Icombor i lun a terkyoson shin ngôkyoson la ngi i nôngo u lun a zayol sha vegher u mlu ve a ior mba ken won u tsombor shon la. * Ka i gba u mbamaren kpishi mba ve lu ken imba tsombor ne la, vea lam a or u nan lu ter shin ngô u ônov mbara kpôô kpôô la sha ambaakaa er shighe u zan ape ormaren ugen nan lu la, man sha kwagh u tsahan ônov shin sha kwagh u suen ve sha inyar nahan. Alaghga ahuraior man azende kpa aa nôngo ér aa hoghor a ior mba hev mba hen tsombor la. Nenge ase er kwaghwan u Bibilo una wase tsombor wou u ú lu yesen ônov mba u mar iyol you ga la, u nôngon a mbamataver mban yô.

Kwase ugen ken tar u Namibia u a lu ngôkyoson yô, iti na ér Judith, a kaa ér: “Ngô u mbayev mba nomon yange kaa a ve ér, mo m ngu kwase u ter ve a hidi a vese tseegh tsô, nahan mea va mar ônov kpa, ve de nengen ônov mbara ér ka anmgbianev vev ga. Kwagh ne vihim kpishi, gadia m soo mbayev mbara er ka mo m mar ve nahan.”

 Mbatimen sha kwagh u tsombor kpa kaa ér mlu u hen atô u ormaren ugen la vea ormaren u nan lu ter shin ngô kpôô kpôô ga la una fatyô u hingir zayol u vesen, u van a mpav hen tsombor u lun a terkyoson shin ngôkyoson. Ashighe kpishi zayol ne hembe lun hen atô u kwase u a dugh la, man kwase u he la. Ka nyi ia wase ve?

Kwagh u una wase yô: Ver ikighir i eren kwagh. Aluer we ter shin ngô u ú mar ônov mbara kpôô kpôô la, u kam ve u tile a mi wer, ve de ze ikyua a ngô shin ter ve u ne pav la ga yô, ônov ou vea ya ican ken ishima. * Er i lu ne uhar cii yange ne “mar” ônov mbara yô, hanmô wen nan ngu a ian i eren kwagh a ve. (Anzaakaa 23:22, 25) Nahan kpa, aluer u na kwase shin nomou u ne pav la ian hen ya wou kpishi yô, alaghga u na ishima ia vihi kwase wou shin nomou u he la. Nôngo eren kwagh ne akuma akuma, eren kwagh ken ijouave vea ormaren ugen la er i gbe u a lu la, kpa shi ver ikighir i eren akaa sha er u kura ivese you i he la yô.

MBAMHEN SHA CI U MBAMAREN

• Zum u ú lu lamen a kwase shin nomou u ne pav la yô, ver ishima sha kwagh u uôn tseegh, pande u lamen sha akaa agen wue wue. U tesen ikyav yô, u fatyô pinen nan sha kwaghfan aluer ka u ne ver shighe u ne lamen sha telefon ken iyange yô. Kwagh la una hemba wasen a u yilan hanma shighe cii shin tugh la.

• Aluer ka we mbayev ve lu vea we ga yô, u fatyô u lamen a ve sha telefon shin ngeren ve washika, shin tindi ve a loho sha hanseeti shin tindin ve a e-mail sha er u lamen a ve hanma shighe yô. (Duteronomi 6:6, 7) Mbagenev ka ve lam sha kwagh u ka i fatyô lamen a iorov imôngo, shi ú nengen a ve er u lu lamen a ve, i yer un ér video conferencing la. U er nahan yô, alaghga u fa mbamgbe man mbamzeyol mba ônov ou, nahan u wa ve kwagh u una wase ve yô, a u gban henen tsô wer u ngu a ve imôngo ga yô, a taver la.

