YESU yange lu a uma u injaa mimii? Ikyav tese ér yange vese hen ijiir i ior lu a kwagh ave kpishi ga yô, shi lu a akaa a doon a tar ne kpuaa tseegh. Jighilii yô, yange lu a “ape suur ityough ga.” (Luka 9:57, 58) Heela tseegh ga, yange ior kôr un ihyom shi ve sende un ityough, ken masejime yô, mbaihyomov nav wua un.

Alaghga u kaa wer, ‘Ka imba uma i m hen mer ka uma u injaa la ga!’ Kpa doo u se seer timen sha uma u Yesu jimin cii. De se time sha avegher a uma u Yesu anyiin.

“Kwaghyan Wam yô, ka u Me er ishima i u A tindim la.”—Yohane 4:34.

Yesu yange keren u eren ishima i Yehova, Ter na u sha la, sha mkaan man sha ieren. * Yange doo un kpishi u eren ishima i Aôndo. Er i tese ken ivur ruamabera i i lu sha heen ne nahan, Yesu tôô u eren ishima i Aôndo la kar sha kwaghyan. Time ase sha kwagh u yange na ve Yesu ôr mkaanem man la.

Yesu ôr mkaanem man shighe u iyange sha tembe. (Yohane 4:6) Yange zende angahar ken tar u agunguu u Samaria la pepe jimin cii, nahan ijen kôr un. Mbahenen nav kpa kaa a na ér: “Rabi, ma U ye kwagh.” (Yohane 4:31) Kpa kwagh u Yesu ôr la tese ér ka una eren tom u Aôndo yô, un vôron ga. Kwagh la tese ér uma na yange lu u injaa ga he?

‘Ter doom ishima.’—Yohane 14:31.

Yesu yange lu kôôsôô vea Ter na u sha la kpen kpen. Er Yesu soo Aôndo kpishi yô, a pase ior kwagh u iti i Ter na man mbaawashima nav kua aeren a na. Yesu yange kav Ter na sha mkaan man sha ieren kua sha mhen na, je yô, ka sea ôron kwagh u Yesu yô, i lu er ka Ter na je se lu ôron kwagh na nahan. Ka nahan ve, zum u Filibu kaa a Yesu ér: “Tese se Ter” yô, Yesu kaa a na ér: “U nan nenge a Mo yô, nan nenge a Ter je ve,” ye.—Yohane 14:8, 9.

Yesu yange soo Ter na kpishi je yô, a kegh iyol u ungwan un zan zan aren ken ku je kpaa. (Mbafilipi 2:7, 8; 1 Yohane 5:3) Mdoo u Aôndo doo Yesu ishima tsung la yange na uma na lu a inja.

“Or ngu a dooshima u a hembe ngun ga, je u or nana gbihi uma u nan sha ci u akar a nan.”—Yohane 15:13.

Er se yen yô, se mba a ishimaverenkeghen i va lun uma gbem sha won ga. Bibilo kaa ér: “Er isholibo nyôr shin tar sha or môm, man ku gema va sha ci u isholibo yô, nahan ku va sha ior cii sha ci u ve cii ve er isholibo yô.” (Mbaromanu 5:12) Se fatyô u waren ku u isholibo i ve a mi la sha tseeneke wase ga.—Mbaromanu 6:23.

Kpa se wuese Yehova kpishi, gadia a due a gbenda u sôron zayol u uumace la. Yange de ér Wan na u lu a isholibo ga, u va hingir Yesu la a ya ican shi a kpe, sha er una na nagh ku ipaan sha u yiman uumace ken isholibo man ku yô. Er Yesu soo Ter na kua uumace yô, a lumun u nan uma na u vough la sha ci wase. (Mbaromanu 5:6-8) Imba dooshima u tangenyol ga la yange na uma u Yesu lu un a inja. *

“Ngun ka Wan Wam u ishima ishima, u i doom a Na yum yô.”—Mateu 3:17.

Yehova yange ôr mkaanem man shaala, shighe u i er Yesu batisema la. Nahan Yehova pase gbar gbar ér un lumun Wan na, Yesu, shi a doo un ishima kpaa. Ka nahan ve Yesu ôr var var ér: “M doo Ter ishima” ye! (Yohane 10:17) Er Yesu fa er un doo Ter na ishima shi lumun un yô, a tagher a ahendan man ityuhanev sha ishimataver. Kwagh ne wase Yesu u tilen dông shighe u tagher a ku la. (Yohane 10:18) Mfe u Yesu fa ér un doo Ter na ishima shi a lumun un la kpa na uma na hemba lun a inja cii.

Sha kpôô yô, uma u Yesu yange lu a inja. Se kpa se fatyô u henen kwagh u se er ve uma wase una lu u unjaa la hen Yesu. Ngeren u dondon ne una time sha akaa agen a Yesu kaa a mbadondon un ér ve er tsô uma u ve una lu a inja la.