Michelle: Sophia, u pande vee.

Sophia: Een, m sugh u.

Michelle: Doom kpishi er m kohol we her nahan. Kwa u yange m va heen ne, se hen sha kwagh u Aôndo, er ka sea yaan ican ve, ishima i lu un ker yô. * Nahan u kaa a mo wer, we kpa ú hen sha kwagh la hegen ica i gba, hemban je yô, hii shighe u yange mato gba a ngôu, vihi iyol kehelee la je. Tsô ngôu ngu nena hegene?

Sophia: Kwagh la, ka i va er guda ashighe agen, kpa ayange agen di shi i hide i vihi un iyol. Kpa nyian ne yô, a nder tsevaa.

Michelle: Se wuese Aôndo. Kwagh ka una za or wase iyol nahan se kpa ishima i mem se shimi ga cii.

Sophia: Kape i lu. Ashighe agen ka i gandem yô, m pine mer, kape una gbaa yan ican zan zan nee?

Michelle: Hanma or je kpa, imbakwagh ne ka i za nan iyol. Aluer u umbur yô, iyange i m va lam a we heen ne, cii man m yem yô, m pineu mpin mer, aluer Aôndo ngu a tahav mbu been a ican i yan yô, er nan ve a de ior ve lu yan icanaa?

Sophia: Een, m umbur.

Michelle: Kpa cii man se time sha mlumun u Bibilo i ne yô, de se hide se sav atôakaa kpuaa a yange se time sha mi la.

Sophia: Ka sha mi.

Michelle: Hiihii yô, yange se nenge er orjighjigh ugen u sha ayange a i ngeren Bibilo la kpa, pine er i hii ve Aôndo a de ér ior ve ya ican yô. Nahan kpa, Aôndo zôhô a na sha kwagh u pine la, shin kaa a na ér gba u una seer lun a jighjigh u nan ga.

Sophia: M vande fan kwagh la nahan ga cii, ka er yange u va pasem la m fa ye.

Michelle: Shi yange se nenge er ka sea yaan ican ve kwagh la a doo Aôndo ga yô. U tesen ikyav yô, Bibilo ôr kwagh u ior mba Aôndo mba ngise ér, “sha ican ve i yan la cii, Un kpaa lu yan ican.” * Ka kwagh u surun se ishima kpishi er se fe ser ka sea yaan ican i vihi Aôndo yô, shin ka nahan ga?

Sophia: Kape i lu.

Michelle: U masen yô, yange se kaa ser, er Aôndo u a gbe se la a lu agee kpishi yô, hanma shighe u i kom un cii una fatyô u been a ican i se lu yan la kera.

Sophia: Ka kwagh u a taver mo je la. Er nan ve Aôndo a lu a tahav mbu been a akaabo ne cii kera kpa, a de akaabo ne a lu za hemen here?

Michelle: U zuan a mlumun sha mpin wou la yô, de se hii nengen ken Genese u a lu takerada u Bibilo u hiihii la. Beem er u lan kwagh u Adam man  Ifa, mba yange ve ya kom u i ta ve icin sha mi la ga yô?

Sophia: M lan ga, yange i tesem kwagh ve ken adua u anmbayev. Aôndo yange kaa a ve ér ve de ye kon ugen la ga, kpa ve taver ityough ve ya.

Michelle: Kape i lu vough je la. Nahan de se nenge ase er yange i hii ve Adam man Ifa hingir u eren isholibo yô. Aluer se fa kwagh u yange na ve, ve hingir u eren isholibo yô, se kav er i hii ve se lu yan ican yô. Ôr ase Genese ityough 3, ivur i sha 1 zan zan 5.

Sophia: Ka sha mi. “Iyô yô, i hemba inyamtoho i TER Aôndo er la cii atseregh. I kaa a kwase la er: Ka mimi je, Aôndo kaa er, né de ye atam a ma kon u ken sule ne gaa? Tsô kwase la gema kaa a iyô la er: Atam a ikon i ken sule ne yô, i rumun er se̱ ya, kpa atam a kon u u lu hen atô sule la yô, Aôndo kaa er: De ye nen ga, ave tsô kpaa, de benden nen sha min ga, sha er né kpe ga yô. Tsô iyô kaa a kwase la er: Né kpe je ga; gadia Aôndo fa iyange i né ya a la, iyange la ashe aa bugh ne, né hingir er Aôndo nahan, né gba fan kwagh u dedoo man kwagh u bo.”

Michelle: M sugh u. De se time ase sha avur ne kpase yôô. Hiihii yô, iyô i va lam a kwase la, ka Ifa je la. Ivur Bibilo igen pase ér yange lu Satan jighilii lu lamen a Ifa sha ikyev i iyô la ye. * Satan pine Ifa tindi u Aôndo wa ve sha kwagh u kon ugen yô. U nenge a kwagh u Aôndo yange kaa ér aluer vea ya kon la ve una er ve la kpa?

Sophia: Ér vea kpe.

Michelle: U kaa vough. Tsô Satan gba wan Aôndo mbaaie iyol er kwaghôron na u dondon la a tese nahan. Nenge ase kwagh u yange ôr ne, a kaa ér: “Né kpe je ga.” Satan lu kaan ér Aôndo ka oraie!

Sophia: I lu je m ngu a ungwa kwagh u Adam man Ifa la i nyôr nahan ga.

Michelle: Satan yange yilan Aôndo ér ngu oraie yô, Satan va a ikyaa i gba u shighe a kar cii ve a kure i yô. U nenge a ityôkyaa ve ga̱?

Sophia: Beem ga.