MBAMHEN SHA CI U UNGÔMBAKYOSON

• ‘Mhôônom’ ma kôr u a ngô u mbayev mbara u a dugh la, tese wang wer u ngu nôngon wer u kar u hingir ngô u ônov nav ga. (1 Peteru 3:8) Ôron nan kwagh u mbayev mba nan sha ashighe ashighe, hemban je yô sha akaa a doon a ve eren la. (Anzaakaa 16:24) U fatyô u keren kwaghwan hen a nan kpaa, shi zum u nan we u kwagh yô, wuese nan.

• Shighe u ngô u mbayev mbara a lu a ven imôngo yô, de lun a ve kôôsôô shin numben a ve kpishi ga. Kwase ugen ken tar u Amerika u a lu ngôkyoson yô, iti na Beverly, a kaa ér: “Mbayev mba nomom mba ngô ve a dugh la ka ve soo u yilan mo ér Mama. Nahan se kaa a ve ser doo, kpa i lu hen ya wase tseegh, shighe u ve lu vea Jane, ngô ve u a mar ve la shin tsombor na yô, ve de yerem ér Mama ga. Kwagh ne na yô, mlu wam vea Jane hemba doon. Shi ken masejime je yô, makeranta u mbayev mban ua zaan zende u za nengen akaa yô, se za a ve imôngo.”

MBAMHEN MBA VEA WASE MBAMAREN KPÔÔ KPÔÔ MAN MBAMAREN MBA YESEN A YESE

• Mayange de er kwagh dang sha iyol i ormaren u ne kera lu imôngo ga la, shin sha iyol i kwase shin nomou u he la sha atô a mbayev ga. Ka ican u lamen sha or nahala ga, kpa kwagh ne ngu a za mbayev iyol kpishi. Shi u fa shighe u a va kimbir mkaanem ou mara kua gbenda u a ôr ma la kpaa ga. (Orpasenkwagh 10:20) Aluer anye kaa ér ormaren u ne kera lu imôngo ga la,  shin nomou gayô kwase wou u he la lam sha a we yô, ver ishima sha mnenge u nan la. U fatyô u kaan wer: “Kpesh, gba den kera tsô. Ishima vihi ngô u a mo kpishi, man ashighe agen ishima ka ia vihi or yô, nan ôr akaa a vihin kpishi.”

• Wa nen atindi sha akaa, shi fa nen tsaha u ne naan hen uya mba uhar mbara yô. Kpa aluer gba sha mi ga yô, pase ormaren ugen la er i hii ve i gbe u kwagh a lu nahan yô, kpa lam a nan sha icivir. Nenge ase ikyav ne:

  Ngôkyoson: Tim, wea ya kwagh a bee yô, kura agbande za kire.

  Timothy: Ken ya u Mama wam yô, ka sea ya kwagh kpa, se mba kir agbande ga, ka se tôô se za ver un shin kicin, a kire.

  Ngôkyoson (ôr sha ishima vihin): Ngôu ngu tesen we ér we u wa hwev nahan u fa kpa?

  Kpa, aluer a ôr nahan di ye?

  Ngôkyoson (ôr sha imo i legh legh): U or ka mimi, kpa heen yô, ka sea a ya kwagh a bee yô, se kire agbande iyol yase.

• De veren shighe u eren akaa vea mbayev ou sha shighe u ma ve lu vea ormaren ugen la ga. (Mateu 7:12) Aluer kwagh u ú soo wer ne er la ka u ne fatyô u va eren un ken hemen ga yô, vande tôôn ian hen ormaren ugen la cii ve u mase ôron mbayev ou awashima wou ye.

Takerada ugen ôr kwagh u mliam ma kwase ugen, u nom na ngu a kohol mbayev nav mbanomso mbaganden uhar mba mar a kwase ugen, ve nzughul a na, vaa yô. Kwase la kaa ér: “Ishima i ngôôr vihin mo kondon ga.” U er nan ve u fatyô u lun a mbayev ou mbaganden doo doo, kpa geman vihin ivese iyou ga?

