M hii u soon akaa a Aôndo a gbe la iyev je. Yange i doo tsombor wam zan ken akô man aber a a kase gar wase u i yer ér Jyväskylä, u lu hen atô u tar u Finland la. M soo kwagh u annyamev kpishi. Shighe u m lu iyev la, mea nenge a kpatema shin aniwa je i lum pe kuven! Er m lu vesen la, ior a nzughul a annyamev nahan i vihim kpishi. Shighe kar yô, m nyôr mzough u kuran annyamev, nahan m zua a ior mbagen mba lun asema er mo nahan.

Yange se venda kwagh u nzughul a annyamev la kpoghuloo. Se gber ikyatakerada se kar ior wuee, shi se lôhô ior se due sha godobi sha u vendan ser mbateen akôv a inyam man ayouacii a karen twersôron sha annyamev ve de u nzughul a annyamev. Shi yange se ver mzough u kuran annyamev u he. Er se eren kwagh sha utaha sha u van a mbamgem yô, ashighe kpishi se lu a zayol vea mbautahav. Yange i kôrom i za wuhe shi i yem a mo ken atejir acin imôngo.

Zayol wam lu sha kwagh u annyamev tseegh ga, kpa kua sha akaa agen sha tar wuee. Ken masejime yô, m hingir u lun ken mbamzough kpishi, kua mzough ugen u nengen sha kwagh u ian i hanma orumace nan lu a mi i eren kwagh u nan soo, u i yer ér Amnesty International la, man mzough ugen u kuran ikyasen i tar, u i yer ér greenpeace la. Yange m na agee a am cii sha u wasen ityom i mbamzough mban ve eren la. M ôron kwagh yughur yughur sha ci u mbaibanave man mba ve lu kpen ijen kua mba uma a we taver ve la.

Nahan kpa, tegh tegh tsô, m va kav er i lu u me fatyô u geman tar ga yô. Shin er mbamzough mban wase u sôron mbamzeyol mba kiriki kpuaa nahan kpa, mbamzeyol mba vesen yô, lu inja er mba hemban vihin gban a gba kera nahan. Lu inja er kwaghbo yisa sha tar cica cii shi kwagh kera gba or sha ma zayol ga nahan. Nahan m nenge mer m ngu a tahav ga.

Iniôngon i m lu a mi ga la na ishima ngur vihin mo yô, kwagh u Aôndo kua Bibilo gba van mo ken ishima. Hen shighe ne, m sember henen  Bibilo vea Mbashiada mba Yehova. Shin er m nenge mer Mbashiada mba inja kundu kundu shi ve wam ikyo nahan kpa, m lu a kegh iyol u den uma u m eren la ga. Kpa kwa ne yô, gbande gema imo.

Maa m tôô Bibilo yam m gba ôron. Kwagh ne nam ishimasurun kpishi. M nenge avur a Bibilo kpishi tese ér se̱ eren a annyamegh doo doo. U tesen ikyav yô, Anzaakaa 12:10 kaa ér: “Orperapera we uma u zendenya na ikyo.” Shi m nenge mer ka Aôndo a ne ve mbamzeyol ve lu shi tar ga. Kpa mbamzeyol asev mba hemban gban a gba kera sha ci u ior kpishi mba dondon kwaghwan u Aôndo ga. Yange saan mo iyol kpishi er m fa kwagh u dooshima u Yehova kua ishimawan na yô.—Mbagalatia 5:22.

Hen shighe ne, m zua a foom u pinen takerada u Bibilo Tese Er Nyi Jimi? la, m nger m tindi a mi. Ica i gba ga maa Orshiada ugen vea kwase na va hen ya wam ér vea va hen Bibilo a mo, maa m lumun. Shi m hii u zan mbamkombo mba Mbakristu ken Iyou i Tartor. Kwagh u m lu henen ken Bibilo la maa hii u kôron mo ken ishima.

Bibilo wasem kpishi, nahan m kôrcio u geman uma wam sha gbenda u vesen. M de taav u man shi m kera maan msôrom kpishi ga. M de lamen dang shi m gema mluashe wam. Bibilo wasem m de u hendan kwagh a mbautahav. (Mbaromanu 13:1) Shi m de u keren kasev, ieren i yange taver mo u den kpishi ne.

Kwagh u yange hemba taver mo u den yô, lu u lun a mnenge u vough sha mbamzough mba ior ver la. Kwagh ne yange tôôm shighe kpishi. Sha hiihii la, m hen mer me de u eren tom vea mbamzough mban yô, me lu eren kwagh a ve sha mimi ga. Nahan kpa, m va mase nengen mer ka Tartor u Aôndo tseegh ua kura tar wase ne sha mimi ye. Nahan m tsua u suen Tartor la shi wasen ior u henen kwagh u ú sha agee a am cii.—Mateu 6:33.

Er m lu or u keren mkpeyol sha ci u hanma or yô, yange m nengen ior mbagenev mer ka ior mba dedoo, kpa mbagenev di mer ka ior mba bov. Yange m kôr ior mba m nenge ve mer ka ior mba bov la ihyom. Kpa Bibilo wasem, m kera ker mbagenev ihyom ga. Er ma m ker ve ihyom la yô, ka m nôngo u tesen hanma or cii dooshima u Mbakristu ve lu a mi la. (Mateu 5:44) Gbenda môm u m tesen ior dooshima ne yô, ka u pasen ve loho u dedoo u Tartor u Aôndo. Saan mo iyol kpishi u nengen er tom u injaa ne u lu van ior a bem man msaanyol shi u ne ior ishimaverenkeghen i mimi nahan.

Er m de hanma kwagh mer Yehova a nenge shami yô, m zua a mmem ken ishima. M ngu a vangertiôr mer, er i lu un a gbe akaa cii yô, una de ér i nzughul a annyamev man uumace gbem sha won ga, shi una lumun ér i vihi tar wase u doon ashe ne kpaa ga. Kpa ica a gba ga tsô, una sôr hanma kwagh u uumace ve vihi la cii sha ikyev i Tartor na. (Yesaia 11:1-9) Er m fe akaa a mimi ne shi m lu wasen mbagenev mer ve na akaa ne jighjigh ne, saan mo iyol kpen kpen. M kera nengen mer gba u me kura tar ga.