Bibilo ter ashighe a mbautahav mbagenev er ior ican yô. Kwagh ne umbur se kwagh u Naboti. Ahaba, u lu tor u Iserael, hii ken inyom i 940 C.S.Y. (Cii man Shighe u Yesu) la, yange de kwase na, Yesebel, wua Naboti kua ônov nav mba nomso, ér sule u ikyon i wain na la u hingir u tor. (1 Utor 21:1-16; 2 Utor 9:26) Er nan ve Aôndo de orgen er tahav sha or caveraa yum nahana?

De se time sha ityôkyaa i môm: Aôndo eren aie ga. (Titu 1:2) Mkaanem man zua sha kwagh u atsan a i eren ior la nena? Sha hiihii la je, Aôndo ta uumace icin ér aluer ve hemba un ato yô, vea kpe. Uumace hii u kpen shighe u ve hemba Aôndo ato ken sule u Eden la je, vough er Aôndo kaa nahan. Orumace u hii kpen la kpa yange i er un ican ve kpe ye, ka mwoo u Kain wua anngô na Abel je la.—Genese 2:16, 17; 4:8.

Mkaanem ma Aôndo sav ôron yiase i uumace ér: “Or ka nana lu a tahav sha orgen yô, nan eren nan ican.” (Orpasenkwagh 8:9) Kwagh ngu nahan mimi kpa? Yehova yange ta ior nav, Mbaiserael icin ér utor vev vea er ve atsan, nahan vea vaa a Aôndo. (1 Samuel 8:11-18) Orfankwagh, Tor Solomon je kpa yange wa ior nav kpandegh je ve puu ga. (1 Utor 11:43; 12:3, 4) Utor mba wan afer, er Ahaba nahan yange ve hemba eren ior atsan cii. Hen ase sha kwagh ne: Aôndo una yange mbautahav u nzughul a ior nahan, kwagh u yange ôr la ma a gbe aie ga he?

Shi umbur kpaa wer, Satan senge ér ior mba civir Aôndo sha ci u akaa a dedoo a a ne ve la tseegh. (Yobu 1:9, 10; 2:4) Aôndo una palegh mbacivir un cii a hanma inja ican nahan, kwagh la ma a tese ér kwagh u Satan kaa la ka mimi ga he? Shi Aôndo una yange ér ma ican i de eren or ga nahan, kwagh la ma a tese ér ka un a lu oraie u hemban cii ga he? Luun er Aôndo yange akaa ne yô, ior kpishi ma ve hen ér, aa Aôndo shio kpa uumace vea fatyô u hemen ayol a ve. Kpa Mkaanem ma Aôndo kaa ér orumace nana fatyô u hemen iyol i nan ga. (Yeremia 10:23) Saa Tartor u Aôndo ua va ve ior vea de u eren mbagenev ican ye.

Nahan kwagh ne tese ér Aôndo wa ave ikyum ngu kenger ican i mbagenev ve eren ior laa? Ei. Nenge ase akaa ahar a a eren yô: Hiihii yô, ka a pon atsan a mbagenev ve eren ior la. U tesen ikyav yô, Mkaanem nam pase akaa a Yesebel yange er sha u wuan Naboti la. Bibilo shi pase ér ka tor u ageegh ugen, u a soo ér i fa un ga yô, a ne ve aeren a bo a ngara nahan a lu samber ye. (Yohane 14:30; 2 Mbakorinte 11:14) Bibilo pase ér ka Satan Diabolo a lu tor la ye. Er Aôndo a pon or u a eren ior afer shi a ne ve atsan la yô, ngu wasen se u palegh aferakaa. Nahan ngu kuran se ér se va zua a uma u tsôron ken hemen.

Kwagh u sha uhar yô, Aôndo wase se u lun a ishimaverenkeghen ser a va de u eren ior ican. Gbenda u yange pon Ahaba man Yesebel shi ôr ve ijir shi tsaha ve kua mbagenev kpishi, er ve nahan la, na se mba a vangertiôr ser iyange igen una tsaha mbaaferev cii, er a tende zwa nahan. (Pasalmi 52:1-5) Aôndo shi wase se u lun a ishimaverenkeghen ser, ica a gba ga tsô una bee a akaabo a ifer i ve mba un doo ve ishima a mi la cii. * Hen shighe la, orjighjigh Naboti vea ônov nav vea lu uma gbem sha won ken paradiso shin tar, ape ifer ia kera lu ga la.—Pasalmi 37:34.