Sha ayange a i ngeren Bibilo la, Aôndo a ver orjir ér nana yange i de u eren ior afer. (Mbaajiriv 2:18) Bibilo kaa ér Iyange i Ijirigh i i ve ken hemen la ka shighe u saan iyol, u orjir u tar cii una yima uumace sha ikyev i mbaaferev yô.—Ôr Pasalmi 96:12, 13; Yesaia 26:9.

Aôndo ver Yesu ér a kure kwagh sha mi vough a mbaumav man mbakpenev cii. (Aerenakaa 10:42; 17:31) Ior kpishi kpe a u fan Aôndo shio. Sha Iyange i Ijirigh la, Yesu una nder amba la cica cii vea hide a lu uma sha er vea fa Aôndo u mimi la shi vea soo un yô.—Ôr Aerenakaa 24:15.

A nder mbakpenev shin ku ken anyom dubu la. (Mpase 20:4, 12) A gba u vea tôô shighe vea hen igbenda i Aôndo sha er vea ungwa imo na yô. Bibilo ôr kwagh u ior kpishi ve fe ga yô, ér a ôr ior ijiir sha akaa a vea er shighe u a nder ve shin ku la.—Ôr Mbaromanu 6:7.

Bibilo shi ôr kwagh u iyange i ijirigh igen i ia va kpoo cii man shighe u anyom dubu la una hii yô. I yila iyange la ér mkur, er i pase ken ngeren mba ken mhii u Iyoukura ne nahan. Sha iyange la, Aôndo una kar a mbaaferev kua mba ve vende u civir un la cii kera. (2 Peteru 3:7) Sha nahan yô, gba u se wa ikyo sha er se tese ser Aôndo doo se ishima yô.—Ôr 2 Peteru 3:9, 13.