U ôron kwagh kpishi ga yô, Bibilo pase er yange sha man tar hii la ken Genese, takerada u Bibilo u hiihii la, ér: “Sha hiihii Aôndo gba Sha man tar.” (Genese 1:1) Aôndo yange gbe imendenev man annyamev been yô, a gba uumace mba hiihii mbara, Adam man Ifa. Ve lu kposo a annyamev, sha ci u uumace mba a eren a Aôndo, shi mba a ian i tsuan kwagh u ve soo u eren yô. Sha nahan yô, lu u kwagh u ieren ve i ve a mi la una lu sha ityough vev. Lu u vea ungwa kwaghwan u Aôndo yô, vea kure awashima u Aôndo yange gba ve ér ve lu mbamaren mba tsombor u uumace sha tar cii, mba vea lu bem bem shi vea lu a uma u vough gbem sha won la.

Nahan kpa, ortyom shin orgen u ken jijingi va tsugh uumace ve hingir u eren ishima na. Maa a hingir Satan, inja na yô ér “Orhendankwagh.” Satan yange lam a Ifa sha inja i iyô, kaa a na ér aluer Aôndo hemen un ga yô, a hemba kpen un iyol. Adam man Ifa dondo Satan, nahan ve pav a or u gba ve la. Er mbamaren asev mba hiihii mbara er ibumekwagh yô, uma u tsôron kar ve shi ve na se cii dyako i isholibo man myen kua ku u i gbe u se kpe kpee ne.

Fese je maa Aôndo pase awashima na u sôron zayol ne, sha u ônov mba Adam ve lu uma gbem sha won yô. Aôndo yange tsengaôron ér “vor,” ka orgen u vough je la, ua tim Satan vindi vindi shi ua kar a ican i Satan man Adam man Ifa ve ve a mi la kera. (Genese 3:15) Lu an gba u nana va hingir “vor” laa? Lu u shighe a kar man a fa or shon ye.

Cii man shighe la yô, Satan lu nôngon sha afatyô na cii ér una yange awashima u Aôndo ne. Isholibo man ifer lu samber fele fele. Nahan Aôndo bum ér una tim iferkwagh sha mngerem ma deemee. A kaa a orperapera Noa ér a gba tso, lu zegetso u lun a azongo anyiin er akwati nahan, u una fatyô u tilen sha kwavmnger yô, sha er una war uma na kua tsombor na, man annyamegh mba Aôndo kaa a na ér a nyôr a ve shin tso la yô.

Mngerem ma Deemee mara yange ma va, inyom kar yô, Noa kua tsombor na due ken tso la, ve hungwa sha tar u wang. Kpa i lu a fa or u nan lu “vor” la ga.

​—A har sha Genese ityough 1-11 man Yuda 6, 14, 15 kua Mpase 12:9.