Kwagh u una wase yô: Tesen ikyo i wan. Bibilo kaa ér: “Ma or nana̱ de keren kwagh u doon sha ci u nan iyol i nan tsô ga, kpa i̱ lu kwagh u doon orgen kpaa.” (1 Mbakorinte 10:24) Nôngo u kaven mnenge u orgen la, shi wa un sha ada kpaa. Alaghga ishima ia nyian mbayev mbaganden mbara ér ormaren ve la nana va kera wa ve ikyo ga. Shin vea ngohol kwase u ter ve u he la shin nom u ngô ve u he la yô, vea kera lu eren kwagh a ter shin ngô ve u a mar ve kpôô kpôô la sha mimi ga. Mbamaren di kpa vea lu cian ér aluer ve venda ibumegh a mbayev mbara yô, tativ a yem kwagh ve.

De nôngon wer u ya ikyar a mbayev mba nom shin kwase wou u he la sha apera ga, de hanma kwagh a zaan tegh tegh. Kera kpa, ka doon u kighir or sha apera wer nana soo kwagh wou ga. (Icam i Hemban 8:4) Sha nahan yô, nôngo u lun a mnenge u vough sha kwagh mlu u we lun kôôsôô vea ônov mba nom shin kwase wou u he la.

Aluer mba nzughul a we je kpa, de gbe ôron hanma kwagh u a ve u ken ityou shin ken ishima cii tsô ga. (Anzaakaa 29:11) Aluer taver we u kôron nombor wou yô, sôn Yehova er Tor Davidi kpa er nahan, wer: “Ver mkor sha zwa wam TERE, kura ityumbuzwaagh yam.”—Pasalmi 141:3.

Aluer u tsua u lun hen ya ape mbayev mbara ve vese  la yô, adooga a kpiligh we iyol er ve soo un her kpishi yô. Nahan nôngo, de geman akaa ken iyou er u soo la ga, hemban je yô, ken arum a ngise ve tsaan ker la. Shin u fatyô u duen za nyôron ya ugen je kpaa.

Kwase ugen ken tar u Kanada u a lu ngôkyoson yô, iti na ér Marion, a kaa ér: “Ashighe kpishi mbamaren av ka ve na wan wam uiyua, kpa mba ne ônov mba nomom mba uhar mbara ga. Ka se nôngo ser se yam ve iyua, kpa ashighe agen se kanshio.”

Kwagh u una wase yô: Ver tsombor wou u he la hiihii. Pase anmgbianev ou kua azende a ou er kwagh u tsombor wou u he ne a gbe u ishima tsung yô. (1 Timoteu 5:8) Er u fatyô u veren ishima wer anmgbianev ou kua azende a ou cii a soo tsombor wou u he ne ave ave ga nahan kpa, u fatyô kaan a ve wer, ve eren kwagh a u kundu kundu man sha inja kpaa. Pase ve er aluer ve wa mbayev mba nom shin kwase wou u he la ikyo shi mba eren a ve tsembelee ga ve, a lu ve la.

De mbamaren mba kwase shin momou u tse la ve biishi a mbayev ou. Kwase ugen ken tar u Ingila, iti na ér Susan, a kaa ér: “Nomom yange kpe inyom karen i môm man iwer ataratar yô, m er nom ugen, nahan taver mbamaren mba nomom u tse la kpishi u ngohol nomom u he ne. Kpa se mba ne mbayev mba m mar vea wan ve la ian i yilan ve, shi sughun ve sha inôngon ve yô, kera taver ve yum ga.”

Aluer u ngu terkyoson shin ngôkyoson yô, fa wer alaghga mlu wou a ior mba ve lu ken won u tsombor wen la vea va ne a mzeyol. Nahan kpa, aluer u dondo kwaghwan u Bibilo yô, tsombor wou ua fatyô u zuan a iveren i Bibilo i tendezwa a mi la, ér: “Ka sha kwaghfan i maa ya ye, shi ka sha mkav kpaa i taver un ye.”—Anzaakaa 24:3.