Yange i fa kwase ugen u lun anyom 35 hen gar u Dhaka, ken tar u Bangladesh, ér ngu kwase u lun a dooshima shi wan ior ikyo tsembelee. I yilan un ér Smita. * Ior fa un ér ngu kwase u eren tom kpoghuloo shi lu kwaseya u sar sar, u i sember vôson un, u fa kwagh u Aôndo, nahan soo ér una wase mbagenev kpa ve zua a mfe na la yô. Nahan kpa, angev va kôr Smita kpoo, tsa kuma kasua ga tsô maa kpe je. Kwagh ne cier tsombor na man azende a na iyol kpishi!

Gumor ugen u lun anyom 30 kar, u i yilan un ér James yô, vea kwase na u lun anyom 30 kar, kpa i fa ve er Smita nahan. Yange ve mough sha shighe u iceenyolough ne ve za hen azende a ve, vegher u shin ityôtar i tar u Amerika la. Kpa ve kera hide hen ya ve, gar u New York uma ga. Shighe u ve lu ken zende la, mato ve za er aikyôr u vesen, nahan kera lu u ior vev kua mba ve eren tom ijiir i môm a ve la cii vea nenge a ve ken uma ve ga.

Saa se hide se za ôr kwagh u ken ijime ica ve se fa ser kwaghbo man ican i yan dumbur nyian ga. Ityav mbi wuan ushoja kuan mbaaderapupuu kpaa. Mba tswamen ior mba dedoo shi eren ve aferakaa. Uaikyôr mba wuan ior shi iangev mbi guren mbaganden kua mbayev man mbanyarev kua mbaatsanev cii. Uaahe mba eren vihin ajiir caver caver. Ieren i nyaghen mbagenev la man msange u sha dooshima samber sha tar wuee. Alaghga we iyol you kpa akaa ne nga eren we.

Ior kpishi ka ve pine mbampin er mban nahan, ér:

• Er nan akaabo a eren ior mba dedoo?

• Ka Aôndo a war a na sha ambaakaa ne yee?

• Aahe ka a gba eren abu tsô shinii, ka u uumace ka ve na a ere?

• Ican i ior ve ye la ka karma, inja na yô, ka mba yange ve er akaabo cii ve kpe la, i hidi i mar ve ve lu yan ican sha akaabo a ve la nyian yee?

• Aluer Aôndo uhembanagee ngu yô, er nan a kuran ior mba dedoo sha shighe u aahe ga?

• A tsa nahan kwaghbo man ican i yan a bee sha won kpa?

Kwagh u se er ve se na mlumun sha mbampin mban yô, a gba u se kav mbamlumun mba sha mbampin mba hange hange mba uhar mban: Er nan akaabo a eren jimi, man Aôndo una va er a kwaghbo nena?