Er i lu nahan i er kwagh a we sha msange u sha dooshima vee? I lu nahan i venda u eren we kwagh, shin tôôn we tom, gayô, i er kwagh a we sha ilyahan sha ci u u ngu marnya ga, shin u ngu or u zwa ugen shin u ngu a kwagh ave ga yum vee? Aluer kwagh ngu nahan yô, ka we tswen ga, ior mbagenev kpa i er a ve nahan. Nahan cii kpa, ungwa ase loho u dedoo u ú lu sha kwagh ne yô: Imba ieren i nan or kunya shin eren kwagh a nan caveraa i i dumbur shin tar la, ngi sha ga. Apostoli Peteru yange kaa vangertiôr nahan ér, “Aôndo ka u sangen a sange ior ga.”—Ôr Aerenakaa 10:34, 35.

Peteru yange ôr mkaanem man hen ya u Ortyôtyev ugen u i yilan un ér Korneliu, u kera yô, Peteru ma za hen ya na ga yô. Peteru lu oryuda, man i mar un sha shighe u Mbayuda nengen atôatyev ér nga wang ga, shi ve soon u zuan kwagh a ve kpaa ga yô. Tsô, lu nyi i za a Peteru hen ya u Korneliu? Lu Aôndo kaa ér a za hen ya la ye! Aôndo yange tese Peteru mpase u sha mnenge, kaa a na ér: “Kwagh u Aôndo A ser un yô, we de kera kaan wer, ka u wang ga ze.” Cii man iyange la yô, i tese Korneliu mpase u sha mnenge, ortyom kaa a na ér a̱ tindi ior ve za yila Peteru. Kpa, Peteru gema fa ér kwagh er nahan ga. (Aerenakaa 10:1-15) Peteru yange kaven er i lu Yehova a lu eren kwagh ne yô, a ôr kwagh.

Peteru kaa ér: “Mimi je, m kav, Aôndo ka u sangen a sange ior ga.” (Aerenakaa 10:34) Ishember i ken zwa Grika i í gem ér “sangen a sange” la, inja na yô, ka u “kenger ior sha ishi, maa tsuan mba i soo la.” Ortimen sha akaa a Bibilo ugen pase inja i ishember ne ér: “Ngi ôron kwagh u jôôji u ka a kenger or sha ishi cii a mase kuren ijir yô; gadia kur ijir er i lu la ga, kpa ka er a kenger or ve i lu un ken ishima la, aluer a soo nan yô, una na nan ishô kpa una soo nan ga yô, una na nan ibo.” Aôndo hembe soon or môm a mbagenev sha ci u nan ngu a kwagh ave shin sha ci u zwa u nan, shin tar u nan shin ambaakaa la ga.

Kpa Yehova nengen kwagh u a lu or ken ishima la. (1 Samuel 16:7; Anzaakaa 21:2) Peteru shi kaa ér: “Ken hanma ikyurior yô, or u nan cie Un, nan eren perapera kpaa yô, Una rumun nan.” (Aerenakaa 10:35) U cian Aôndo la inja na yô, ka u nan un icivir, nan un jighjigh shi civir un, palegh u eren nyityôkwagh i ia vihi un cii. U eren perapera la, wa u eren kwagh u vough sha ishigh ki Aôndo, a mkighir shio. Or u nan cie Yehova ken ishima i nan sha mimi, nan eren kwagh u a lu u vough la, ka nan doo un ishima kpishi.—Duteronomi 10:12, 13.

Aluer yange i er kwagh a we sha msange u sha dooshima shin i nyagh u sha ci u mlu wou kpa, doo u mkaanem ma Peteru ôr sha kwagh u Aôndo ne ma a taver we ishima. Yehova ngu urugh ior mba ken akuraior cii van a ve ken mcivir u mimi. (Yohane 6:44; Aerenakaa 17:26, 27) Ongo mbamsen mba mbacivir un cii, we ikyo sha kwagh u ityô ve, shin tar ve shin mlu ve ga. (1 Utor 8:41-43) Se mba a vangertiôr ser, Yehova ka una sen ashe, a kenger shin tar yô, a nenge a kweior môm tseegh, ka uumace jimin cii je la. Kwagh ne na yô, u soo u seer fan kwagh u Aôndo u a sangen a sange ga ne kpa?