M vese hen angar u ugen mba yer un ér Warialda, ken kpentar u New South Wales, ken tar u Australia. Ior mba eren ityom kposo kposo hen ijiir ne, mbagenev mba koson iyôngo, mbagen di mba a ibua, mbagenev mba kahan isham uiyia man iyiav mbigenev. Ifer ngi hen gar ne kpishi ga.

Terem mar se pue, mo m lu waniunda, nahan shighe u m lu anyom 13 la, m hii u eren tom sha u wasen tsombor wam. Er m hen makeranta kpishi ga yô, m yaren ken ishule i ior. M va kom anyom 15 yô, m lu eren tom u kôron anyinya a ken toho va koson a ken ya.

Yange m zua a akaa a doon kua a doon ga ken ishule i m yaren ker la. Yange ijiir la doom, shi m soo ityom i m eren her la. Tugh yange mbua ile yô, m keer usu m tema her, m kenger uwer man asan sha kwavaôndo, shi ahumbe a a karen nahan m ungwa ihyuma i dedoo i toho u hen ijiir la. M umbur er yange m henen mer Or gba a gba akaa a kpilighyol ne yô. Nahan kpa, ior mbagenev ken ishule la gema lu a aeren a bo, a yange tsarem yô. Hanma shighe yô, m ungwa ve bumun, shi m hingir u man taav. Ica i gba ga tsô mo kpa kwagh u bumun la man taav u man ya tor ken a mo.

M va kom anyom 18 yô, m mough m yem hen gar u Sydney. M za nôngo mer me nyôr shoja, kpa i tôôm ga ér mo m fa takerada ga. Kpa m zua a tom ugen, nahan m tsa hen gar u Sydney la kuma inyom i môm. Lu hen shighe ne m hii zuan a Mbashiada mba Yehova ye. Ve lôhôm mkombo, nahan m za. Fese je maa m kav er atesen a ve la lu a mimi yô.

Nahan cii kpa, ica i gba ga tsô, m hide m yem hen angar ugen. M za mase teman inya hen gar u Goondiwindi, ken kpentar u Queensland. M zua a tom ugen, maa m er kwase, man kwagh er vihi yô, m shi m hii u man msôrom kpoghuloo.

 Mo vea kwase wam se mar ônov uhar. Se mba maren ônov mba uhar mbara kera yô, M Hii u Henen sha Kwagh u M Lu sha Mi Jim Yô. M umbur kwagh u yange m ungwa ken mkombo u Mbashiada u m nyôr shighe u m lu ken gar u Sydney la, nahan m er kwagh sha mi.

M zua a kôpi u Iyoukura i tse, u lu a adereshi u branci u Mbashiada mba Yehova u ken tar u Australia la yô. Nahan m nger washika m tindi mer i wasem. Nahan maa Orshiada ugen u lun a dooshima va hen ya wam. Ica kera gba ga je maa, hii u henen Bibilo a mo.

Yange m ngur henen Bibilo yô, m nenge mer gba u me de akaa agen kpishi ken uma wam. Ivur Bibilo i i hemba kôron mo ken ishima yô, lu 2 Mbakorinte 7:1. Ivur la taver se ishima ér se ‘wanger ayol a ase sha hanma kwagh u hôngorough u ken iyol cii.’

M kange ishima mer me de u man taav shi man msôrom karen ikyaa inya. Yange lum ican kpishi u den akaa ne, gadia akaa ne ya tor ken a mo. Kpa m kange ishima mer me eren kwagh u doon Aôndo ken uma wam. Kwagh u hemba wasen mo yô, lu kwaghwan u ken Mbaromanu 12:2, u m dondo la. Ijiir la kaa ér: “De hingir nen inja i môm a tar ne ga, kpa i̱ gema ne sha mgem u he u mhen wen.” Yange m nenge mer gba u me gema mhen wam shi me nengen aeren a am a bo la, er Aôndo a nengen a nahan, ve me de a ye. Sha iwasen na yô, m de taav shi m de u man msôrom karen ikyaa inya.

Nahan kpa, kwagh u yange hemba taver mo u den yô, lu ieren i bumun la. M fa kwaghwan u Bibilo u i nger ken Mbaefese 4:29 ér: “Ma kwaghôron u dang a̱ de dugh ken zwa wen ga” la. Nahan cii kpa, m kôrcio u den iliam i dang fele ga. Yange m gbidye kwar sha kwagh u Yesaia 40:26 a kaa la. Ivur la ôr kwagh u asan a sha kwavaôndo ér: “Kende nen ashe a en sha, nenge nen: ka an nan gbe akaa ne, nan dugh a akum a ve sha iyenge ve, nan yer a cii sha ati ati? Sha mvese u agee a Na man sha ci u mtaver u tahav Nav, mô môm u lun ga ngu ga.” M hen yô, aluer Aôndo ngu a tahav mbu gban akaa a sha won, a a doon mo u kenger yum ne yô, mo kpa una fatyô u nan mo agee a geman uma wam sha er me eren kwagh u sha ishima na yô. M er msen kpoghuloo shi m nôngo sha afatyô wam cii, nahan tegh tegh tsô, m kôr nombor wam tsaha.

Er m lu or u nengen sha anyinya yô, m zuan a ian i lamen a ior kpishi ga, sha ci u ior lu hen ijiir i m eren tom ishule la kpishi ga. Nahan kpa, er mbamkombo mba Mbashiada mba Yehova tsaase mo yô, u fa u lamen a ior. Shi kwagh ugen yô, ityesen la wasem u pasen mbagenev loho u dedoo u Tartor u Aôndo.—Mateu 6:9, 10; 24:14.

M er tom u ortamen ken tiônnongo anyom imôngo hegen. Kam kwagh u icivirigh kpishi u wasen mba se civir Yehova imôngo la. Kwagh u a hembe doon mo yô, ka er m lu civir Yehova a tsombor wam imôngo la.

M wuese Yehova kpishi er a nem, mo or u fan takerada ga ne ian i henen kwagh sha ikyev na yô. (Yesaia 54:13) M ngu a ma kwagh u hunan sha kwagh u Anzaakaa 10:22 a kaa ne ga, ér: “Iveren i TER ngi ve a inyaregh.” Mo man tsombor wam cii se mba veren ashe u va seer fan kwagh u Yehova shi civir un gbem sha won.