Aôndo yange tôndo zwa a orjighjigh Aberahan ér, “vor” u ityendezwa la ua due ken tsombor u Aberaham. A lu ken vor la man “akuraior a sha won cii” aa zua a iveren ye. (Genese 22:18) Shighe kar yô, Yakob u lu wan u wan u Aberaham la yem shir ken tar u Igipiti, ape tsombor na vese hingir ikyurior i Iserael la.

Anyom nga kar imôngo yô, tor u Igipiti ugen, Farao u wan tswam kôr Mbaiserael hingir ikpan na, zan zan Aôndo va tindi profeti Mose za due a Mbaiserael ken uikyangen sha ivande, zum u Zegemnger u Nyian pav, ve kar sha tareghnyaa la. Aôndo maa na Mbaiserael atindi, kua Atindi a Pue la, sha er aa hemen ve shi aa kura ve yô. Atindi la tese ve iniav mbi vea naan sha er a de ve asorabo a ve yô. Aôndo mgbegha Mose kaa a Mbaiserael ér Aôndo una tindi profeti ugen hen a ve. Profeti la nana lu “vor” u ityendezwa la.

Anyom nga karen ka hembe 400 yô, Aôndo tôndo zwa a Tor Davidi ér or u nana lu “vor” u yange i tôndo zwa ken Eden la nana tema tor sha tartor u ua lu gbem sha won yô. Or la nana lu Mesiya, Oryiman u Aôndo a tsough un ér a paa uumace shi a hide a Paradiso sha tar la.

Aôndo seer pasen kwagh u Mesiya kure kure sha ikyev i Davidi man uprofeti mbagenev. Davidi man uprofeti yange ve tsengakaan ér Mesiya una lu inja legh legh shi shighe u una lu hemen la, ijen man ifer man ityav mbia bee. Uumace cii vea lu ken bem ayol a ve shi vea lu ken bem a annyamev kpaa. A kar a angev man ican i yan kua ku cii kera, gadia sha hiihii la je, Aôndo wa ishima ér akaa ne a eren se ga. Shi mba ve kpe cii vea hide a lu uma sha tar.

Aôndo yange tsengaôron sha ikyev i profeti Mika ér a mar Mesiya ken gar u Betelehem, shi Aôndo tsengaôron sha ikyev i profeti Daniel ér a wua Mesiya. Kpa Aôndo una nder Mesiya shin ku shi una ver un Tor sha. Daniel shi yange tsenga fan ér, Tartor u Mesiya ua kar a tile sha ityough ki ugomoti mbagenev cii. Mesiya yange va mimi, er i tsengaôron ér una va nahan kpa?

​—A har sha Genese ityough 22-50 man Ekesodu, Duteronomi, 2 Samuel, Upasalmi, Yesaia, Daniel, Mika, Sekaria 9:9.