Megan: M sugh u Shirley. Kasua u a bee la m nenge a we ken mkombo u Umbur ku u Yesu Kristu nahan doom kpishi. * U nenge kwagh u mkombo la nena?

Shirley: Mkombo la yange doom, kpa me yer u ga, yange m kav akaa agen a i ôr ken mkombo shon la tsembelee ga. Ior kpishi nenge ér u ember mmar u Yesu sha iyange i Kirimishi la hemba kan kwagh u vesen a u umbur ku na. U fatyô u shi pasen mo er i hii ve i gbe hange hange u se umbur ku u Yesu yôô?

Megan: Ka mimi, ior kpishi mba ember Kirimishi. Kpa Mbashiada mba Yehova nenge ér iyange i hemban cii i i gbe u se umbur yô, ka iyange i Yesu kpe la. Aluer u nam miniti kpuaa yô, me pase u atôakyaa a a ne ve i lu hange hange u se umbur ku u Yesu yô.

Shirley: Ka shami, za hemen.

Megan: Jighilii yô, Mbashiada mba Yehova mba umbur ku u Yesu sha ci u yange tese mba dondon un ér ve eren nahan. Nenge ase kwagh u yange za hemen hen tugh mbu kpernan i wua Yesu la. U umbur kwaghyan u hange hange u i kaa ér yange ya vea mba dondon un mba mimi la kpa?

Shirley: Ka kwaghyan u Yesu ya hen aikighe na u masetyô shin tar laa?

Megan: Vough. Mba yer un kpaa ér Kwaghyan u Ter u Aikighe. Shighe u Yesu tema kwaghyan ne vea mba dondon un la, a wa ve tindi jighilii ér ve eren nahan. Wea fatyô yô ôr kwagh u i nger ken Luka 22:19 heen ne.

Shirley: OK. “Shi A tôô bredi, sughun Aôndo yô, A coon, A na ve, A kaa er: Ngun ka iyol Yam je ne, i i ne sha ci wen; eren nen kwagh ne sha u umbur Mo.”

Megan: M sugh u. Nenge tindi u Yesu a we ken mkur u ivur ne la, a kaa ér: “Eren nen kwagh ne sha u umbur mo.” Shi cii man Yesu wa mba dondon un tindi ér ve umbur un yô, a pase ve kwagh u i gbe u vea umbur un sha mi la wang. A kaa ér una na uma na sha ci u mba dondon un. Yesu shi ôr imba kwagh ne, er i nger ken Mateu 20:28 nahan. Ivur la kaa ér: ‘Wan u or va sha u i̱ er Un tom ga, kpa ka sha u Un Una er mbagenev tom man Una na uma Na a̱ hingir ipaan sha ci u ior kpishi yô.’ U ôron kwagh kpishi ga yô, ka kwagh u a ne ve hanma inyom Mbashiada mba Yehova ka ve kohol sha iyange i Yesu kpe la sha u umbur nagh ku ipaan ku Yesu na sha uma na la je la. Ku na la ua fatyô u nan hanma or u nan ongo imo na cii uma u tsôron.

Shirley: Ka m ungwa ior ve kaan ér Yesu kpe sha u se zua a uma. Kpa sha mimi yô, m fa er ku u Yesu la ua na se uma ga.

 Megan: Ka we tseegh ga, Shirley. Kwagh u nagh ku ipaan ku Yesu la taver u kaven tsô. Kpa gema ka kwagh u mimi u Mkaanem ma Aôndo ma kaa yô. Nahan kpa, shin u ngu a shighe je-o?

Shirley: M shi a miniti kpuaa.

Megan: Doo yum. M ngu timen sha kwagh u nagh ku ipaan kura ayange ne, nahan me pase u sha gbenda u a taver we u kaven ga yô.

Shirley: OK.

Megan: U se kav kwagh u nagh ku ipaan la yô, saa se hii fan mlu u Adam man Ifa yange ve nyôr ker shighe u ve gba ken isholibo ken sule u Eden la. De se ôr Mbaromanu 6:23 tsô se kav ikyaa i i dugh ken kwagh ne la. Wea fatyô yô ôr ivur shon.