Michelle: Too, me tese ikyav nahan tsô alaghga a wanger we. Tôô wer, m va kaa a we mer m hemba ngun a agee a we. U er nan ve u tesem wer, u gandeme?

Sophia: Se kar iyol se nenge.

Michelle: Ú kaa vough. Alaghga se kaa ser ityough ki her, se kera kar idyer sha inyu ga, nahan de se ker ma kwagh u a yoho yô, se nenge or u nana fatyô u kôron kenden a mi la. U fan or u nan hembe lun agee ka kwagh u ican ga.

Sophia: M nenge a kwagh u ú lu ôron kpaa.

Michelle: Kpa aluer se gba anyiman ka sha kwagh u ageegh ga, kpa ka sha kwagh u inja i mimi ye? Tôô ase wer, m kaa a we mer, m hembe eren kwagh sha mimi a we. Ikyaa ingira nahan se fatyô u kuren i fele je kpa?

Sophia: A taver.

Michelle: Sha ci u, inja i mimi ka kwagh u a kar di or sha ankwagh u kpuaa tsô maa a fa inja i nan vindi vindi ga.

Sophia: Ka mimi.

Michelle: A gba u se de shighe a kar tsembelee, ior vea lu nengen ieren yase ve á fa or u nan hembe lun a mimi iyol ken atô wase ye.

Sophia: U ôr ka mimi.

Michelle: Ka sha mi, nahan shi nenge ase kwagh u i er ken Genese ne. Satan yange kaa ér un hemba Aôndo agee?

Sophia: Ei.

Michelle: Yange una er nahan yô, Aôndo ma tese un her ave ave je er un hembe un agee yô. Kpa, Satan gema kaa ér un hemba ngun a inja i mimi a Aôndo. Inja na yô, lu kaan a Ifa ér, ‘Aôndo ngu tsughun we a tsugh, ka mo m lu ôron we kwagh u mimi’ ye.

Sophia: Kwagh ne wanger!

Michelle: Er Aôndo a hembe kwaghfan cii yô, yange nenge ér gbenda u ú hembe doon u a kure ikyaa ne yô, ka u den ér shighe a kar ve. Shighe a karen yô, kwagh la una due ken igbar wang, a fa or u yange nan lu ôron kwagh u mimi man u yange nan lu eren aie la.

Sophia: Kpa er Ifa yange kpe nahan je kpa, tese ér lu Aôndo lu ôron kwagh u mimi ga zee?

Michelle: Se fatyô u kaan ser tese. Kpa kwagh u Satan ôr la hemba heela. Hide nenge ivur i sha 5 la. U nenge a kwagh ugen u Satan yange ôr a Ifa la kpa?

Sophia: A kaa ér aluer a ya ityamegh ki kon la yô, ashe na aa bugh.

Michelle: Tseegh ga, shi ér una hingir “er Aôndo nahan, [una] gba fan kwagh u dedoo man kwagh u bo.” Inja na yô, Satan lu kaan ér Aôndo ngu yeren uumace a kwagh u dedoo.

Sophia: Aahoo!

Michelle: Man kwagh la kpa lu ikyaa i kiriki ga.

Sophia: U ôr nahan u ver ishigh wer nyi?

Michelle: Inja na yô, Satan lu kaan ér aluer Aôndo ngu hemen Ifa, shin uumace mbagenev ga yô, a hemba kpen ve iyol. Sha ikyaa ne kpa, Yehova nenge ér gbenda u ú hembe doon u kuren i yô, ka u nan Satan ian sha u a tese er á hemba kpen uumace iyol a Aôndo shio yô. Nahan Aôndo na Satan ian ér a̱ hemen ase tar ne. Kwagh la pase ityôkyaa i i ne ve, se lu nengen ior ve lu yan ican nyian kpishi yô. Ka sha ci u ka Satan á lu hemen tar ne ye, ka Aôndo ga. * Nahan kpa, loho u dedoo ngu sha kwagh ne.

Sophia: Loho shon ér nyi?

Michelle: Bibilo tese mimi mba uhar mba doon tsung mban sha kwagh u Aôndo. U hiihii yô, ka sea yaan ican nahan, i za Yehova iyol. U tesen ikyav yô, nenge ase mkaanem ma Tor Davidi yange ôr ken Pasalmi 31:7 ne. Davidi yange ya ican kpishi, kpa nenge ase kwagh u yange ôr ken msen u er hen Aôndo la. Ôr ase ivur la yôô.

Sophia: Ka sha mi. I̱ kaa ér “Me ember, me ember tsung sha erdoo Wou, gadia U nenge ican yam, U fa er i lu zan uma wam iyol yum yô.”

Michelle: Er Davidi ya ican nahan kpa, yange fe ér Yehova ngu nengen hanma ican i un lu yan cii yô, kwagh la sur un ishima. Er Yehova a fe hanma kwagh kua ijungwen i ken atô u ishima yase, í alaghga mbagenev vea fa ga la nahan, doo u ga he?

Sophia: Kai, doom yum!

Michelle: Mimi u doon tsung u sha uhar la ér, Aôndo una de ér ior ve gbaa yan ican nahan zan zan gbem sha won ga. Bibilo tese ér ica a gba ga tsô, Aôndo una kar a hemen u Satan u bo ne kera. Una hide a sôr akaa a vihin a a lu eren hegen ne cii vindi vindi, kua ican i we man mama wou ne lu yan ne kpaa. Lahadi ua ve ne me hide me va pase u ityôkyaa i se fatyô u lun a vangertiôr ser ica a gba ga tsô, Aôndo una bee a ican i yan cii kera yô. *

Sophia: Ka sha mi!