I lu nahan u vihi iyol nyoon we je u vaa vee?— * Adooga se cii se vaa shighe u imba kwagh ne i er se la. Nahan kpa, ashighe agen se fatyô u vaan sha ci u ishima doo se ker ga. Alaghga orgen nana wa se akaa iyol dang dang. Kwagh la una fatyô u vihin se, shin ka nahan ga?— Aôndo kpa ishima ia fatyô u vihin un zum u i we un mbaaie iyol yô. De se time sha kwagh ne, nahan se nenge kwagh u se er ve a saan Aôndo iyol, se vihi un a vihi ishima ga yô.

Bibilo kaa ér ior mbagenev mba yange ve senge ér Aôndo doo ve ishima yô “vihi un ishima.” Mimi je, yange “ve bam” Aôndo! Jighilii yô, or môm kpa nana fatyô u vihin Yehova Aôndo iyol ga. A hemba agee sha won cii. Yô, de se nenge er i hii ve ishima ka i vihi Yehova shighe u se vende u ungwan imo na yô.

Iorov mba uhar mba Yehova hii gban sha tar la yange ve er kwagh u nan un ishimavihin kpishi. Yehova yange ver ve ken Paradiso sha tar, i yilan un ér “sule u Eden.” Iorov mba uhar mban lu ana man ana?— Ôôn ngwa, lu Adam, Ifa va kohol un ken masejime. De se nenge kwagh u yange ve er ve ishima doo Yehova ker ga la.

Yehova yange veren ve ken sule la yô, a kaa a ve ér ve nengen sha u. Shi kaa a ve ér vea fatyô u maren ônov, shi ve kua ônov vev cii vea lu uma ken sule la gbem sha won. Kpa cii man Adam vea Ifa ve mar ônov yô, kwagh u cier iyol ugen er. U fa kwagh u yange er kpa?— Ortyom ugen va tsugh Ifa kua Adam ve hendan a Yehova. De se nenge er yange kwagh ne er yô.

Ortyom la yange na yô lu inja er ka iyô i lu lamen nahan. Kwagh u Ifa ungwa la doo un—iyô la kaa a na ér una hingir er “Aôndo nahan.” Maa a er kwagh u iyô kaa ér a er la. U fa kwagh shon kpa?—

 Ifa ya kon u Yehova ta Adam icin ér ve de ye atam a u ga la. Cii man Yehova gba Ifa yô, yange kaa a Adam ér: “Hanma kon u ken sule ne, gbaa yan u tsô, kpa kon u mfe u fan kwagh u dedoo man kwagh u bo la, de ye u ga, gadia iyange i ú ya u la, ú kpe je.”

Ifa yange fa tindi la. Kpa, er zer kenger kon la gbem yô, a nenge ér u ‘doo u yan, shi u doo ashe kpaa,’ maa “a zôr atam a u, a ya.” Shighe kar yô, a na Adam, “un kpaa ya je.” U hen wer lu nyi i na ve Adam er kwagh nahana?— Adam yange er nahan sha ci u Ifa va hemba doon un ishima a Yehova. Nahan kera tsua u eren ishima i Yehova ga, gema tsua kwagh u una er ve a doo Ifa a na yô. Kpa gba u se hemban ungwan imo i Yehova a imo i hanma orgen cii!

U umbur iyô i yange i lam a Ifa la kpa? Er or ka nan er anbebi u numben a mi a eren imo inja er ngu ôron kwagh nahan, kape orgen yange nan na lu inja er iyô la ngi lamen je la. Ka imo i ana yange i lu duen ken iyô laa?— Lu imo i ‘tseyô, u i yer un er Diabolo man shi Satan la.’

U fa kwagh u ú er ve a saan Yehova iyol kpa?— Aluer u ngu eren kwagh sha ishima na hanma shighe yô, a saan un iyol. Satan kaa ér una fatyô u geman hanma or cii nana er kwagh u un soo yô. Nahan Yehova ngu wan se kwagh ér: “Wan wam, lu orfankwagh, na i saan mo iyol, sha er me gema me kaa imo a or u a laham yô.” Satan laha Yehova, shin a kaa un tar. A kaa ér una fatyô u geman hanma or cii nana de u civir Yehova. Sha nahan yô, na i saan Yehova iyol sha u ungwan imo na shi civir un! We u er nahan kpa?—