YANGE ior mbagenev za u za nengen akaa hen ijiir igen, tsô ijen za kôr ve. Er ve lu zenden nengen akaa a mbayiase a ken gar u Betelehem u tsuaa la yô, ijen kôr ve tsung, nahan ve soo ér vea kar yan kwaghyan u i ye hen ijiir la yô. Or ve ugen nenge a ijiir igen i teen akpekpa u igbor-ahi, u ka i er i wa tomato man alabusa kua ikyaiue sha mi, i na ior kua bredi u yan sha mi yô. Mba za ye kwaghyan la yô, ve seer zuan a agee, nahan ve za hemen u ningir ken gar la, nengen akaa.

Ken akaa a mbayiase a iorvannya mban nenge a mi sha iyange la cii, lu bredi u taver ishe ga u ve ya la hemba lun kwagh u ngise, ken ijime ica ye, kpa ve fa ga. Inja i iti i Betelehem la ér “Iyou i Bredi,” shi ka ijiir i i ndera kaan bredi her anyom udubu imôngo yô. (Rutu 1:22; 2:14) Bredi u ior mbara ya la ka môm ken akaayan a ior ve ye hen gar u Betelehem nyian yô.

Kwase u Aberaham, Sara, yange kaa “masa” shin bredi, na mbavannya mbagenev utar, mba ve va ve inya abur abur, shighe u ve tema twev ikyua a Betelehem, vegher u ken imbusutariyan la yô, man kwagh ne er anyom kar hegen nôngo u kuman dubu unyiin. (Genese 18:5, 6) Alaghga “mwem ma kengese” ma Sara kaa bredi a mi la lu ma i er sha alakema shin shair yô. Yange gba u Sara una kaa bredi la fese, man adooga je yô lu sha awen a tseen je kaa mwem ma i hôr la ye.—1 Utor 19:6.

Kwagh u Bibilo i er ne tese ér ior mba hen ya u Aberaham wuan mwem ma bredi shi ve kaan bredi ve ayol a ve. Er ve teman twev hen ijiir i môm gbem ga yô, tese ér alaghga Sara man mbashiren un kaan bredi sha atse a ior kpishi kaan bredi sha mi hen gar u Ur, u lu ya u Sara la ga. Sara eren mwem ma kengese sha isham uiyia i hen hanma ijiir i ve tem twev yô. Kwagh ne yange una lu zege tom u i eren un sha an-nase u kiriki man anishwa, kua sha lu man tor u kumen kwagh a mi yô.

Anyom deri unyiin nga kar yô, Tindi u Mose kaa ér i de ngohol nase shin anishwa sha ityungu ga, gadia lu sha akaa ne i koson “uma u or je” ye. (Duteronomi 24:6) Aôndo yange nenge ér nase man anishwa ka akaa a hange hange sha ci u a á shio yô, mba hen tsombor vea fatyô u eren bredi hanma sev, koson ayol a ve ga.—Nenge ngeren u kiriki u a lu a itinekwagh ér “ Mwem ma I Wuan Hanma Sev man Bredi u I Kaan sha Ayange a Tsuaa La.”

I ter ishember i bredi la ajiir kpishi ken Bibilo je kuma er 350 nahan, shi mbangeren Bibilo ter bredi sha ityough ki kwaghyan sha ajiir kpishi. Yesu tese mbacivir Aôndo u eren msen vangertiôr ér: “Na se kwaghyan * wase nyian u a lu sha ci u ayange ayange la.” (Mateu 6:11) Ishember i ken zwa Grika i í gem ér “kwaghyan” la ka bredi, shi i̱ tile sha ityough ki hanma injakwaghyan cii. Sha nahan yô, Yesu tese ér se fatyô u suur sha Aôndo ser a naan se kwaghyan ayange ayange.—Pasalmi 37:25.

Nahan kpa, kwagh u vesen ugen ngu u a hembe bredi shin kwaghyan yô. Yesu kaa ér: “Ka sha bredi tseegh or á lu uma ga, kpa ka sha hanma kwaghôron u a dugh sha zwa u Aôndo yô.” (Mateu 4:4) Yesu lu ôron kwagh u shighe u Mbaiserael lu a kwaghyan môm môm ga ve Aôndo lu koson ve la. Kwagh ne hii shighe u ve due ken Igipiti ica lu a gba ga la je. Ve za haa afo hen deserti u Senai, shighe kar er uwer môm nahan, maa kwaghyan ve hii u been. Er ve nenge ashe ver ikyôr a vea kpe ijen ken taaikyôngo u ombor la yô, ishima nyian ve kpishi, tsô ve gba eren  ivever kaan ér: “Se yaan bredi” ken Igipiti kuman se.—Ekesodu 16:1-3.

