Ka nyi Aôndo a soo hen a vese? A wa se atindi kpete kpete a i gbe keng u se kuran yôô? Mlumun ka ei. Wan u Aôndo, Yesu Kristu, pase kwagh u Aôndo a soo hen a vese la sha ishember i môm tseegh.—Ôr Marku 12:28-31.

Hiihii yô, tôv sha ityôkyaa i i na ve Yesu ôr mkaanem mara yô. Yange lu tesen ken tempel sha iyange i Nisan 11, shighe u mase shin ayange kpuaa tseegh u una kpe la. Mbaihyomov nav nôngo ér vea kôron un a ikyaa zwa, sha u pinen un mbampin sha akaa a taver. Kpa hanma kwa yô, a cir ve zwa sha mlumun u a na la. Maa i pine Yesu mpin ne, ér: “Atindi cii, ka hanmô ker a lu u hiihii?”—Ivur 28.

Mpin la lu u taver kpishi. Mbayuda mbagenev yange ve gba anyiman sha kwagh u tindi u a lu u hiihii ken atindi 600 ken Tindi u Mose la. Ka inja er mbagenev kaa ér atindi cii nga kwagh môm, shi doo u kaan ér tindi môm hemba ugen kpaa ga nahan. Yesu una na mlumun sha mpin ne nena?

Yesu kaa ér ka atindi ahar a lu a hiihii ye. A hii kaan ér: “Ter Aôndo wou A̱ doo u ishima sha ishima you cii, man sha uma wou cii, man sha mfe wou cii kua sha agee ou cii.” (Ivur 30; Duteronomi 6:5) Ishember i “ishima” man “mhen” man “uma” man “agee” la cii nôngo u ôron kwagh môm. * Inja na yô, gba u Yehova una doo se ishima a mbamhen asev cii kua akaa a ase cii. Takerada ugen u pasen Bibilo kaa ér: “Gba u Aôndo una doo se ishima vindi vindi, kwagh a shi ga.” Nahan yô, aluer Aôndo doo u ishima yô, gba u hanma iyange yô, ú eren kwagh u una na a saan un iyol shi una lumun we yô.—1 Yohane 5:3.

Kwagh u sha uhar yô, Yesu kaa ér: “Or u nan we ndor a we yô, nana̱ doo u ishima er we iyol you nahan.” (Ivur 31; Levitiku 19:18) Mdoo u Aôndo doon se ishima kua orwanndor a vese la nôngo u lun kwagh môm. Saa Aôndo una doo se ishima ve mbawanndor a vese kpa vea doo se ishima ye. (1 Yohane 4:20, 21) Aluer se soo mbawanndor a vese er iyol yase nahan yô, se eren a ve er se soo ser mbagenev kpa ve eren a vese la. (Mateu 7:12) Ka sea eren nahan yô, se tese ser Aôndo u a gbe se kua mbawanndor a vese sha ibeen na la, doo se ishima.—Genese 1:26.

Atindi a a kaa ér Aôndo man mbawanndor a vese ve doo se ishima la nga hange hange sha nyi gbenda? Yesu kaa ér: “Tindi ugen u a hembe angan, ngu ga.” (Ivur 31) Ken Ivangeli i Mateu yô, Yesu kaa ér atindi cii har sha atindi a ahar ne.—Mateu 22:40.

Taver u eren ishima i Aôndo ga. A fatyô u kohol hanma kwagh u Aôndo a soo hen a vese cii yilan sha ishember i môm ér: dooshima. Aôndo soo ér mbacivir un ve soo un, shi a wa ishima ér ve za hemen u soon un gbem. Kpa dooshima saa sha mkaan shin sha mlu u ken ishima yase tseegh tsô ga; ka i tese un sha ieren. (1 Yohane 3:18) Hii nan u hen kwagh u ú er sha u tesen wer Yehova, Aôndo u ‘a lu dooshima’ la doo u ishima ga?—1 Yohane 4:8.