Yange i marem hen angeri u Texcoco. Shighe la i lu a haa ugodobi kpishi mba hen ijiir ne kootar ga, ve lu ihyundu ihyundu. Ashighe kpishi ior mba ken angarev mba ve lu ikyua la, ve tôô ikyav sha ujaki vev ve va tee hen angeri ne. Yange i mar se utaankarunyiin, mo m lu u sha utaankaruhar; tsombor wase lu a kwagh a ve ga. Terem yange sôron akôv, shi lu tom u eren ve koson tsombor na je la. Terem kpe shighe u m lu anyom ataankarahar la. Hii shighe la je, lu ngôm lu nôngon kôson se ye.

Terem u vesen yange kuhwan jita shi hemen mbaatsamev mbagenev mba ve kuhwan ityogholough mbi kwaghaôndo yô. Hanma or hen tsombor wase yô, nôngo u fan u kuhwan ma ityogholough. Ngôm waan atsam vea mbaatsamev mbagenev ken côôci, shi anmgbian u ngôm u nomso gberen atsam shi kuhwan piano. Yange se eren kwaghaôndo kpoghuloo. M lu wanye u wasen fada shighe u i ze adua yô, nahan mo kpa m soo u va hingir fada. Nahan kpa, shi m gema m soo ufiim mba i keren chanis ker la kpishi. Er m lu nengen ufiim mbara seer a seer yô, ipila i lu ken a mo la kpa lu seer a seer.

M za nyôr makeranta ugen u kwaghaôndo, u u lu er makeranta u fada nahana yô, hen gar u Puebla. Awashima wam lu u va hingir fada. Nahan kpa, ken inyom yam i masetyô ken makeranta la, kwagh u Adua u fada duen ishima. Gumkwase ugen ken côôci lu meen mo ér m yav a na. M palegh imeen la, nahan kpa, kwagh ne na yô, gba saren mo u eren kwase. Heela tseegh ga, m nenge ufada mbagenev kpishi lu civir Aôndo  sha mimi ga. Ken masejime yô, m gema awashima wam u va hingir fada la m nôngor kera.

Maa m yem u za henen ityogholough ken makeranta u tesen ityogholough mbi kuhwan, u gomoti ver ken gar u Mexico City yô. M va bee makeranta maa m vôso kwase, ica i gba ga maa se maa mbayev u unyiin. Yange m zuan a inyaregh ki koson tsombor wam sha u wan atsam ken Adua u Fada.

Sha hiihii la je, ivaa yase lu kwagh u anyam a iwa. Mo vea kwase wam cii se lu tswam tswam, sha ci u se cii se wa iyuhwe. Sha hiihii la, se zôhô zwa, se kaa ayol a ase akaa; shighe kar yô, se gema kôron sha ave. Anyom nga kar 13 yô, se pav ya, ken masejime yô, maa se pav ivaa.

Yange m hii zuan a Mbashiada mba Yehova sha kwa u hiihii cii ve m pav ya a kwase wam ye. Mbashiada uhar va kema uwer sha hunda wase, ve kaa ér ve soo u lamen a vese ken Bibilo. Yange m nengen mer m fa kwagh u kwaghaôndo za shimi, nahan m soo u tesen ve er ve fe kwagh môm ga yô. M pine ve mbampin mba taver mba m hen mer vea fatyô u nan mlumun ga yô. Kpa kwagh u kpiligh mo iyol yô, hanma kwa ve nam mbamlumun mba dedoo mba ve dugh ken Bibilo yô. Kwagh ne wasem m nenge er m fe Bibilo kpishi gayô. Nahan cii kpa, kwase wam yange soo kwagh u Mbashiada ga, shi er m luun a ian ga yô, maa ve de u van se inya.

Anyom nga kar ataan yô, shi m va zua a Mbashiada mba Yehova, shighe u m lu vea kwase ugen, u i yilan un ér Elvira yô. Elvira yange hendan a Mbashiada ga, nahan m zua a ian gbanger gbanger i henen Bibilo hanma shighe cii. Nahan je kpa, anyom yange kar imôngo cii ve, m de aeren a am a tse la ye.

M nenge mer aluer m soo u civir Yehova a ishima yam cii yô, gba u me gema inja sha akaa a vesen. Hiihii yô, gba u me de tom wam u gberen atsam ken Adua u Fada la, me ker kwagh ugen u me lu eren zuan a inyaregh yô. (Mpase 18:4) Shi yange gba u me za nger ivese yam vea Elvira, er tindi tese nahan.

Nahan kpa, kwagh u hemba taver mo u den cii yô, lu ishima i m nyoon kpishi la. Avur a Bibilo a ahar ne yange hemba wasem mo cii, lu: Pasalmi 11:5, u a kaa ér Yehova kôr ipila ihyom la, kua 1 Peteru 3:7, u wasem u kaven mer aluer m soo mer Yehova a ungwa mbamsen av yô, gba u me eren a kwase wam sha icivir la. Yange m gbidye kwar sha avur a Bibilo ne zulee shi m er msen mer Yehova a wasem, nahan m hii u den ishimanyoon kure kure.

Hegen m ngu zuan a msaanyol hen tsombor wam. M ngu nôngon mer me sôr mlu wam vea ônov av mba hen kwase wam u hiihii la, shi me wase tsombor wam u m lu a mi hegen ne u taver ken mimi.

Shighe u m lu wanye la, m soo u va lun fada, shi wasen ior. Hegen m nenge yô, uma wam hemba doon cii. Ka m tesen ior ityogholough mbi kuhwan sha er me zua a kwagh u koson tsombor wam yô. Doom kpishi er Yehova yange wa ishima a mo, shi nam ian i geman uma wam, hingir or u injaa nahan!