Yange m vese hen geri u Rmaysh, ken tar u Iserael, ikyua a ikpi i tar u Iserael vea tar u Lebanon, sha ayange a num lu ken tar u Iserael kpoghuloo la. M umbur er yange i hôn ubom shin inya, ve bughur ve vihin mbaishôôv iyol, ve tôndo mbagenev angahar yô. Yange tar taver hen shighe la kpishi, shi tswam man ipila samber wuee.

Tsombor wam lu ken Côôci i mbafada igen, i i yer ér Maronite la; ngi i môm ken ucôôci mba fada mba i yer ér, the Eastern Catholic Churches la. Terem memen ga sha u nôngon koson tsombor wase, se iorov 12. Ngom di a nenge ér, se ônov nav cii adua kar mô wase ga. Ken masejime yô, m nenge mer, côôci la ngi wasen mbaatsanev ga, er mbamzough mbagenev kpishi nahan.

Shighe m lu wan a wa ikyondo la, m soo canis i keren kpishi. Nahan m nôngo kpoghuloo mfa u keren ave man angahar tsembelee, shi m kar iyol sha ikyav mbi numuv kposo kposo. Yange m kaa ken ishima yam mer, ‘Me faityo u yangen ipila shin ifer ga, kpa aluer m nenge ior mba eren akaa ne yô, me nôngo tsung me yange ve.’ Yange mea nenge iorov uhar vea nôngon num yô, m kôr ve num fese je. M lu or u vihin ishima, a lu sha ankwagh u cuku kpa, m ngôôr vihin ishima ga. Ior mba vegher u ken imbusutariyan i tar u Lebanon la cii cian mo, er m soo ipila shin ifer sha ashe a am ga yô.

Ken inyom i 1980 la, m nyôr mzough u mbakeren canis u hen geri u Beirut la. Yange i shi keren ubom va gban hen ijiir la hanma sev, kpa m bunden u zan iyolkaren ga. Ken uma wam cii, yange m shi sha u yan kwagh shi yaven shi keren canis er Oramerika, u i fe un wuee sha kwagh u canis i keren, i yer un ér Bruce Lee la nahan. Yange m er ice sha ityou er un nahan, shi m zenden shi m ngoron er yange una keren canis ve a ngoron la nahan. M seen ga.

Yange m soo u hingir orkeren canis u duen iti ken tar u China. Sha iyange igen la aikighe, m lu karen iyol sha gbashima sha ci u wan ago a zan zende ken tar u China, maa orgen va kemam uwegh sha hunda. Lu ijende yam igen vea nomso mbagenev uhar, mba ve lu Mbashiada mba Yehova yô. Yange m kange iyol sha akondo a anumbegh a ii, iusa lu ndôôr mo iyol, maa m kaa a ve mer, “M fa kwagh môm ken Bibilo ga.” Hen  shighe la, cuku tsô kpa m fa mer uma wam una va gema ken hemen ga.

Mbashiada mbara pasem ken Bibilo, er i hii ve i lu u mayange uumace vea nôngo nan nan kpa, vea fatyô u been a ifer kua ipila elegh elegh ga yô. Ve pasem er i lu Satan Diabolo jighilii je a ve a mbamzeyol mbara nahan yô. (Mpase 12:12) Ieren i kundu kundu i Mbashiada tesem kua vangertiôr ve la doom kpen kpen. Shi yange ve tesem er Aôndo a lu a iti na kpôô kpôô yô, nahan kwagh la kôrom ken ishima tsung. (Pasalmi 83:18) Shi ve tesem kwagh u i er ken 1 Timoteu 4:8 la. Ivur la kaa ér: “U karen iyol, i̱ taver la tseegh yô, wa ngun a inja kpeghee, kpa u civir Aôndo yô, ngu a inja sha akaa cii gadia ngu a ityendezwa sha uma u hegen ne kua uma u a lu van la kpaa.” Mkaanem man wasem ken uma wam kpishi.

Kpa kwagh ka a er i vihi yô, m va de u nengen a Mbashiada, sha ci u tsombor wam kaa a ve ér ve de kera ve hen ya wase ga. Nahan cii kpa, m soo mer me de u karen iyol i keren canis, nahan me hii u henen Bibilo. Anngôôv av mba utaankarunyiin mbara cii soo mhen la ga, kpa m kange ishima mer me hide me za zua a Mbashiada mba Yehova, nahan ve za hemen u henen Bibilo a mo.

M lu keren Mbashiada kpa zuan a ve ga. Hen shighe ne, terem saa ku kpoo, shi akaavihin agen kpa er tsombor wase, nahan m lu ken ishimavihin tsung. Yange m hii u yaren tom hen kômpeni ugen u maan kwagh, nahan sha iyange igen yô, orgen u se eren tom imôngo, u i yilan un ér Adel yô, va yilam pinem kwagh u a zem iyol ve m saan ga yum nahan yô. Maa hii u ôron kwagh u ishimaverenkeghen i mnder u shin ku, i i er ken Bibilo la. Hii hen shighe la je, Orshiada u soon ior shi eren a ve kundu kundu ne wa ishima, hen Bibilo a mo iwer itiankarinyiin jimin.

Yange se mba ngur henen kwagh yemen hemen yô, m gba nengen er i gbe u me de akaa kpishi ken uma wam yô. Lum ican kpishi. Ishima yange i vihin mo hanma shighe cii shi or a erem ankwagh cuku kpa, m vihi ishima a nan. Kpa Bibilo wasem m hen u kighir ishimavihin yam la, shi kwagh a vihim kpa m kera er kwagh sha mi gagh ga. Ikyav i tesen yô, Yesu wa se kwagh ken Mateu 5:44 ér: “Doo nen a mbaihyomov enev, man shi eren nen msen sha ci u mba ve tev ne a ican yô.” Shi i ta icin ken Mbaromanu 12:19 ér: “De oron nen iyev sha kwagh wen ga, . . . gadia i nger er: Ka Mo Me or iyev ye, ka Mo Me kimbi ye, kape Ter A kaa la.” Avur a Bibilo ne kua agen kpaa wasem kure kure tsô, m va zua a bem ken ishima yam.

Shin er sha hiihii la tsombor wam venda ér m de henen Bibilo a Mbashiada mba Yehova ga nahan kpa, ken masejime yô, ve va gema wuese Mbashiada. Jim je yô, anmgbian wam u nomso u kiriki kohol mo, se mba civir Yehova imôngo, shi ngôm lumun ér i ior ve lam sha kwagh u jighjigh wase u nan dang ga, zan zan kar kpen.

Shi m zua a kwase u dedoo, u a soom sha mimi yô, iti na er Anita, ngu ikyartom wam u ishima ishima, ken tom u pasen kwagh hanma shighe la. Hii ken inyom i 2000 la je, mo vea kwase wam Anita se mba wasen tom u tesen mbalamen zwa Arabia Bibilo hen gar u Eskilstuna, ken tar u Sweden.

Zan zan hegen kpa, kunya ka u kôrom a mba ve tagher a ican i ipila i ve ve a mi la. Kpa er m fe ityôkyaa i i ne ve ipila i lu la jighilii, shi m fe mer ica ia gba ga tsô Aôndo una kar a i kera yô, saan mo iyol sha mimi shi ishima gbam shimi.—Pasalmi 37:29.