Bredi u ken Igipiti yange doo je ka u henen a hen ga. Sha shighe u Mose la, mbakaan bredi naan Mbaigipiti ubredi kua ukyeeke atô kposo kposo. Kpa Yehova wa ishima ér una kende ior nav a kwaghyan shio ga. A tôndo zwa a ve ér: “Me er kwaghyan una due Sha una haa ne shin inya.” Kper nan pepe yô, kwaghyan u due sha ne cir hen inya, “lu ipe vegh vegh ndahar er ishwa nahan.” Er Mbaiserael vande nengen a mi ga yô, ve pine ér “ka nyi ne?” Mose pase ve ér, “ka kwaghyan u TER A ne ne, er né ya je ne.” Nahan ve yila un ér mana, * shi ve koso ayol a ve sha mi anyom 40.—Ekesodu 16:4, 13-15, 31.

Mana u i na Mbaiserael sha ivande ne yange una doo ve sha hiihii la je a zua ga. Lu ken zwa er “mumuyough” nahan, shi hanma or kuran un sha mye u nan. (Ekesodu 16:18) Ica i gbe ga yô, gba saren ve u yan akaa atô kposo kposo, a ve yaan ken Igipiti la. Nahan ve vaa ican, ve kaa ér: “Se mba gbe nengen di a mana ne tseegh tsô.” (Numeri 11:6) Maa ve mough ayôôso ér: “Kwaghyan u injaa ga ne, due se ishima.” (Numeri 21:5) Ken masejime yô, “ruam u Sha” ne de ve ishar.—Pasalmi 105:40.

Kwagh u Mbaiserael la tese wang ér bredi shin kwaghyan una fatyô u duen se ishima fese. Kpa Bibilo ôr kwagh u bredi u injaa ugen u i gbe u se laha ga yô. Bredi u Yesu tôô kar sha mana u Mbaiserael venda sha ilyahan ne una fatyô u nan se mbamtsera mba vea bee mayange ga yô.

Yesu kaa a mba lu tesen ve la ér, “Mo M ngu kwaghyan u uma. Uter enev ya mana ken taaikyôngo, kpa ve kpe. Ngun ka kwaghyan u a sen Sha je ne, sha er anti or u nana ya un yô, nana kera kpe ga yô. Mo M ngu kwaghyan u uma u a sen Sha la; aluer anti or nana ya kwaghyan ne yô, nana lu uma gbem sha won. Man kwaghyan u Me na yô, ka iyol Yam je, sha ci u uma u tar.”—Yohane 6:48-51.

 Ior mba Yesu lu tesen ve la kpishi kav inja i ishember i “kwaghyan” shin bredi, man ishember i “iyol,” i Yesu ôr sha injakwagh la ga. Nahan kpa, injakwagh la kôr tsô. Mbayuda koson ayol a ve sha bredi ayange ayange, di vough er Mbaiserael kpa koson ayol a ve sha mana ken anyom 40 a ve tsa ken deserti la nahan. Shin er mana lu iyua i i due hen Aôndo nahan kpa, yange na ior uma u tsôron ga. Kpa nagh ku Yesu yô, na mba ve ne un jighjigh la cii iyua i uma u tsôron la. Nahan Yesu ngu “kwaghyan u uma” mimi.

Alaghga ka u ya bredi shin kwaghyan shighe u ijen i ker u yô. Nahan u fatyô u sughun Aôndo sha “kwaghyan” u ú ye ayange ayange la kpaa. (Mateu 6:11) Er ka sea ya kwaghyan u dedoo ve i doo se nahan, mayange mtsera u Yesu Kristu, u a lu “kwaghyan u uma” una na se la a de hungur se ga.

Se tese ser bredi shin kwaghyan u dedoo ne gba se kwagh nena ve se lu kposo a Mbaiserael mba sha ayange a Mose mba ve lu a i iwuese ga laa? Yesu kaa ér, “aluer Mea doo ne ishima yô, né kuran atindi Am.” (Yohane 14:15) Aluer se mba kuran atindi a Yesu yô, se lu a ishimaverenkeghen i va yan bredi er se soo la gbem sha won.—Duteronomi 12:7.