TÔÔ ase wer u ngu nengen a Noa er a hidi a shar sha kpande a lu memen, kenger haav mbu zege tso u a lu gban la yô. A mough a naregh shi a hide a tema inya. Mningem ma ve lu shighen sha tso la ger ihyuma hen ijiir la cii, shi ngu ungwan er ikyav vev mbi tomough mbi lu uvan yô. Noa ngu nengen a ônov nav ape a tem la, er ve lu eren tom kpoghuloo a uzegembaikyonov yô. Kwase u Noa kua ônov nav a kasev vev cii er tom sha tso ne hegen shighe lihe. Ve er tom ne gba atô, nahan kpa tom shi her vese!

Ior mba hen haregh la nenge ér tsombor ne cii nyôr ihyundugh. Er Noa a tsombor na lu gban tso la, ior mbara lu sen ve a se ibumegh, er a lu kaan ér mngerem ma deemee ma van sha tar cii yô. Ve nenge ér mngerem ma deemee ma Noa lu tan ve icin sha kwagh u ma la, ma a tsa kpa ma a va sha tar ga! Yange taver ve kpishi er hii ve Noa lu eren imba ibumekwagh la, kua tsombor na cii yô. Kpa, Yehova, Aôndo u Noa civir un la yô, nenge ér Noa ngu bumen a bume ga.

Bibilo kaa ér: “Noa zenden vea Aôndo imôngo je.” (Genese 6:9) Inja i mkaanem man ér nyi? U ngu wer Aôndo yange va zenden shin tar vea Noa, shin Noa yem sha, za zenden vea Aôndo ga. Kpa, er Aôndo doo Noa ishima kpishi shi ungwan imo na yô, lu inja er un vea Yehova mba zenden imôngo er azende nahan. Anyom nga kar udubu imôngo yô, Bibilo va ôr kwagh u Noa ér: ‘Ka sha jighjigh u nan na, man a na tar ibo ye.’ (Mbaheberu 11:7) Yange er kwagh ne nena? Se hen nyi sha jighjigh u nan u Noa laa?

Noa vese ken tar u ú lu vihin seer fele fele yô. Tar vande vihin sha ayange a Enoki, tertamen na, u lu orperapera ugen u zende vea Aôndo la. Enoki tsengakaan ér iyange ngi van i a tim aferaior sha tar cii kera yô. Kpa ifer hemba dumbur sha ayange a Noa la. Sha ishigh ki Yehova yô, tar vihi, sha ci u ú mgbough a ipila. (Genese 5:22; 6:11; Yuda 14, 15) Lu nyi i na ve tar vihi yum nahana?

Kwagh u vihin tsung yange er hen atô u mbatyomov. Ortyom ugen hemba Yehova atô, hingir Satan Diabolo; a wa Aôndo mbaaie iyol ngôgh shi mee Adam man Ifa ve er isholibo. Sha ayange a Noa la, mbatyomov mbagenev kpa nyôr ken ihyembeato ne. Mbatyomov mban undu ajiir a ve sha, va shin tar, va gema ayol a ve hingir uumace shi vôso kasev mba doonashe. Mbatyomov mba moron iyol, wan ayol a ve ikyô tseegh, mba ve hemba atô mban vihi uumace vindi vindi.—Genese 3:1-5; 6:1, 2; Yuda 6, 7.

Mbatyomov mba ve gema ayol a ve, ve hingir uumace, ve vôso kasev ne mar ônov mba gban akôr shi lun a agee kpishi a kasev mbara. Bibilo yila ve ér Akôraior, inja na yô, ka “Mbaageev” mba ve zôhôn ior yô. Akôraior a wan tswam kpishi ne na yô, tar hemba vihin gban kera cii. Sha ityôkyaa ne yô, Aôndo nenge “isholibo i or kehe sha won, man hanma mhen u ishima i nan kpaa lu u bo tseegh gbem.” Nahan Yehova kaa ér, una tim aferaior la cii ken atô u anyom 120.—Genese 6:3-5.

