Kameron: Jon, doom kpishi er hanma shighe ka se timen sha akaa a ken Bibilo imôngo yô. * Kwa u masetyô u se lam la, u pine mpin sha kwagh u Tartor u Aôndo. U pine er i hii ve Mbashiada mba Yehova ve ne jighjigh ér Tartor u Aôndo hii u hemen ken inyom i 1914 la yô.

Jon: Kape i lu je la, yan m lu ôron takerada wen ugenegh, nahan i ôr ker ér Tartor u Aôndo hii u hemen ken inyom i 1914. Kwagh la na yô, sarem u seer zuan a iwanger, sha ci u ne kaa ner atesen a en cii due ken Bibilo.

Kameron: U kaa ka ie ga.

Jon: U fa, m ôr Bibilo jimin cii m bee. Kpa m umbur ijiir i môm i i ter kwagh u inyom i 1914 la ga. Nahan m hide m za seer keren kwagh u inyom i “1914” la ken Bibilo i sha Intanet. Kpa Intanet tese ér ivur Bibilo i môm ter inyom la ga.

Kameron: M soo u wuese we sha akaa ahar, Jon. Hiihii yô, m wuese we kpishi er u er Bibilo jimin cii yô. U tese wer Mkaanem ma Aôndo doo u ishima sha mimi.

Jon: M soo ma. M nenge mer ma takerada ugen hemba Bibilo ga.

Kameron: U kaa vough. U sha uhar yô, m ngu wuese we er ka u ker iwanger sha kwagh u a tsume u ken Bibilo yô. U er kwagh u Bibilo i kaa ér se eren la vough. Bibilo kaa ér: “Ker” mkav. * Doo kpishi er u lu eren nahan yô.

Jon: M sugh u. M soo mer me za hemen u henen kwagh. M seer tôvon sha kwagh u inyom i 1914 la ken takerada u se lu henen ne, nahan m seer zuan a kwagh. Takerada ne ôr kwagh u mnyam ma yange ma cier tor ugen yô, mnyam mara lu sha kwagh u zegekon u i gber un, kpa hide vese her yô, m hen nahan.

Kameron: Een, ka mimi. Ka kwaghôron u profeti u i nger ken Daniel ityough 4 la. A ôr kwagh u mnyam ma ma cier Nebukadinesar, Tor Babilon la.

Jon: Een ngwa! Ka ma je la. M ôr kwaghôron u profeti la kwa kimbir kimbir. Kpa u tsughun we ga yô, m ngu a kav er mnyam mara ma zough sha kwagh u Tartor u Aôndo, shin inyom i 1914 la ga.

Kameron: Jighilii yô, Jon, profeti Daniel iyol na je kpa yange kav kwagh u Aôndo kaa ér a nger la ga!

Jon: Mimii?

Kameron: Een. A ôr ken Daniel 12:8 heen ér: “M ungwa, kpa m kav ga.”

Jon: Inja na yô ka mo tseegh ga zee? Hegen yô, ishima gbam shimi.

Cameron: Jighilii yô, Daniel yange kav kwagh ne ga sha ci u shighe u Aôndo ver ér uumace ve kav  inja i akaaôron a profeti a ken takerada u Daniel la lu a kuma ga. Kpa hegen se fatyô u kaven a tsembelee je.

Jon: Er nan u kaa nahana?

Kameron: Nenge ase kwagh u i er ken ivur i dondon ne. Daniel 12:9 kaa ér: “I cir akaaôron la; i ver a ikyav zan zan ar sha shighe u mkur la.” Nahan lu u saa shighe a kar naleghaa, a va lu “sha shighe u mkur la” ve, a mase kaven akaaôron a profeti ne ye. Shi er se sôôn timen sha kwagh ne ken kwaghhenen wase nahan, ikyav tese wang ér, ka shighe u mkur la je se lu ker hegen ne. *

Jon: Nahan u fatyô u pasen mo inja i kwaghôron u profeti u ken Daniel ne kpa?

Kameron: Me nôngo er m fetyô la cii.

