Bibilo ka takerada u í hembe fan u sha tar cii yô. Sha ci u nyi? Sha ci u i̱ ôr akaa a a zough sha kwagh u uma wase yô. I̱ ôr akaa a ior mba yange ve lu kpôô kpôô yô, man akaa a yange ve eren a mbagenev kua Aôndo yô. I nger Bibilo sha asember a a er kwagh jighilii, shi a taver u kaven ga, a se fatyô u geman ken ijô uderi imôngo shi ior mba sha ajiir kposo kposo shin sha ikyov ikyov kpa vea fatyô u kaven yô. Ka asember a ior mba ve lu hanma ijiir cii man sha hanma shighe cii vea fatyô u geman á ken ijô igen uderi imôngo yô. Man akaawan a Bibilo nga gbe inya mayange ga.

Kwagh u hemban cii je yô, Bibilo ka takerada u ú er kwagh u Aôndo tseegh tsô ga, ka takerada u ú dugh hen Aôndo yô. Bibilo pase se iti i Aôndo man aeren a na kua awashima na u gban tar man uumace, u a gem kposo ga la. Bibilo shi pase se er yange kwagh u dedoo hii u hendan a kwaghbo tsuaa je yô: ka kwagh u doon tsung, u a we hanma orumace ker, u una va kure sha gbenda u doon tsung la je la. Nahan aluer se mba ôron Bibilo a awashima u puun a puu i̱ ga yô, se hingir u lun a jighjigh u nan kua ishimaverenkeghen.

Se fatyô u zuan a loho u u lu ken Bibilo la ma ijiir igen i môm ga. U tesen ikyav yô, Bibilo ôr se akaa a mimi sha atineakaa agen, er a ngan nahan:

• Ape uumace ve dugh la, man er i hii ve se lu yan ican yô

• Kwagh u Aôndo a er sha u yiman uumace yô

• Kwagh u Yesu a er sha ci wase yô

• Mlu u tar ne man uumace ken hemen

Er nan u er upeeji mba ve dondo ne, shi u hen sha kwagh u Bibilo i er sha atineakaa shon la ga?