Ken tartor u Roma la cii, ior kpishi yange i kôron ve ikpan sha agee, shin shighe u i hembe ve ityav yô. Mba yange a̱ kôr ve la, i tee ve, nahan ve kera tsa ve hide hen ya, shin ve nenge a tsombor ve ashe ga.

Ikpan kpishi yange i kpe sha tom u dughun akaa a injaa shin inya, kpa ikpan i í eren tom sule man i ityom i hen ya cii, yaan ican nahan ga. Yange i har kpan isha i iyôugh sha mon, i nger sha mi ér, aluer nan yevese, man or za kôr nan hide a mi yô, a na or u nan hide a kpan la injar. Kpan yange nana zer gban toho gbem yô, i gber nan ikyav sha icul, man ashighe kpishi ikyav la i lu ishangebaacaa i F, sha ityough ki ishember i ken zwa Buter i í yer ér fugitive la, inja na yô ér, or u gban toho.

Takerada u Filemon pase er apostoli Paulu yange hide a Onesimu, kpan u yevese la, hen orvesen na, Filemon yô. Shin er Filemon lu a ian i tsahan Onesimu coholoo nahan kpa, Paulu kaa a Filemon ér a̱ “lumun un,” gadia Paulu vea Filemon ve lu ijende, shi ve doo ayol a ve.—Filemon 10, 11, 15-18.

Yange i fa tar u Fenishia u tsuaa, u ngise u lu ape tar u Lebanon u lu hegen ne sha kwagh u icigh ki nyian dindee ki wan sha akondo a í tumen hen gar u Tiru la. Tor Solomon u hemen tar u Iserael u tsuaa la yange wuha tempel na iyol kimi sha “ikyondo i nyian dindee,” i yange or u tumen akondo ugen ken gar u Tiru tume yô.—2 Kroniku 2:13, 14.

Icigh ki nyian dindee ki wan sha akondo, ki i eren hen gar u Tiru la lu ki hemban doon sha ayange la. Ityôkyaa i vesen i yange na ve ki hemba doon yô, lu gbenda u i eren ki sha ican la. Mbakôronishu yange ve hii kôron akôôr, shin utamkôôr kpishi shin zegemnger, sha ci u yange i gba u a er icigh ki wan sha ikyondo i môm tseegh sha akôôr a kuman er 12,000 nahan. Yange a kôron akôôr ne cii yô, i dugh a i kam, icigh kin ki due. Mba eren icigh kin yange vea dughun ki yô, ve nungwa bar sha mi, ve tsen sha oo ayange atar. Maa ve kura ve haa shin uzwar, ve wa mngerem ma shin ityeku sha mi, ve jiir ayange imôngo.

Shighe u tar u Fenishia lu eren kpenga a ityar kposo kposo shi hemen ityar igen anyom uderi imôngo la cii, ior i Fenishia za hemen u teen akondo a nyian dindee, a í tumen ken gar u Tiru la. I zua a akondo a nyian dindee a sha ayange a tsuaa la sha ajiir a a lu hen Zegemnger u Mediterenia la, er hen gar u Cádiz, ken tar u Ishpania la nahan.