Kameron: De me hii sha u saven ôron we kwagh u Tor Nebukadinesar nenge a mi ken mnya la, man se lam sha kwagh u ma tese la ye.

Jon: Doo yum.

Kameron: Ken mnyam mara, Nebukadinesar nenge a zegekon u tav je za kôr sha kwavaôndo yô. Nahan a ungwa ortyom u Aôndo ugen yôô ér i gber kon la i kende inya. Nahan kpa, Aôndo kaa ér i de ikpughur u kon shon a lu shin inya her. Lu u ‘ashighe ataankarahar’ aa karen yô, kon shon ua hide a vese her. * Kwaghôron u profeti ne yange hii kuren sha Tor Nebukadinesar iyol na. Shin er lu tor u hemban sha tar cii, er kon u u tav je za kôr sha kwavaôndo la nahan kpa, i gber un kera ‘ashighe ataankarahar’ kar. U umbur kwagh u yange er kpa?

Jon: Ei, m umbur ga.

Kameron: Ka shami. Bibilo tese ér Nebukadinesar hingir er inyam i ken toho nahan, anyom kar kuma ataankarahar. Hen shighe la cii, kera lu tor ga. Kpa ashighe a ataankarahar la nga been yô, Nebukadinesar hide sha mlu u orumace, shi hide lu tor her. *

Jon: Okee. M kav kwagh u ú lu ôron van la. Kpa kwagh shon gba zua vea Tartor u Aôndo man inyom i 1914 la nena?

Kameron: U ôron kwagh kpishi ga yô, mkur u kwaghôron u profeti ne ngu ker avegher ahar. Vegher u hiihii la yange kure shighe u Tor Nebukadinesar hingir er inyam i ken toho ve, kera lu tor ga la. Vegher u sha uhar la di ngu ôron kwagh u shighe u ikyônough ki torough ki Aôndo kia va lu gbilin la. Nahan ka mkur u vegher u sha uhar la a gbe a zough sha kwagh u Tartor u Aôndo ye.

Jon: Er nan u fe wer mkur u vegher u sha uhar u kwaghôron u profeti la gba zua sha kwagh u Tartor u Aôndo?

Kameron: Hiihii yô, se nenge a ikyav ken kwaghôron u profeti la jighilii. Daniel 4:17 kaa ér i ôr kwaghôron u profeti “sha ci u mba ve lu uma, ve̱ fa. Uhembansha ngu a tahav sha tartor u ior, ka A gema u A na hanma or u i doo Un u nan nan yô.” U nenge a ishember i “tartor u ior” la kpa?

Jon: Een, i kaa ér “Uhembansha ngu a tahav sha tartor u ior.”

Kameron: Vough. U hen wer ka an nan lu “Uhembansha”?

Jon: M hen mer ka Aôndo i lu ôron ye.

Kameron: U kaa vough. Nahan kwagh la ngu pasen se ér kwaghôron u profeti ne ôr kwagh u Nebukadinesar tseegh ga. Ngu ôron kwagh u “tartor u ior,” shin mtemtor u Aôndo sha uumace kpaa. Aluer se nenge sha avur a Bibilo a a kase kwaghôron u profeti ne yô, se kav kwagh ne wang.

Jon: U ôr nahan u ver ishigh nena?

Kameron: Takerada u Daniel ter kwagh ne kwa kimbir kimbir. U ôr kwagh u mver u a ver Tartor u Aôndo, u Wan na Yesu una hemen la var var. U tesen ikyav yô, de se bugh se hide ken ijime daalaa. Ôr ase Daniel 2:44 yôô.

Jon: Ka shami. I kaa ér: “Sha ayange a utor mbara, Aôndo u Sha Una ver tartor ugen u ua gba mayange ga yô, man shi tahav mbu u kpaa mbua hingir sha ikyev i ma ikur igen ga, kpa ua hembe ityartor igen ne cii avur avur, ua tim i, kpa u yô, ua lu gbem sha won.”

Kameron: M sugh u. U hen wer ka Tartor u Aôndo la ivur ne i ter yee?

 Jon: Hmm. Beem nahan ga.

