Anthony: Tim u nder vee? Doom kpishi er nyian kpa m zough ishigh a we yô.

Tim: Mo kpa doom u nengen a we.

Anthony: M va u a Iyoukura man Awake! u he. M hen mer umagazin mban vea doo u kpishi.

Tim: M sugh u. Doom kpishi er u ve hen mo nyian yô, sha ci u m ngu a mpin.

Anthony: Doo, ka nyi?

Tim: Iyange igen la, m ôr orgen u se eren tom ijiir i môm, er ityakerada i yange u nam la i doo yum yô. Kpa a kaa ér mo m de er i ga, sha ci u Mbashiada mba Yehova na Yesu jighjigh ga. Ka mimii? Yange m kaa mer kwagen u va yô, me pine u.

Anthony: Doom kpishi er u pinim, u za ker u fan ma ijiir igen ga, u pin Orshiada u Yehova jighilii yô. U pine or kwagh u nan ne jighjigh a mi ga nahan, u fa kpa?

Tim: U fa ga.

Anthony: Fa wer, Mbashiada mba Yehova na Yesu jighjigh. Me yer u ga, jighilii yô, saa or a na Yesu jighjigh ve nana war ye.

Tim: M hen je mer ne na Yesu jighjigh, kpa ka er yange orwam u hen ijiirtom la kaa a mo ér ne na Yesu jighjigh ga ve, hangem u fan ye. Kam er i lu je se mba a lam sha kwagh shon ga nahan.

Anthony: M tese u avur a Bibilo a a pase er u nan Yesu jighjigh la i lu kwagh u hange hange yôô? Ka avur a Bibilo a ashighe kpishi Mbashiada mba Yehova ka ve pase ior kwagh a mi yô.

Tim: OK.

Anthony: Se hii ase sha mkaanem ma Yesu ma i nger ken Yohane 14:6 la je. Ka kwagh u Yesu ôr, shighe u lu lamen a apostoli na ugen yô. I nger ér: “Yesu kaa a na er: Mo M ngu gbenda man mimi man uma kpaa. Ma or gbe van hen Terem ga, saa nana kar her a Mo.” Mkaanem man kaa ér saa se kar han ve se za hen Tere?

Tim: Saa hen Yesu.

Anthony: U kaa vough. Mbashiada mba Yehova na kwagh la jighjigh tôô ave sha. De m pine u kwagh: Sha kwagh u ú fe atindi a Aôndo a tese yô, shighe u or lu eren msen la, ka ken iti i an i gbe u nana er msene?

Tim: Ka ken iti i Yesu.

Anthony: Kape i lu vough je la. Ka nahan ve, hanma msen u m eren cii, ka m er ken iti i Yesu ye. Kape Mbashiada mba Yehova ve eren mbamsen vev cii ken iti i Yesu je la.

Tim: Doom kpishi er m fe kwagh ne yô.

Anthony: De se time sha ivur Bibilo igen kpaa, ka Yohane 3:16. Ivur Bibilo la ngi hange hange je mbagenev kaa ér ka an-ishember u tiônôô, u a pase hanma kwagh u Yesu vindi vindi yô. Inja na yô, i tôô hanma kwagh u i nger sha kwagh u uma u Yesu shin tar ne kua tom na u pasen kwagh la cii, i ôr ken ivur ne. Wea soo yô, ôr.

Tim: OK. I kaa ér: “Gadia tar ne doo Aôndo ishima je, nahan A na Wan Na u môm môm la sha er anti or u nan ne Un jighjigh yô, nana̱ de timin ga kpa nana̱ zua a uma u tsôron.”

 Anthony: M sugh u. U vande ungwan ivur Bibilo nee?

Tim: Een, mba er i ken côôci yam kpaa.

Anthony: Ka ivur Bibilo i ior kpishi ve fe yô. Aluer u nenge sha ivur Bibilo ne dedoo yô, Yesu kaa ér: Mdoo u uumace ve doo Aôndo ishima la na yô, a er kwagh u uumace vea zua a uma u tsôron yô; kpa saa se er nyi?

Tim: Saa se na jighjigh.

Anthony: Een. Saa se na Yesu Kristu, Wan u môm môm la jighjigh. Man i ôr kwagh u i kaa ér jighjigh u nan Yesu una bugh se gbenda u zuan a uma u tsôron la sha peeji u sha 2 u magazin u m ve u a mi ne. A pase awashima u Iyoukura la ér, dugh akaa agen sha yô, magazin ne shi “taver ior asema ér ve̱ na Yesu Kristu jighjigh, un u a kpe sha u se̱ zua a uma u tsoron, shi a lu hemen ken Tartor u Aôndo hegen la.”

Tim: Kwagh u ú erem ne ka aie ga. Ken magazin wen ne je kpa i tese ér Mbashiada mba Yehova na Yesu jighjigh.

Anthony: Kape i lu vough je la.

Tim: Man er nan ior ve kaan ér ne na Yesu jighjigh ga?

Anthony: Atôakyaa nga kpishi. Shighe ugen ior ka ve ôr nahan sha ci u ve ungwa mbagenev ôr. Shi mbagenev di yô, ka i lu mba ve hemen kwaghaôndo ve la ka ve pase ve kwagh wase sha mimi ga ye.

Tim: Tile, alaghga tsô ka er ne yer ayol a en ner Mbashiada mba Yehova, i lu Mbashiada mba Yesu ga ve mbagenev ka ve kaa ér ne na Yesu jighjigh ga ye.

