Yehova Aôndo soo ér se lamen a na gbar gbar hanma shighe sha kwagh u a ze se iyol yô. (Luka 18:1-7) Keghen ato a vese sha ci u kwagh wase gba un ishima. Er Ter wase u sha la a ne se ian i lamen a na ken msen sha dooshima nahan, a er nan ve se lumun u eren nahan ga?—Ôr Mbafilipi 4:6.

Msen ka gbenda u pinen iwasen tseegh tsô ga. Kpa msen wasen se u kporom hen Aôndo. (Pasalmi 8:3, 4) Ka sea pasen Aôndo asema a ase hanma shighe yô, se seer lun a na kôôsôô.—Ôr Yakobu 4:8.

Aôndo soo ér, zum u se lu eren msen yô, se zer kimbir kwagh môm gbem, shin ôron akaa ser ior ve ungwa ga. Shi a ver a ver gbenda u u hembe doon u se tile ve se er msen ga. (Mateu 6:7) U tesen ikyav yô, sha ayange a Mbaiserael mba tsuaa mbara, Hana er msen sha zayol ugen hen tsombor na. Shighe kar yô, ishima na iv a iember, nahan a er msen, a wuese Aôndo tsung.—Ôr 1 Samuel 1:10, 12, 13, 26, 27; 2:1.

Ian i se lu a mi i lamen a Aôndo ken msen la ka kwagh u icivirigh kpen kpen! Se fatyô u zan a mbamzeyol asev cii hen Aôndo u a gbe se la. Shi se fatyô u wuese un shi sughun un sha kwagh u a er yô.—Ôr Pasalmi 145:14-16.