Davidi yange kaa ér Aôndo keghen ato a na shin umbur un nahan lu mimii? Aôndo keghen ato a wee? Ior kpisi ka i taver ve u nan jighjigh ér kwagh gba Aôndo uhembanagee sha kwagh ve. Sha ci u nyi?

Ityôkyaa i môm yô, Aôndo hemba uumace yem zende zende. Er a lu sha yô, ka inja er akuraior a sha won cii nga sha ishigh nagh “er ibeelegh ki mngeregh ki ki lu shin ikya yô, man er ihyundu i puer i i hee sha iyôgh ki karen kwagh a mi nahan.” (Yesaia 40:15) Orngeren takerada ugen sha ayange ase ne, u un kpa i taver un u nan jighjigh ér Aôndo uhembanagee la wa uumace ikyo yô, kure ikyaa ér “u nan jighjigh ér Aôndo u kwagh a gbe un a uumace yô ngu, shi we ve ikyo ayange ayange la ka zege ihyagh i kaan i gbilinigh kpishi.”

Shi kwagh ugen yô, aeren a ior mbagenev ka a na ve hen ér kwagh tsô kpa gba Aôndo sha kwagh ve ga. U tesen ikyav yô, orgen u a beeyol akuma a kuma yô, kaa ér, “hanma shighe yô, yange m er msen mer, ma m lu or u bem man or u kôron iyol tsaha, kpa ica i gba ga tsô maa ishimavihin yam i hide her gedee. Ken masejime yô, m va kure ikyaa mer, m ngu iferor u numben a mi ga man shi Aôndo kpa soo u wasen mo ga.”

Aôndo gba ica a vese je ka u ma yange una fatyô nengen ma kwagh u se eren gaa? Aôndo nengen uumace mba ve yen yum ne nena? A lu Aôndo na or mpase ga yô, orumace môm u nana na mlumun sha mbampin mbera sha ci Aôndo kpa je kpa nan ngu ga. Nahan cii kpa, loho u Aôndo a ne i nger hen se uumace, ka Bibilo je la, na se ibumun ér, Aôndo ngu ica a uumace ga shi kwagh gba un sha kwagh uumace ga ze. Jighilii yô, Bibilo kaa ér, “Aôndo ngu ica a hanma wase ga.” (Aerenakaa 17:27) Ken ngeren mba unyiin mba ve dondo ne, se time sha ityôkyaa i Aôndo a kaa a vese ér, kwagh u ior asange asange gba un ishima la, man er a tese ior kpôô kpôô er we nahan, ér kwagh ve gba un ishima yô.