Hanma uwer u Disemba yô, ior kpishi sha tar ka ve nenge a ufoto mba Yesu mba sha shighe u lu ankyundan la. Ka i gbir un shin zege anar u haan ilev kwaghyan shimi. Kpa ka shighe u Yesu lu ankyundan la tseegh i doo u se umbur un yee?— * De se nenge gbenda u u hembe doon u umbur un la. Se fatyô u henen kwagh sha kwagh u yange er mbakuranilev ken toho tugh, ikyua a Betelehem la.

Yange ortyom ugen za ande hen mbakuranilev kpoo, kaa a ve ér: “I mar ne Oryiman . . . , ka Kristu Ter je la.” Shi ortyom la kaa a ve ér vea za zua a Yesu u i “we Un ken akondo i gbir Un shin anar u haan ilev kwaghyan” yô. Her ave ave je maa ikyum i mbatyomov va due her gba “wuese Aôndo.”

Aluer u ungwa mbatyomov mba wuese Aôndo nahan a lu u nena?— Yange saan mbakuranilev mbara iyol! Ve kaa ér: “Se za nen ken Betelehem, se za nenge nen kwagh u a er” ne. Mba ze yô, ve za zua a “Maria man Yosev, man Wanikyundan la kpaa, lu yaven shin anar u haan ilev kwaghyan.”

Ica i gbe ga yô, mbagenev kpa va ken Betelehem, ape Maria man Yosev lu la. Mbakuranilev mbara mba er ve kwagh u za hemen yô, ve cii kpiligh ve iyol. U ungwa akaa a doon ne nahan saan we iyol kpa?— Se mba Aôndo a doo se ishima cii, saan se iyol. Yô, de se nenge er i hii ve i saan se iyol a mar u Yesu la kpishi yô. Se hii sha shighe u Maria lu a er nom ga la je, ve se fa ityôkyaa la ye.

Yange sev hungwa av, nahan ortyom ugen u i yer un ér Gaberiel yô, va hen Maria. A va tôndo zwa ér Maria una mar wan, wan la “Una lu Zegeor, á yilan Un er Wan u Uhembansha.” Gaberiel kaa ér wan la “Una lu tor . . . ; tartor Na kpaa ua bee mayange ga.”

Yange Maria soo u fan er kwagh ne una er yô, gadia lu a vôso nom ga. Tsô Gaberiel kaa a na ér: “Agee a Uhembansha la kpaa aa kase u,” nahan “Un u á mar Un la á yilan Un er Icighanwan u Aôndo.” U tôôn Wan  u Aôndo sha, geman un wan ken iyav mbu Maria sha u i va mar un a lu ankyundan la lu ivande i kpiligh iyol kpen kpen!

U nenge er ufoto mban ve tese “mbafankwagh” iorov utar kua mbakuranilev, er ve ze u nengen wanikyundan Yesu kpa?— Ufoto mban nahan ka a va kuma shighe u Kirimishi ve de ishar. Kpa ka ve tese kwagh u yange er la vough ga. “Mbafankwagh” mbara yange ve lu mbatimen sha akaa a sha kwavaôndo, mba ve eren akaa a Aôndo a vende yô. U fa kwagh u yange ve za nyôr ve ve nenge a mi kpa? Bibilo kaa ér: “Tsô ve za nyôr ken iyou la, ve nenge a Wanikyundan la a ngô Na Maria.” Sha nahan yô, hen shighe ne Yesu kera lu ankyundan ga, shi i gbir un shin anar u haan ilev kwaghyan kpaa ga; lu vea mbamaren nav, Yosev man Maria ken iyou!

Mbatimen sha akaa a sha kwavaôndo mbara yange ve er nena ve ve fa ijiir i Yesu lu laa?— Yange “ishan” hemen ve za a ve ken Betelehem jighilii ga, kpa i hii karen a ve hen Tor Herode, ken Yerusalem. Bibilo kaa ér Herode yange soo u fan ape Yesu lu la sha u una wua un yô. Hen ase sha kwagh ne. U hen wer ka an yange nan er kwagh u due sha kwavaôndo er ka ishan la hemen mbatimen sha akaa a sha kwavaôndo mbara, za a ve hen Herode?— Yange lu Yehova, Aôndo u mimi la ga, kpa lu or u a lahan un shin orihyom na, Satan Diabolo!

Nyian ne, Satan ngu nôngon ér ior ve hen ér Yesu ngu ankyundan u a fe kwagh môm môm ga yô. Kpa ortyom Gaberiel kaa a Maria ér: “Una lu tor . . . ; tartor Na kpaa ua bee mayange ga.” Hegen ne, Yesu tema Tor sha, shi ica ia gba ga tsô una tim mbaihyomov mba Aôndo cii kera. Ka kwagh u i doo u se umbur sha kwagh u Yesu je la, shi gba u se ôr mbagenev kpaa.