Er ne vande fan nahan, aie ka kwagh u ú ôr a or, kpa u fe dedoo wer ka u mimi ga yô. I lu nahan u er aie vee?— * Mbaganden mbagen mba Aôndo a doo ve ishima je kpa yange ve er aie. Alaghga u fa orgen u yange er aie, u Bibilo i er kwagh na yô. Or ne lu Peteru, u lu môm ken mbaapostoli mba Yesu mba 12 la. De se nenge er yange hii ve Peteru er aie yô.

Yange i kôr Yesu i yem a na hen ya u pristi u tamen. Shighe ne nahan, ateghôtôutu kpa kar yem naleghaa. Peteru nyôr ken tembe ya u pristi ne, kpa or fa ér a nyôr ker ga. Iwanger i usu u i keer la ngi ker Peteru yô, wankwase u eren tom hen ya u pristi, u na Peteru ian nyôr ken tembe ya la, kav un hen shighe la. Wankwase ne maa kaa ér: “We kpaa, u lu a Yesu . . . imôngo.” Kpa er Peteru lu cian yô, a tuna.

Bibilo kaa ér ica i gbe ga yô, “wankwase ugen nenge a na.” Nahan a kaa ér: “Or ne kpaa lu a Yesu.” Peteru shi tuna. Ka tem deghôô yô, ior mbagenev shi va kaa a Peteru ér: “Mimi je, we kpaa, u ngu u ken ve.”

Kwagh ne cier Peteru iyol. Nahan Peteru shi er aie kwa u sha utar ne kpaa, ér: “M fa Or shon ga.” Ikyegh maa tôngo. Yesu gema kenger Peteru, maa Peteru umbur kwagh u Yesu vande ôron un ér: “Ikyegh ia lu a tôngo ga je tsô ú nyiman kwa tar wer, u fam ga” la. Peteru maa gever mliam gba vaan. Kwagh ne vihi Peteru tsung!

Imba kwagh la ia fatyô u eren wee?— Alaghga u ngu ken makeranta, nahan u ungwa mbayevmakeranta mbagenev mba ôron kwagh u Mbashiada mba Yehova. Ugen kaa ér “Mba civir tuta ga,” ugen di kaa ér “Ka mba man awambe,” shi ugen kaa ér “Ve na Yesu jighjigh kpaa ga, kirimishi kpa mba ye ga.” Maa môm ken a ve gema pine u ér, “We u ngu Orshiada u Yehova gaa? Nahan u kaa wer nyi?—

 Gba u ú vande wan iyol u nan mlumun u injaa sha imba mpin la cii ve imbakwagh la ia er u ye. Peteru yange vande wan iyol ga. Zum u i kighir un yô, a er aie! Nahan kpa, er zungwe sha kwagh u er la kpishi yô, Aôndo de un kwaghbo na.

Ohenen u Yesu ugen u sha ayange a tsuaa, u nan er aie yô, lu Anania. Kpa Anania man kwase na Safira yô, Aôndo de ve kwaghbo ve la ga. Anania yange zua zwa vea kwase na ér vea er aie. De se nenge er i hii ve Aôndo de Anania man Safira kwaghbo ve la ga yô.

Yesu yange undu mbaapostoli hide yem sha Ter na, ayange nga kar pue yô, i er iorov 3,000 batisema ken Yerusalem. Ior kpishi yange ve mough sha ajiir a icaa, ve va sha u ember Iniongo i Pentekosti. Kpa mba va hingir mbahenen mba Yesu yô, ve soo u timbir ken Yerusalem sha ér vea seer henen kwagh u jighjigh u nan ve u he ne yô. Nahan mbahenen mba Yesu mbagenev tôô inyaregh vev lu nengen sha mbamgbe mba ior mban.

Anania vea kwase na Safira kpa tee akaa a ve agen, sha ér vea zua a inyaregh ki wasen mba i sember eren ve batisema mbara yô. Anania ve a inyaregh kira sha ishigh ki mbaapostoli yô, a kaa ér ka inyaregh ki ve tee akaa a ve a mi jimin cii je la. Kpa lu nahan ga! Yange yer inyaregh ki genegh! Aôndo pase Peteru kwagh ne, nahan Peteru kaa a Anania ér: “Ka ior u er ve aie ga, kpa ka Aôndo je.” Anania gbidye inya, maa kpe! Ahwa nga kar er atar nahan yô, kwase na va nyôr. Kpa er fa kwagh u er nom na ga yô, un kpa er aie, un kpa maa kpe je.

Kwagh ne tese se kwagh u vesen kpishi: U ôron kwagh u mimi la ngu hange hange! Se cii se hen kwagh sha kwagh ne! Kpa, ashighe agen se er kwagh sha lan, hemban je yô, shighe u se lu iyev la. Er Yehova a soo u shi una de u kwaghbo er yange de Peteru nahan la, doo u ga he?— Kpa umbur wer, gba u se ôron kwagh u mimi. Shi zum u se er aie yô, gba u se zamber a Aôndo tsung ser, a de se kwaghbo wase. A lu kwagh u Peteru er je la, nahan i de un kwaghbo na. Aluer se nongo kpoghuloo ser se kera er aie ga yô, se kpa Aôndo una de se kwaghbo wase!