Aluer u fa or ga, shin u fa nan kpa ne mba boki ga yô, a taver we u gban kaan a nan wer: “Ôrom hanma kwagh u u soo cii, me er u.” Kpa or u ú ye ijende a nan taveraa yô, a taver we u ôron imba kwagh la a nan ga. Azende a kôôsôô nga keghen a kegh iyol u wasen mô ve shighe u nan pin iwasen yô.

Bibilo tese ér Yehova eren kwagh u a fe ér una va mbacivir un a msaanyol yô. U tesen ikyav yô, Tor Davidi, u lu ya ijende a Aôndo la kaa ér: “TERE, Aôndo wam, U er akaa a Ou a kpilighyol ngee kua mbamhen Ou mba sha a vese la kpaa; . . . ve ngee gande u ôron.” (Pasalmi 40:5) Heela tseegh ga, mba ve lu a fa Yehova ga mbara je kpa, eren akaa a doon ve, “ivin asema a [ve] a kwaghyan man msaanyol kpaa.”—Aerenakaa 14:17.

Er ka i doo Yehova u eren kwagh u van mbagenev a msaanyol yô, doo u mba ve keren u lun ijende i Aôndo la kpa vea eren kwagh u una na a ‘saan un iyol yô.’ (Anzaakaa 27:11) Kpa ka nyi nahan jighilii u u er ve a saan Aôndo iyolo? Bibilo na mlumun ér: “U eren dedoo man shi u panden karen ior a̱ de hungur ne ga gadia anza a iniav mbin ne doo Aôndo.” (Mbaheberu 13:16) Kwagh ne tese ér u eren a ior dedoo shi nan ve akaa la ka cii kwagh u i gbe u or a er ve a doo Yehova laa?

Bibilo kaa ér: “Á fatyô u doon Aôndo ishima ga, saa sha jighjigh u nan.” (Mbaheberu 11:6) Sha nahan yô, ka er yange “Aberaham na Aôndo jighjigh” ve, “i yila un er ikyar u Aôndo” ye. (Yakobu 2:23) Yesu Kristu kpa yange ôr var var ér gba u se ‘na Aôndo jighjigh’ ve una ver se doo doo ye. (Yohane 14:1) Sha nahan yô, u er nan ve u lu a jighjigh u nan u Aôndo a keren hen mba a urugh ve a ve a mi her a na laa? U fatyô u hiin sha u henen Bibilo, i i lu Mkaanem ma Aôndo la ayange ayange. Aluer u ngu eren nahan yô, u zua a “mfe u fan ishima [i Aôndo]” la, nahan u fa kwagh u ú er ve u za hemen u “doon un ken akaa cii” yô. U nguren zuan a mfe u Yehova seer shi dondon atindi a na a perapera a u lu henen la yô, jighjigh u nan wou una seer taver, nahan Yehova una hemba lun a we ikyua cii.—Mbakolose 1:9, 10.