ER I HII VE I TAVER MBAGENEV U NAN JIGHJIGH A KWAGH NE YÔ: Ior kpishi hen ér Aôndo nengen uumace ér ka mbaasorabo, mba wang ga shi ve kuma u una na ishima sha kwagh ve ga. Kwase ugen ken tar u Amerika, u i yer un ér Kendra, u ngise ya ican a angev mbu ken ityou, mbu vihin ishima dang dang yô, yange ya ibo ken ishima na tsung sha ci u faantyô u kuran atindi a Aôndo vough ga. Sha ityôkyaa ne yô, a kaa er, “yange m de msen u eren.”

KWAGH U MKAANEM MA AÔNDO MA TESE YÔ: Yehova ka a kenger we, a nenge ape mba mbamshi ou ve dugh la, nahan a fa or u ú lu jim jim la. Bibilo kaa ér, “A fa mlu wase, A umbur er se lu vuulevu je yô.” Heela tseegh ga, ne se injar “sha aferakaa ase la kpaa ga,” kpa ngu a de se asorabo, a umbur er se lu vuulevu yô.—Pasalmi 103:10, 14.

Hen ase sha kwagh u Davidi, tor u Iserael u sha ayange a tsuaa, u se er kwagh na ken ngeren u hiihii la. Yange er msen kaa a Aôndo ér: “Ashe a Ou nenge ijenawambe yam, man i nger a ken ruamabera Wou cii, . . . Tôv kwagh wam, Aôndo, fa ishima yam, karem, fa mbamhen av.” (Pasalmi 139:16, 23) Sha kpôô yô, Davidi yange na jighjigh vangertiôr ér, shin er yange un er kwaghbo, ashighe agen i lu kwaghbo u vesen nahan cii kpa, Yehova a nenge er un gem ishima sha mimi yô.

Yehova fa mlu wou hemba hanma or cii. Bibilo kaa ér, “Or nengen mluashe u ken won, kpa TER yô, nengen ken ishima.” (1 Samuel 16:7) Aôndo fa er i hii ve u lu a ieren you la yô, a fa er i lu gbenda u i jire u ken uya, shi i yese u, man ijiir you kua injaor u i lu la cii i ne u lu or u ú lu la yô. A fa imbaor i u lu nôngon wer u lu la, shi iniôngon you la gba un kwagh, shin er ka u er akaa a shin nahan kpaa.

Nahan kpa, Aôndo ka una fa ‘or u ú lu jim jim’ la nahan, a suru u ishima sha mfe na u hemban cii la nena?