

Orgen mba yer un ér Esa, yange waan atsam vea nongo ugen u kuhwan kwagh, shi lu yemen leva leva u za duenti ken atsam a wan. Nahan kpa, saan Esa iyol ga. A kaa ér: “Er yange doom u lun vea nongo u kuhwan kwagh ne nahan kpa, hemba saren mo u zuan a uma u injaa.” Kpa shighe kar yô, Esa zua a Orshiada u Yehova ugen. Esa kaa ér: “Yange m pine un mbampin kpishi. Mbamlumun mba nam ken Bibilo vough vough la doom, nahan m lumun mer a hen Bibilo a mo.” Kwagh u Esa hen la kôr un ken ishima, nahan a tsegha iyol na sha ci u Yehova. A kaa ér: “Ngise la, m shi nyôron ken uzayol shi eren ayôôso; kpa hegen yô, uma wam hemba ngun a inja.”

ER SE DONDO KWAGHWAN NE VE UNA WASE SE U LUN A UMA U INJAA YÔ:

U zungwen mhôônom la wa u eren a mbagenev kundu kundu la ker. Yesu yange a zungwe mbaatsanev mhôônom. Mhôônom kôron Yesu a ior tsung, nahan a er kwagh u wasen mba ve lu yan ican la. (Mateu 14:14; 20:30-34) Aluer se mba dondon ikyav i Yesu i zungwen mhôônom la yô, uma wase una hemba lun a inja, gadia ka i saan mba ve zungu mhôônom la iyol. (Aerenakaa 20:35) Se zungwen mbagenev mhôônom sha u lamen a ve kundu kundu shi eren a ve doo doo yô, se wase mba i gbe u a na ve iwasen la. Ka sea zungwe mbagenev mhôônom nahan, uma wase a hemba lun a injaa?

IKYAV I KWAGH U YANGE ER KPÔÔ KPÔÔ YÔ:

Maria vea nom na, Carlos, ver ikyav i zungwen mbagenev mhôônom. Ter u Maria kera ngu a kwase ga, shi ken anyom a karen ne, kera fe lun dedoo ga, sha ci u ngu a angev mbu shogar. Nahan Maria vea nom na yem a na hen ya ve, mba za nengen sha a na. Er ve nengen sha a na yô, mba kera fetyô u yaven tugh ga, shi ashighe agen je yô, ka i gba u  vea yem iyouci a na fefa. Ve kaa ér ashighe agen ka ve vôr kpishi. Nahan kpa, saan ve iyol ér yange Yesu kaa nahan. Doo ve kpishi er ve lu nengen sha ter u Maria tsembelee yô.

ER SE DONDO KWAGHWAN NE VE UNA WASE SE U LUN A UMA U INJAA YÔ:

Inja i ishember i ken zwa Grika, i i gem heen ér “mba ve ker num” la ka “mba van a bem.” Aluer se mba “mba van a bem” yô, a wase se u lun a uma u injaa nena? Kwagh ne ngu a wase se u lun a azende kpishi. Doo u se dondo kwaghwan u Bibilo ne, ér: “Aluer a fatyô yô, lu nen bem a ior cii ape kwagh wen a lu sha mi la.” (Mbaromanu 12:18) Ishember i “ior cii” la wa mba hen tsombor wase kua ior mbagenev mba ve lu Mbashiada mba Yehova ga la cii ker. Se lu bem bem a “ior cii” nahan uma wase una hemba lun a injaa?

IKYAV I KWAGH U YANGE ER KPÔÔ KPÔÔ YÔ:

Nenge ase kwagh u yange ér kwase ugen, u i yer un ér Nair ne. Yange wa ishima a mbamtaver anyom imôngo, hemban je yô mba hen tsombor na, kpa za hemen u lun bem bem her. Nom na yange undu un kuma anyom 15, nahan lu yesen mbayev un tswen. Wan na u nomso ugen di maan mcimbim ma bov kpoghuloo, nahan ashighe kpishi a hingir geng, maa a gba anger un kua ônov nav mba kasev. Nair nenge ér kwagh u un hen ken Bibilo la wase un u wan ishima, lun bem bem, kua ken ashighe a taver la je kpaa. Yange a nôngo a palegh anyiman shin ayôôso a eren sha akaa. Yange eren kwagh a ior kundu kundu man sha mhôôn shi mlu ve a kôr un ken ishima kpaa. (Mbaefese 4:31, 32) Ngu a vangertiôr ér, u nôngon ér una lu a ior bem bem la wase un u lun kundu kundu a mba hen tsombor na kua mbagenev kpaa.

Aluer se dondo kwaghwan u Yesu u injaa ne yô, a saan se iyol shi se lu a uma u injaa kpaa. Kpa, gba u se fa kwagh u a lu keghen se ken hemen la ve, uma wase una hemba lun se a inja ye. Sha ci u er se fe ser shighe a karen yô, se bee iyol, se gba angev maa se kpe yô, uma wase shi una lu se a inja nena? Kpa ken tar u ngun yô, kape uma a lu je la.

Nahan kpa, loho u dedoo ban ga! Yehova wa ishima u va nan mba ve kange ishima u “Zenden er [Yesu] zenden nahan” la cii averen ngôgh. Yehova tôndo zwa ér ica a gba ga tsô una va a tar u he u perapera, ape uumace mba jighjigh vea lu uma gbem sha won, a angev shio, er yange wa ishima ér i lu sha hiihii la nahan. Bibilo kaa ér: “Nenge, tenti u Aôndo ngu hen ior, Una tema a ve, vea lu nongoior Na, Aôndo iyol Na Una lu a ve. Una ese ve mliam sha ashe kera cii, ku ua kera lu ga, shin ijungwen shin mliam shin ican kpaa ia kera lu je ga, gadia akaa a tse la kar kera.”—Mpase 21:3, 4.

Maria, kwase u lun anyom 84, u se er kwagh na ken ngeren u hiihii la, ngu veren ashe a mkur u kwaghôron ne. We ye? U soo u seer fan kwagh u uma u a lu “uma jim,” u se va zua a mi ken Tartor u Aôndo la kpa? (1 Timoteu 6:19) Wea soo yô, lam a Mbashiada mba Yehova mba hen haregh wou la, shin nger mba ve gberen magazin ne la. *