Aôndo ongo ior mba ken hanma tar cii. (Pasalmi 145:18, 19) Bibilo i i lu Mkaanem nam la wa se kwagh ér se lam a na sha nyityôkwagh i i ze se iyol cii. (Mbafilipi 4:6, 7) Nahan cii kpa, mbamsen mbagenev vihi Aôndo ishima. U tesen ikyav yô, ior ka vea kimbir mbamsen mba ve er shin takerada ve ker ken ityou la nahan, i vihi un kpen kpen.—Ôr Mateu 6:7.

Shi, Yehova ongo mbamsen mba ior mba ve peren atindi a na sha apera la ga. (Anzaakaa 28:9) U tesen ikyav yô, sha ayange a tsuaa la, Aôndo venda u keghen ato a Mbaiserael mba ve lu a ibo i awambe la. Kwagh ne tese wang ér, gba u se er akaa a Aôndo a soo la ve, una ungwa msen wase ye.—Ôr Yesaia 1:15.

Aluer se na Aôndo jighjigh ga yô, se fatyô u eren msen hen a na ga. (Yakobu 1:5, 6) Gba u se na jighjigh ser ngu, shi we se ikyo kpaa. Se fatyô u taver jighjigh wase u nan sha u henen Bibilo, sha ci u jighjigh u nan u mimi har sha ikyav man ishimaverenkeghen i i lu ken Mkaanem ma Aôndo la.—Ôr Mbaheberu 11:1, 6.

Gba u se er msen a ishima i môm shi se hide a iyol ijime kpaa. Yesu u a lu Wan u Aôndo la je kpa, yange una eren msen yô, a hide a iyol na ijime. (Luka 22:41, 42) Nahan yô, doo u se ôr Aôndo kwagh u a̱ er ga, kpa se nôngo u kaven kwagh u a soo ér se er la sha u ôron Bibilo. Se eren nahan cii yô, se lu eren msen sha ishima i Aôndo.—Ôr 1 Yohane 5:14.