ITINEKWAGH I TAMEN | KA A INJA U EREN MSENEE?
Or Ongo Msen Wam Je He?
Ior mbagenev hen ér msen u eren ka shighe u vihin, ka vea er kpa i ungwa ve ga. Mbagenev er msen kpa ve nenge ér Aôndo ungwa ve ga. Orgen u nyiman Aôndo yange er ayom, sha u tesen gbenda u nengen Aôndo la, maa er msen ér: “Ma m shi nenge a an-ikyav u tesen mo ér u ngu.” Kpa a kaa ér, Aôndo “ungwa ato shoun.”
Nahan kpa, Bibilo kaa a vese wang ér Aôndo ngu u a ongo mbamsen asev yô. Bibilo nger mkaanem ma i er a ior mba yange ve lu sha ashighe a tsua tsua la yô. Mkaanem mara kaa ér: “[Aôndo] Una er a we dedoo kpee sha mliam ou; zum u Una ungwa yô, Una ver ato we.” (Yesaia 30:19) Ivur Bibilo igen kpa kaa ér: “Msen u mbamimi yô, ka Un kwagh u ember je.”
Yesu yange er msen hen Ter na, “man i ungwa Un kpaa.”
Shi Bibilo ôr kwagh u ior mba yange Aôndo ungwa mbamsen vev yô. Ivur igen la kaa ér Yesu yange er mbamsen man “uzamber . . . sôn Un u A fatyô u yiman Un” la, shi “i ungwa Un kpaa.” (Mbaheberu 5:7) Se fatyô u zuan a akav agen ken takerada u Daniel 9:21; man 2 Kroniku 7:1.
Kpa er nan ior mbagenev ka ve nenge ér ka vea er msen kpa i ungwa her ga? Cii man i ungwa msen ve yô, saa vea er un hen Yehova, * Aôndo u i er kwagh na ken Bibilo la tseegh, ka hen ma aôndo ugen shin hen uter mba tsev ga. Shi Aôndo soo ér se sôn un kwagh u “a lu sha ishima Na vough yô.” Aôndo na se vangertiôr ér, aluer se er msen nahan yô, ‘una ungwa se.’ (1 Yohane 5:14) Sha nahan yô, cii man i ungwa mbamsen asev yô, saa se fa Aôndo u i er kwagh na ken Bibilo la, shi se fa kwagh u a lu sha ishima na la kpaa.
Ior kpishi na jighjigh ér msen ka di kwagh u i gbe u mbaeren kwaghaôndo vea eren tseegh tsô ga, kpa Aôndo keghen ato a mbamsen shi ongo ve kpaa. Orgen ken tar u Kenya, mba yer un ér Isaac, a kaa wener: “Yange m er msen mer Aôndo a wasem me kav Bibilo. Ica i gbe ga yô, orgen va hen mo va nam iwasen i m lu keren la.” Kwase ugen ken tar u Philippines, mba yer un ér Hilda, yange soo u den taav u man. Nahan nôngo acin imôngo kpa fetyô ga yô, nom na na un mhen kaa ér, “Er nan u sen Aôndo wer a wase u ga?” Kwase ne yange dondo kwaghwan shon, nahan a kaa ér: “Gbenda u Aôndo yange wasem la kpiligh mo iyol tsung. Yange lu inja er taav de a de u saren mo nahan. Nahan kera taver mo u den ga.”
We kpa alaghga tsô Aôndo soo u wasen we sha mbamgbe ou mba ve zough sha awashima na la shinii?
^ par. 6 Bibilo pase ér Yehova ka iti i Aôndo.