Shirley: Ka shami. I kaa her ér: “Injar i isholibo i kimbin yô, ka ku, kpa iyua i sha mlumun u sha mhôôn u Aôndo yô, ka uma u tsôron ken Kristu Yesu Ter wase.”

Megan: M sugh u. De se gbidye kwar sha mkaanem mara. Hii nengen kwagh u i er ken mhii u ivur ne la: “Injar i isholibo i kimbin yô, ka ku.” Inja na yô, injar shin mtsaha u isholibo yô ka ku. Aôndo yange kaa ér hii sha uumace mba hiihii mbara je kwagh a lu nahan. Kpa u ngu wer, sha hiihii la or môm lu orsholibo ga. Yange i gba Adam man Ifa ve lu a isholibo iyol ga shi lu u ônov vev vea due ken mlu u isholibo ga. Nahan ityôkyaa lu i ior vea kpeen ga. Lu u Adam man Ifa kua ônov vev cii vea lu uma gbem sha won ken msaanyol. Kpa er se fe nahan, yange kwagh va gema, shin gema ga?

Shirley: Een. Kwagh la yange gema. Adam man Ifa yange va ya kon u i tswer ve la.

Megan: U kaa vough. Adam man Ifa yange mba ye kon la yô, lu ihyembeato, nahan hingir isholibo. Ve tsua u lun a mshi ken a ve, nahan ve hingir mbaasorabo. Lu u kwaghbo u Adam man Ifa er la una va a ikyaa tseren sha ve tseegh ga, ônov vev kpa kwagh a tser ve.

Shirley: U ôr nahan u ver ishigh nena?

Megan: Ka shami, de m tese u ikyav. U kaan bredi kpa?

Shirley: Een! Ka m soo u kaan bredi dedoo.

Megan: Tôô ase wer u yam anagh u kaan bredi a mi. Kpa u ngu a kaa bredi a mi ga tsô maa a osough a ta inya, maa a piin. Er a piin nahan, aluer u kaa bredi a mi yô, kpen bredi ua due shimi ua lu nena? Ua piin er anagh la nahan ga he?

Shirley: Een, ua piin.

Megan: Kape kwagh u Adam man Ifa kpa a lu je la. Yange mba hembe Aôndo ato yô, ve “piin,” shin ve hingir u lun a acôghor iyol sha ci u isholibo man mlu u vough ga u ve nyôr ker la. Shi er ve hingir mbaasorabo cii ve hii u maren ônov yô, lu u vea mar ônov mba “piin” er ve nahan. Hingir u ônov vev cii vea due ken mlu u isholibo la. Ken Bibilo yô, ishember i “isholibo” la ngi ôron kwagh u isholibo i eren man mlu u isholibo i Adam i i mar se se dugh a mi la. Nahan, er mo man we se lu a er ma isholibo ga shin Adam man Ifa lu a mar se shighe u ve er isholibo la ga je tsô, ve nyôr a vese man ônov vev mba ken hemen kua mba asev cii ken mlu u vough ga man u isholibo i ia kure ken ku yô. Er se ôr ken Mbaromanu 6:23 nahan, injar i isholibo i kimbin yô ka ku.

Shirley: Kpa er nan ve i lu u uumace cii vea ya ican gbem sha won sha ci u isholibo i Adam man Ifa tseegh ve er laa? Kam er kwagh la ka shami ga yô.

Megan: U kaa vough, ka inja er i er a vese shami ga nahan. Kpa kwagh ngu ken kwagh la hemba er se hen la. Er ijirôron i Aôndo i lu i vough yô, yange kure Adam man Ifa ijir ér ve kpe sha ci u asorabo a ve, gema na se mba se lu ônov vev ne ishimaverenkeghen ye. Aôndo er gbenda u se fatyô u duen ken kwaghtseren ne kera yô. Nahan gba u Yesu una va na nagh ku paan se. Hide nenge Mbaromanu 6:23 ape se vande ôron la. Ivur la i kaan ér “injar i isholibo i kimbin yô, ka ku” yô, shi i kaa ér: “Iyua i sha mlumun u sha mhôôn u  Aôndo yô, ka uma u tsôron ken Kristu Yesu Ter wase.” Nahan ka ku u Yesu la u bugh se gbenda u duen ken isholibo man ku kera ye. *

Megan: Ivur la pase kwagh ugen vighe vighe, u m soo mer fa yô.

