Shighe u m lu wanye la, tsombor wam lu ikyua a gar u Leipzig, sha ityoughkitaregh ki tar u Jamani, ikyua ape tar u Czech u te ikpi a tar u Poland la. Shighe u m lu anyom 6 la, tom u ter wase eren la na yô, se mough se yem ken tar u Brazil, shi se za mough heela se yem ken tar u Ecuador.

Shighe u m lu anyom 14 la, i za wam sha makeranta ugen ken tar u Jamani, u mbayevmakeranta tsaan sha mi yô. Kpa er mbamaren av lu ica a veghertar u South Amerika la yô, gba u me nengen sha iyol yam. Nahan m kera suur sha or ga. Ieren yam yange ia doo ior shin a doo ve ga kpa kwagh a gbam sha mi ga.

Shighe u m lu anyom 17 la, mbamaren av cin hide ken Jamani. Sha hiihii la, se tsaan hen ya môm. Kpa ieren yam i lun sha tseeneke la na yô, m kera fatyô u lun sha ikyev ve ga. Nahan, m ivin anyom 18 yô, m undu ve.

Yange m hingir u keren kwagh u me er ve uma wam una lum a inja yô. Nahan m gbidyen kwar sha uma u ior kua iniongo kposo kposo yô, m nenge mer kwagh u a hembe doon u me er a uma wam yô, me zende me nenge tar ne cii uumace vea mase vihin u ye.

Nahan m mough ken Jamani sha agugu, m wa ityough yemen ken Afrika. Kpa ica i gba tsô, agugu wam vihi, maa m cin m hide ken Yuropa, sha u va sôron un. Mba ser un yô, m mough iyange i môm m za gba ken tar u Portugal, shin kpe ityeku. Maa m undu agugu wam her, m hingir u nyôron tso ningir tar.

M kohol agumaior agen a yange lu wan iyol i nyôron tsô peren ityeku i Atlantic Ocean la yô. Yange m zua a gumkwase ken a ve, u va hingir kwase wam yô, iti na ér Laurie. Se za hii nyôron hen ucile mba Caribbean. Se tsa hen Puerto Rico ayange kpuaa, maa se cin se hide ken Yuropa. Se lu henen ser se zua a tso u injin u se gema zenden a mi shi tsan shimi yô. Kpa se ker imba tso la iwer i itiar tseegh maa, kwagh u se wa ishima u eren ne va bunde kpoo. Gomoti u tar u Jamani tôôm shoja.

M tsa ken shoja i shin mnger inyom man iwer itiar. Hen shighe la, mo vea Laurie se er ivese, maa se wa iyol i zan hemen  a zende wase u ningir tar la. Shighe u zurum u me hii tom shojaa la, se yam kpande tsoo, lu antso u kiriki. Shighe u m lu eren tom shojaa la, se gema kpande tsoo la hingir se antso u zan zende a mi. Yange se soo ser se tsaan shimi shi se zenden a mi se nengen tar u u doo ashe yum ne. Lu hen shighe u m de tom shojaa, m lu eren a er tom sha tso wase la je, se zua a Mbashiada mba Yehova, maa ve hii u henen Bibilo a vese ye.

Sha hiihii la, m lu nengen a ityôkyaa i me de akaa a m eren ken uma wam la ga. Gadia kwase u yange m keren un a ker la kpa m vôso un hingir kwase wam, shi taav kpa m de u man. (Mbaefese 5:5) Hide sha awashima wase u zenden ningir tar la kpa, m lu nengen mer u zenden nengen akaa a kpiligh iyol a Aôndo a gbe la ka kwagh u injaa kpishi.

Nahan kpa, jighilii yô, yange gba u me gema akaa ken uma wam, hemban je yô, inja yam. Er m wa igbongor kpishi shi m lu sha tseeneke wam yô, m lu hemban suur sha tahav av kua akaa a m er ken uma yô. M henen sha kwagh wam tseegh.

Sha iyange igen la, m ôr Ityesen i i Yesu i sha Uwo, i ior kpishi ve fe la. (Mateu ityough 5-7) Sha hiihii la, lu taver mo u kaven kwagh u msaanyol u Yesu ôr la. U tesen ikyav yô, a kaa ér ka mba ijen i ker ve man mba imura i ker ve la i saan ve iyol ye. (Mateu 5:6) Taver mo er or a lu ken ibanave ve a de a saan nan iyol la. M nguren henen kwagh yemen hemen yô, m va kav er i gbe u se civir Aôndo, kpa i lu u saa or a hide a iyol i nan ijime, nana lumun ér gba u a civir un keng ve, nana civir un yô. Ka vough er Yesu kaa nahan, ér: “Saan mba ve lu mbaibanave ken jijingi la iyol.”—Mateu 5:3.

Yange se mba hiin Bibilo i henen ken Jamani yô, m mough vea Laurie se yem ken tar u France, shighe kar yô, se yem ken tar u Italia. Hanma ijiir i yange sea za yô, se zua a Mbashiada mba Yehova. Mdoo u ve doo ayol a ve la kua mzough u a lu hen atô ve la yange doom kpishi. Yange m nenge mer Mbashiada mba Yehova ka mzough u anmgbianev mba sha tar cii. (Yohane 13:34, 35) Shighe kar yô, i er mo man Laurie batisema, se hingir Mbashiada mba Yehova.

Se mba eren batisema yô, m za hemen u geman inja yam. M mough vea Laurie, se nyôr tso, se sen ken ityeku, se va hen ijiir igen ken Afrika, se va mough her se per ityeku i Atlantic Ocean, se yem ken Amerika. Ka er yange se yem ken mnger fiinii, se uhar tseegh shin antso u cuku, mngerem kase se hanma vegher yem ukilomita dubu udubu nahan ve, m mase kaven er Aôndo u hemban agee, u ua gbe se la a hembe se i yem zende zende ye. Er tom lu u me er ken atô u ityeku ga yô, m lu a shighe kpishi, nahan m tôô shighe la m lu ôron Bibilo. Yange m ôr kwagh u uma u Yesu shighe u lu shin tar la nahan doom kpen kpen. Lu or u vough shi lu a mfe u hemba uumace yem zende zende yô, kpa mayange kenden a iyol sha ga. Yange eren kwagh sha mhen na ga, kpa eren kwagh sha mhen u Ter na u sha la tseegh.

Er m hen sha ieren i Yesu la yô, m nenge mer gba u Tartor u Aôndo ua lu kwagh u hiihii ken uma wam, a lu akaa a m yange m tsua u eren la ga. (Mateu 6:33) Se mba za nyer ken tar u Amerika yô, se kaa ser se se de zende se tema nya, sha er se hemba veren ishima sha mcivir u Yehova yô.

Shighe u m eren kwagh sha tseeneke wam la, yange mea er mhen kpa m fa er kwagh shon una za a kure ga. Kpa hegen ne, m zua a kwaghfan u una za a mo sha gbenda u vough yô. (Yesaia 48:17, 18) Shi m zua a kwagh u injaa ken uma wam, u yange m lu a mi ga yô, m ngu civir Aôndo shi wasen mbagenev u fan kwagh na.

Er mo vea Laurie se lu dondon akaawan a Bibilo yô, ivese yase seer doon. Se mar wan u kwase u doon ishima, u a vese a hingir u fan Yehova shi lun a na kôôsôô yô.

Ashighe agen ka se tagher a mbamtaver. Kpa sha iwasen i Yehova yô, se kange ishima ser se de u suur sha a na ga.—Anzaakaa 3:5, 6.