Kameron: Fa wer ivur la kaa ér Tartor ne “ua lu gbem sha won.” Ka Tartor u Aôndo la i er kwagh u ú nahan ye, ka kwagh u ma gomoti u uumace una fatyô u eren ga yô, shin una fatyô?

Jon: Ei, m hen nahan ga.

Kameron: Shi nenge kwaghôron u profeti ugen ken takerada u Daniel, u a er kwagh u Tartor u Aôndo yô. Ka kwaghôron u profeti u i nger ken Daniel 7:13, 14 la. Kwaghôron u profeti la ôr kwagh u orgen u ken hemen nana va lu tor yô, ér: “I na Un tor sha won cii man icivir man tartor, sha u ior man akuraior man ijô cii ve̱ er Un tom; mtemtor Na ka mtemtor u tsôron, u una kar kera mayange ga, man tartor Na kpaa ka u timin kera mayange ga.” U ungwa ma kwagh ken kwaghôron u profeti ne, u u vande fan yôô?

Jon: I ôr kwagh i ter tartor ugen.

Kameron: Doo yum. Kpa ka ma tartor ugen ga. Fa wer ivur la kaa ér Tartor ne ua lu a tahav sha “ior man akuraior man ijô.” Inja na yô, Tartor la ua hemen tar cii.

Jon: M ôr ivur Bibilo la kpa m kav nahan ga, kpa ka mimi er u kaa nahan. Ka kwagh u i̱ er je la.

Kameron: Shi kwaghôron u profeti la kaa ér: “Mtemtor Na ka mtemtor u tsôron, u una kar kera mayange ga, man tartor Na kpaa ka u timin kera mayange ga.” Kwagh ne zua sha kwaghôron u profeti u se sember ôron ken Daniel 2:44 la, shin ka nahan ga?

Jon: Een, a zua.

Kameron: De ase se hide se sav kwagh u se hila tim sha mi la. Yange i ôr kwaghôron u profeti u ken Daniel ityough 4 la sha u ior cii ve fa ér “Uhembansha ngu a tahav sha tartor u ior.” Mkaanem man tese wang ér gba u kwaghôron u profeti la una kure sha gbenda u vesen, a hemba er yange kure sha Nebukadinesar la. Shi ken takerada u Daniel la cii, i tsengaôron akaa sha kwagh u mver u Tartor u Aôndo, u Wan na una hemen yô. U nenge wer aluer se kure ikyaa ser kwaghôron u profeti u ken Daniel ityough 4 la ngu ôron kwagh u Tartor u Aôndo nahan, a lu shamii?

Jon: Kam nahan. Kpa m ngu a kav er i hii ve kwagh u inyom i 1914 la a za ve ker ga.

Kameron: De se hide se nenge sha kwagh u Tor Nebukadinesar la. Umbur wer kon u i er kwagh u u ken kwaghôron u profeti la tile sha ityough ki Tor Nebukadinesar. Yange va kera lu tor hen shighe ugen la ga, zum u igber kon la i kende inya ashighe kar ataankarahar la, ka hen shighe u yange hingir er inyam i ken toho la je la. Ashighe ataankarahar la yange kure shighe u Nebukadinesar hide lu orumace, shi hide lu tor her la. Vegher u sha uhar u mkur u kwaghôron u profeti la ngu ôron kwagh u shighe u ikyônough ki torough ki Aôndo kia va lu gbilin la, kpa u ngu wer a lu sha ci u Aôndo er ma kwagh u shin ga.

Jon: U ôr nahan u ver ishigh nena?

Kameron: Sha ashighe a tsuaa la, i ôr kwagh u ator a Iserael a yange hemen ken Yerusalem la ér a tema sha “ikyônough ki torough ki TER.” * Yange ve tile sha ityough ki Aôndo sha u hemen ior nav. Nahan hemen ve la lu hemen u Aôndo jim jim. Kpa shighe kar yô, ator la agen kpishi hingir u hemban Aôndo ato, shi Mbaiserael kpishi dondo ieren ve i bo la. Er Mbaiserael hemba Aôndo ato yô, a de ve hingir sha ikyev i Mbababilon, shighe u Babilon hemba ve ityav, yem a ve uikyangen ken  inyom i 607 C.S.Y. (Cii man Shighe u Yesu) la. Hii hen shighe la je, ma tor kera hemen Mbaiserael ken Yerusalem sha ityough ki Yehova ga. Kwagh ne tese ér, hen shighe la ikyônough ki torough ki Aôndo hingir gbilin. U ngu kaven je he?