Nenge imba er yange a lu ican u yesen ônov ken imba tar la sha won yô. Nahan kpa, Noa er kwagh ne. Yange vôso kwase u injaa. Noa yange nyer  anyom 500 kera cii yô, kwase na mar un ônov mbanomso utar, lu Shem man Ham man Yafeti. * Yange gba u Noa vea kwase na vea kura mbayev mban sha ifer i i kase ve la. Kwagh u “ior mbaageev” kua u “ior mbaduenati” yange a doo mbayev mbakiriki kpen kpen, man ior mban lu Akôraior la. Noa vea kwase na yange vea kôrcio u yangen ônov vev u ungwan hanma ibaver i sha kwagh u akôraior ne ga, kpa lu u vea fatyô u tesen ve mimi u sha kwagh u Yehova Aôndo, u a ker hanma iferkwagh cii ihyom la. Yange gba u vea wase ônov vev vea fa er ihyembeato man ipila i ior lu eren la i vihi Yehova ken ishima tsung yô.—Genese 6:6.

Nyian kpa, mbamaren kpishi mba tagher a mtaver u yesen ônov u Noa vea kwase na tagher a mi la. Kape tar wase ne kpa u vihi sha ihyembeato man ipila je la. Akaa a nan mbayev msaanyol a i eren nyian la kpa, nga a iv a ipila man ihyembeato. Mbamaren mba lun a mkav ka ve nôngo sha afatyô ve cii ér vea hemba ambaakaa ne, sha u tesen mbayev vev kwagh u Yehova, Aôndo u bem, u iyange igen una kar a hanma ipila cii sha tar kera la. (Pasalmi 11:5; 37:10, 11) Ken tar u bo ne je kpa, mbamaren vea fatyô u tesen ônov vev u eren kwagh u vough! Noa vea kwase na kpa yange ve kôrcio. Ônov vev yange ve vese, ve lu ior mba injaav, shi ve vôso kasev mba gba ve ishima u civir Aôndo u mimi, Yehova, sha mimi yô.

Iyange igen yô, uma u Noa gema gbem sha won. Yehova ôr kwagh a or u civir un sha mimi ne, pase un er Un we ishima u va timin tar yô. Aôndo maa kaa a Noa ér: “Er tso sha kon u gofer.”—Genese 6:14.

Tso u Aôndo kaa a Noa ér a gba la, lu er utso mba se fe ne ga. Tso la yange lu a ishigh shin ityôtsoo shin ijimetso shin naha tsoogh kpaa ga. Tso ne kehe, er zegeakwati nahan. Yehova yange tese Noa er una gba tso la yô, a pase un iniembe man ityaven kua er una shighe un mningem kimi man ken won la cii vindi vindi. Shi yange pase Noa ityôkyaa kpaa, a kaa ér: “Me va a mngerem sha tar deemee, . . . hanma kwagh u sha tar cii una kpe.” Nahan kpa, Yehova kaa a Noa ér: “Ú nyôr ken tso la, we a ônov ou, man kwase wou man kasev mba ônov ou a we imôngo.” Shi gba u Noa una tsua hanma kwagh u uma cii una nyôr a mi ken tso la. Yange gba u á lu akaauma a ken tso la tseegh aa war Mngerem ma Deemee mara ye.—Genese 6:17-20.

Tom u gba u Noa una er ne lu u kiriki ga. Yange gba u tso la una lu zegenan, iniembe ia lu aseva 300, igbanger na ia lu aseva 50, ityaven na di ia lu aseva 30. Utso mba i eren sha ikyôn nyian ne je kpa yina sha tso la ica je. Nahan Noa yange kaa ér tom ne ka u ican yum, shin kera er akaa agen er i tese un nahan ga, sha er una er u zange yôô? Bibilo kaa ér: “Noa er nahan; kwagh u Aôndo kaa un la cii, a er sha mi je.”—Genese 6:22.

Tom ne yange u tôô anyom kpishi, alaghga je yô, u kuma anyom 40 shin 50 nahan. Yange gba u a gber ikyon, a tôndo i, shi a menger atôôn a ikyon la, a pav ikyon shon shi a gba i tsembelee, maa a zua i imôngo. Lu u tso ne una lu a ukpo ker utar, shi una  lu a ayou, shi una lu a hunda hen imbusu. Ikyav tese ér tso ne lu a uwindou sha kpo u sha la, shi i san un sha gbenda u mngerem ma a haa sha mi, kpa ma a kuwa a haa shi inya yô.—Genese 6:14-16.