Anthony: Ngura kpa a fatyô u lun ityôkyaa igen.

Tim: Er nan ne hemban ôron kwagh u Yehova?

Anthony: Ityôkyaa i môm yô, se na jighjigh ser gba hange hange u se yilan Aôndo sha iti na i Yehova la, di vough er Yesu, u a lu Wan la eren nahan. Nenge ase kwagh u Yesu ôr shighe u lu eren msen hen Ter na ne. I nger kwagh shon ken Yohane 17:26. U fatyô u ôron ivur shonoo?

Tim: Een. “M pase ve iti You; Me shi Me pase ve i kpaa; sha u dooshima u M doo U la, a̱ lu ken a ve, Mo kpaa M̱ lu ken a ve yô.”

Anthony: M sugh u. Fa wer Yesu kaa ér un pase ior iti i Aôndo. U hen wer lu nyi i̱ na ve er nahana?

Tim: Hmm. M fa ga.

Anthony: Yô, de se ôr ivur Bibilo igen i i te iwanger sha ikyaa ne yô. Ka Aerenakaa 2:21. Ijiir la kaa ér: “Hanma or u nan yer sha iti i Ter (ka Yehova je la) yô, nana war.” Hegen m fa, u lumun wer aluer gba u saa or a yila sha iti i Yehova ve nana war yô, Yesu fa nahan je ka u henen a hen ga.

Tim: Een, kape i lu je la.

Anthony: Inja na yô, kwagh u myom u mbadondon Yesu la lu ityôkyaa i môm i i na ve hange un kpishi u ve fa iti i Aôndo shi ve yilan un sha i yô. Shi ka ityôkyaa i vesen i i ne ve se hemban ôron kwagh u Yehova je la. Se nenge ser gba hange hange u se fa iti i Aôndo, shi se wase mbagenev kpa ve yilan un sha iti shon.

Tim: Kpa aluer ior fa iti i Aôndo ga shin mba yilan un sha iti na jighilii ga kpa, zum u ve yer ér Aôndo yô, ka ve fa or u ve lu ôron kwagh u nan yô.

Anthony: A fatyô u lun nahan. Nahan kpa, er Aôndo a pase se iti na yô, kwagh la na kera taver se u kporom hen a na ga.

Tim: U ver ishigh wer nyi?

Anthony: Hen ase sha kwagh ne: Yange a pase se iti i Mose ga kpa ma i lu se kwagh ga. Ma se gbe fan tsô ser ka or u yange pav Zegemnger u Nyian shin or u yange za ngohol Atindi a Pue la.  Noa kpa nahan, er nan ve se fe iti na? Ma i gbe ôron se kwagh na tsô ér ka ôr u yange gba tso shi war tsombor na kua annyamev yô. Heela tseegh ga, Yesu Kristu kpa ma i gbe ôron se kwagh na tsô ér ka or u yange sen sha va kpe sha ci u asorabo a ase yô. Ka nahanaa?

Tim: M hen nahan.

Anthony: Kpa Aôndo soo ér se fa ati a ior mbara kpôô kpôô. Er se fe ati a ve yô, ka se hemba nengen a mimi u kwagh u Bibilo i er sha kwagh ve la cii. Shin er se nenge a Mose shin Noa shin Yesu ishigh a ishigh ga nahan kpa, er se fe ati a ve yô, se nenge ser yange ve lu kpôô kpôô.

Tim: M fa nahan ga, kpa m zua a mi!

Anthony: Nahan ka ityôkyaa igen i i ne ve Mbashiada mba Yehova ve hemban yilan Aôndo sha iti na i Yehova la je la. Se soo ser se wase ior ve seer nan Yehova Aôndo jighjigh, ér ngu Or u se fatyô u zan ikyua a na yô. Shi se mba er kwagh sha kwagh u tom u Yesu a er sha u yiman se la kpoghuloo. Se fatyô u shi ôron ivur Bibilo i môm i suen kwagh ne.

Tim: Ka shami.

Anthony: Se vande ôron Yohane 14:6. Umbur, Yesu kaa ér un ngu “gbenda man mimi man uma kpaa.” Hide ase sha ijime kpuaa, ôr kwagh u a er ken Yohane 14:1 la. Ôr kwagh u Yesu a er ken vegher u masetyô u ivur shon la.

Tim: OK. I̱ kaa ér: “Na nen Aôndo jighjigh, Mo kpaa nam nen jighjigh.”

Anthony: M sugh u. Er Yesu a kaa nahan, u nenge wer aluer or na Aôndo jighjigh, kpa Yesu yô, nan na un jighjigh ga, shin nan na Yesu jighjigh kpa nan kera na Aôndo jighjigh ga nahan, jighjigh u nan la ka u mimii?

Tim: Ei. Yesu kaa ér gba u se na Aôndo jighjigh, shi un kpa se na un jighjigh.

Anthony: U kaa vough. Shi m fa, we kpa u nenge wer u kaan ser se na Aôndo kua Yesu jighjigh la tseegh kuma ga. Gba u se eren kwagh ken uma wase u tesen ér se na ve jighjigh.

Tim: Kape i lu vough je la.

Anthony: Kpa ka nyi jighilii or a er ve a tese ér nan na Aôndo kua Yesu jighjigh sha mimi? Se time sha mpin ne kwagen. *

Tim: A doom kpishi.