Shirley: Ka nyi kwagha?

Megan: Nenge kwagh u i kaa ne: ‘Kpa iyua i sha mlumun u sha mhôôn u Aôndo yô, ka uma u tsôron ken Kristu Yesu Ter wase.’ Aluer Yesu ya ican shi kpe sha ci wase, a na uma na sha ci wase yô, er nan ve ivur ne i kaa ér nagh ku ipaan ‘ka iyua i Aôndo’? Er nan ve i lu ‘iyua i Yesu ga’? *

Shirley: En-en. M fa ga-o.

Megan: Ka Aôndo yange gba Adam man Ifa ye, shi lu un ve er un isholibo shighe u ve hemba un ato ken sule u Eden la ye. Shighe u ônov mba Aôndo mbauhar mba hiihii ken tsombor u uumace mbara hemba un ato la, yange a vihi un kpen kpen. Kpa Yehova pase gbenda u been a zayol la her ave ave je. * Yange wa ishima ér wan na ugen ken mbatyomov nav nana va shin tar, nana va lu orumace u vough, nahan nana na nagh ku ipaan sha uma u nan. Nahan jighilii yô, nagh ku ipaan kura ka iyua i i dugh hen Aôndo yô. Shi nagh kura ka iyua i Aôndo sha gbenda ugen kpaa. U hen er yange a lu Aôndo ken ishima shighe u i wua Yesu la kpa?

Shirley: Ei, m hen sha vegher la ga.

Megan: M nenge a ikyav mbi niumbev mbi anmbayev hen hunda wou ne. A shi nan kpa u ngu a ônov.

Shirley: Een, m ngu a ônov uhar, u nomso man u kwase.

Megan: Er u lu ormaren yô, hide gbidye kwar nenge er sha iyange i Yesu kpe la, a lu Yehova Aôndo, Ter Na u sha la ken ishima yô. Kwagh u m lu ôron yô, yange a lu un nena shighe u lu sha lu nengen er i kôr wan na i hee un, shi i ta un azu laa? Shi yange a lu Ter u Yesu u sha la ken ishima nena shighe u i mande wan na sha kon, i de un ér a kpe ku u nyoon laa?

Shirley: M ngu a hen sha gbaa la ga! A shi nan kpa yange ishima ia vihi un kpishi.

Megan: Ka mimi, se fatyô u fan er yange lu Aôndo ken ishima sha iyange la jighilii ga. Kpa se fa ser un kpa kwagh vihin un, shi se fa er hii ve de kwagh la er yô. I pase se kwagh shon wang ken ivur Bibilo i ior kpishi ve fe ne, ka Yohane 3:16. Wea fatyô yô ôr her.

Shirley: OK. I kaa ér: “Gadia tar ne doo Aôndo ishima je, nahan A na Wan Na u môm môm la sha er anti or u nan ne Un jighjigh yô, nana̱ de timin ga kpa nana̱ zua a uma u tsôron.”

Megan: M sugh u. Hide nenge ken mhii u ivur la. I kaa ér: “Tar ne doo Aôndo ishima.” Ka ityôkyaa i vesen je la, dooshima. Lu dooshima mgbegha Aôndo tindi Wan na ér a va kpe shin tar ne sha ci wase ye. Sha kpôô yô, nagh ku ipaan kura ka gbenda u hemban cii u Aôndo a tese se dooshima na yô. Ka kwagh u hanma inyom Mbashiada mba Yehova ka ve kohol imôngo sha iyange i Yesu kpe la, ve umbur je la. U zua a mtsera ken kwagh u se hide se tim sha mi ne je he?

Shirley: Een, m zua a mi. M sugh u er u tee shighe u tim sha kwagh ne vea mo yô.