Er anyom lu karen, shi tom u gban tsoo kpa lu yemen hemen hemen la, yange a saan Noa iyol u nengen er tsombor na cii lu eren tom ne a na imôngo la kpen kpen. Kpa tom u genegh gema lu u alaghga yange ua hemba taver a tom u gban tso la yô. Bibilo kaa ér Noa lu or u “yôôn kwagh u perapera.” (2 Peteru 2:5) Nahan Noa lu tan aferaior a sha ayange a na la icin kpoghuloo sha kwagh u mtim u lu van la. Ior mbara ungwa icintan la, nahan ve er nena? Yesu va ôr kwagh u yange za hemen sha shighe shon la ér, “ve fa ga.” A kaa ér ve tume ityough eren akaa a uma ne; ve lu yan akaa, man akaa, eren kasev shi nan kasev ken noov, ve wa ikyo sha icin i Noa lu tan ve la ga. (Mateu 24:37-39) Mbagenev yange vea lu sen un kua tsombor na je ka u tunan ga, shi alaghga mbagenev yange vea anger un shin vea hendan a na kpoghuloo je kpaa.

Nahan kpa, Noa a tsombor na gba uwer ga cii. Er ve lu ken tar u kwagh hemba gban ior u keren akaa a uma nahan kpa, Noa vea tsombor na za hemen u gban tso, shin er ior nenge ér tom la ka ibumekwagh shi ka kwagh u ikyoogh ga nahan kpaa. Nyian kpa, icombor i Mbakristu ia fatyô u henen kwagh ken jighjigh u nan u Noa man tsombor na la kpishi je. Se kpa se mba ken shighe u Bibilo i yer ér ka “ayange a masejime” a tar ne la. (2 Timoteu 3:1) Yesu yange kaa ér shighe wase ne una lu er ayange a Noa gba tso la nahan. Aluer kwagh gba ior sha loho u Tartor u Aôndo, u se pasen ne ga, shin mba sen se ibumegh, shin tôvon se a ican je kpa, doo u Mbakristu mba mimi vea umbur kwagh u Noa la. Ka ve ve hii tagher a mbamtaver mban ga.

Anyom nga kar kpishi yô, mase shin kpuaa u been tom sha tso la. Shighe u Noa zurum anyom 600 la, ior nav mbagenev saa ku. * Ter na Lameki kpe. Shi anyom nga kar ataan yô, Metusela, tertamen u Noa, wan u Lameki la kpa kpe. Metusela kpe shighe u lu anyom 969 la, shi hemba tsan sha won a ior mba i er kwagh ve ken Bibilo cii. (Genese 5:27) Metusela man Lameki cii lu ior mba ken kov u Adam, or u hiihii la.

Ken inyom shon la i môm, Yehova Aôndo kaa a tertamen Noa ér: “We a ya wou cii, nyôr nen ken tso.” Aôndo shi kaa a Noa ér a nyôr a hanma inja i kwagh u uma cii ken tso; inyam i wang, i í doo u nan nagh a mi yô, itiankarihiar itiankarihiar, igen yô, i lu ihiar ihiar.—Genese 7:1-3.

Kwagh ne yange a lu kwagh u or a hungur a mi mayange ga. Inyam uderi imôngo, i lun atô kposo kposo, i zenden man i purugh man i kpelan a kpela inya, kua inyam i tsuen a tsue man i zenden kure kure, i kehen man i kehen ga, i vihin tu man i vihin tu ga cii nyôr ken tsô la. Ityôkyaa ngi i se hen ser Noa yange una kohol inyam toho la cii ken ityôgh shin una lu kumban í, nôngon ér i̱ kar i̱ za nyô ken tsô la ga. Bibilo kaa ér, ‘ve va hen Noa ken tso.’—Genese 7:9.