Jon: Een.

Kameron: Nahan inyom i 607 C.S.Y. la lu mhii u ‘ashighe ataankarahar,’ shin shighe u ikyônough ki torough ki Aôndo kia lu gbilin je la. Lu u shighe la una been yô, Aôndo una kera tsua orumace ga, kpa una tsua orgen sha, una ver nan tor sha ityough Nagh. Ka shighe u akaaôron a profeti a i ter ken Daniel la kpa aa kure je la. Nahan mpin u vesen u a lu yô: ‘Ashighe a ataankarahar’ la yange bee hanma shighe? Aluer se na mlumun sha mpin la yô, se fa shighe u Tartor u Aôndo hii u hemen la.

Jon: A hoo. De me ker ahaba, ashighe a ataankarahar la bee ken inyom i 1914 laa?

Kameron: U kaa vough! U zua a mi.

Jon: Kpa er nan se fe nahana?

Kameron: Shighe u Yesu lu eren tom na u pasen kwagh shin tar la, a ôr kwagh u tesen ér ashighe a ataankarahar la lu a kure ve ga. * Sha nahan yô, shighe la lu gôgô shighe. Ashighe a ataankarahar la yange hii ica i gba cii Yesu va shin tar ye, shi zum u Yesu hide yem sha la kpa ashighe la lu a bee ga. Shi umbur wer lu u a kav inja i akaaôron a profeti a ken Daniel la wang ga zan zan saa sha “shighe u mkur.” * Nahan ken kwavanyom u 1870 la kwagh er doo kpishi; yange gba mbahenen Bibilo sha mimi ishima tsung u timen sha akaaôron a profeti ne, maa ve hii u timen sha a vighe vighe. Ve hii u kaven er ashighe ataankarahar la a lu been ken inyom i 1914 la yô. Shi akaa a vesen a yange hii u eren sha tar ken inyom 1914 la kpa tese wang ér lu ken inyom shon jighilii Tartor u Aôndo hii u hemen sha ye. Lu ken inyom la je tar ne nyôr ken ayange a masetyô, shin shighe u mkur ye. M fa, akaa a m er u ne ngee, shi ka a he a u fatyô u henen sha mi . . .

Jon: U ôr ka ie ga. Me hide me time sha kwagh u u erem ne vighe vighe sha er me kav un tsembelee yô.

Kameron: I de ze u iyol ga. Mo kpa yange tôôm shighe u kaven akaaôron a profeti ne kua mkur u a kpaa. Kpa m fa keng mer iliam yase ne wase u u nengen er akaa a Mbashiada mba Yehova ve tesen sha kwagh u Tartor la cii a dugh ken Bibilo yô.

Jon: Een, m nenge nahan. Ka mea nenge nea naan mbalumun ken Bibilo sha akaa or pin ne sha kwagh u jighjigh u nan wen nahan, i sagher mo iyol kpen kpen.

Kameron: M nenge mer we kpa sar u u lun er se nahan. Er m vande kaan nahan, akaa a m er u ne ngee, shi ka a he a u fatyô u henen sha mi hen shighe môm ga yô. A shi nan kpa u ngu a mbampin sha akaa agen. U tesen ikyav yô, se fa ser ashighe ataankarahar la gba zua sha kwagh u Tartor u Aôndo, shi a hii ken inyom i 607 C.S.Y. la. Kpa er nan se fe ser ashighe ataankarahar la bee ken inyom i 1914 la jigh jigh? *

Jon: Een, mo kpa taver mo.

Kameron: Bibilo wase se u gbidyen kwar fan er ashighe ataankarahar la a lihi a kighir la jighilii. U soo wer se time sha kwagh la kwagen u me va yôô? *

Jon: A doom je a zua ga.