A shi nan kpa ngeren mba ken ijime mbara wase u u̱ kaven er i hii ve Tartor la u gbe Mbashiada mba Yehova kwagh yum yô. Shi adooga averen a Tartor u Aôndo, a i tim sha mi la doo u tsung. Nahan cii kpa, alaghga u nenge wer uityendezwa mbara doo je bee er ka mnyamciem yô.

Er u we ikyo, u gbe nan jighjigh a hanma kwaghôron tsô ga yô, tese kwaghfan. (Anzaakaa 14:15) Ikyo you i wan la zua sha ieren i ior Berea * mba sha ayange a tsuaa la. Zum u i hii pasen ior i Berea loho u dedoo u Tartor yô, ve lumun a kwagh u ve ungwa la, kpa lu sha ci u ve soo ér i lu mimi er ve ungwa la ga. Kpa ve time ken Ruamabera zulee “sha u vea nenge shin akaa la aa lu nahan yô.” (Aerenakaa 17:11) Inja na yô, ior i Berea tôô loho u dedoo u ve ungwa la, kar sha kwagh u Ruamabera a kaa yô. Ken masejime yô, ve kav wang er loho u dedoo la u dugh ken Mkaanem ma Aôndo jighilii yô.

Mbashiada mba Yehova mba kaan a we gbar gbar ér we kpa u er nahan. Er se henen Bibilo a ior gbilin hegen ne, u ngu a ian i tôôn jighjigh u Mbashiada mba Yehova ve ne sha kwagh u Tartor u Aôndo la, karen sha kwagh u Bibilo i tese yô.

Dugh u fan kwagh u Tartor u Aôndo la kera yô, shi Bibilo you i henen ia wase ú u zuan a mlumun sha mbampin mba vesen, er mban nahan:

•   Ka han se uumace se dughu?

• Ityôkyaa i se lu uma jim yô ka nyi?

• Er nan Aôndo a de ican i lu eren se?

• Ka nyi ka i er or zum u nan kpe kera laa?

• A va tim tar nee?

• Ka nyi ka i na tsombor u lu ken msaanyoloo?

Kwagh u hemban cii yô, Bibilo i henen ia wase u u ‘kporom hen Aôndo.’ (Yakobu 4:8) U nguren kporom hen Aôndo yô, u lu hemban nengen er Tartor u Aôndo la ua er akaa a dedoo sha ci wou hegen tseegh ga, kpa a lu gbem sha won yô. Yesu iyol na kpa yange kaa a Ter na ken msen ér: “Uma u tsôron yô, ka u ve̱ fa U, We Aôndo u mimi tswen, man shi Un u U tindi la, ka Yesu Kristu.”—Yohane 17:3.