Alaghga mbatanakperan sha kwagh vea pine ér: ‘Yange er nan ve imbakwagh la i ere? Man lu nyi i na ve inyam toho la cii lu ijiir i môm bem beme?’ Nenge ase kwagh ne: U hen wer a hemba Un u a gbe sha man tar cii la u kôôm inyam i a gbe i la, dughun mciem ken i kera shi nan i lun bem bem, shighe u a soo u eren nahala yôô? Umbur wer, ka Yehova Aôndo yange pav Zegemnger u Nyian shi er iyange tile jigh jigh ye. Nahan una fatyô u eren hanma kwagh  u Bibilo i pase sha kwagh u Noa la gaa? Una fatyô yum, shi yange er kpaa!

Aôndo yange una soo yô, ma yima inyam i a gba la sha ma gbenda ugen. Nahan kpa, yange tsua gbenda ne sha inja, sha er ua umbur se kwagh u jighjigh u Aôndo na uumace, nahan wa ve akaauma a sha tar cii sha ikyev ér ve nengen sha mi la yô. (Genese 1:28) Mbamaren kpishi nyian ka ve tôô kwagh u Noa la ve tese ônov vev er Yehova a we uumace man annyamev mba a gbe mbara cii ikyo yô.

Yehova kaa a Noa ér mase shin ayange ataankarahar Mngerem ma Deemee ma a va. Tsombor ne yange ua hingir sha hurugh hurugh hen shighe ne, sha u sôron akaa. Gbidye ase kwar nenge er tom u nyôron a annyamev kua kwaghyan ve ken tso vough vough la man tom u nyôron a ikyav mbi tsombor ken tso la yange ua lu kpegh ga yô. Kwase u Noa vea kasev mba ônov nav cii alaghga yange vea hemba veren ishima u sôron ijiir i tsombor la ua lu her shin tso la, sha er ua lu kundu kundu yô.

Kpa ior mba hen haregh ve la di ye? Er ve nenge ikyav tese wang ér Yehova ngu veren Noa doo doo kua hanma kwagh u lu eren nahan kpa, “ve fa ga,” (shin kwagh gba ve sha mi ga). Er ve nenge annyamev tume nongo nyôron ken tso lugh lugh nahan kpa, kwagh gba ve sha mi ga. Kpa ieren ve ne i de kpiligh se iyol ga. Nyian kpa, kwagh gba ior sha akaa a a lu tesen wang ér se mba ken ayange a masejime a tar ne la ga, vough er shighe la kpa lu nahan. Shi er apostoli Peteru yange tsengaôron nahan, mbanahantar due a tarnahan ve, mba kaan mba ve lu ungwa icintan i Aôndo la imbwase. (2 Peteru 3:3-6) Kape Noa man tsombor na kpa, ior naha ve tar je la.

Lu hanma shighe nahan tarnahan ve la kure? Bibilo kaa ér, Noa yange nyer a tsombor na kua annyamev cii ken tso yô, “[Yehova] maa wuhe un kimi.” Aluer mbanahantar mbara yange vea lu her ikyua yô, kwagh u Aôndo er ne cir ve zwa. Kpa aluer yange una cir ve zwa ga yô, ura ua cir ve zwa kpee, sha ci u yange u nôôr vough er Noa tsengaôron nahan! Ura yange u nôô zan zan mngerem va sha tar deemee, hemba tar elegh elegh, er Yehova kaa nahan.—Genese 7:16-21.

Ku u aferaior la yange u doo Yehovaa? Ei! (Esekiel 33:11) Kpa yange na ve ian gôgônan er ve gema anza ve a bo la, ve gema eren kwagh u dedoo. Yange ma ve fatyô u eren nahan je kpa? Ikyav i Noa la tese ér yange ma ve fatyô. Er Noa zenden vea Yehova shi ungwan imo na sha hanma kwagh yô, tese ér ka kwagh u yange ma ve fatyô u eren sha u waren yô. Sha nahan yô, jighjigh u nan u Noa la na tar u sha ayange a na la ibo. Noa yange tese ér ior mba sha ayangea a na la yange ma ve kôrcio u eren ishima i Aôndo. Jighjigh u nan na yange yima un man tsombor na cii. Aluer u dondo ikyav i jighjigh u Noa la yô, u fatyô u yiman iyol you kua ior ou cii. We kpa u fatyô u zenden vea Yehova Aôndo, una lu ijende you, er Noa nahan. Man ijende i u ya vea na la ia lu gbem sha won!