“ORGEN ken tar u Brazil u a lu anyom 24 yô, iti na ér Sidnei. Yange er aikyôr hen ijiir i gban iyol igen, nahan gba iwan, i hingir u tuur un a tuur shin ikyekye i mbaawanev ken uma na cii. Kwagh ne na yô a zer pinen ér, “Er nan i lu mo kengne? Er nan Aôndo a de imbakwagh ne i ereme?”

Ior ka vea er aikyôr shin vea gba angev shin or ve nana saa ku shin vea ya ican sha ci u aahe shin ityav mbi nôngon yô, ishima i vihi ve a Aôndo. Ishima ndera vihin ior a Aôndo nahan ka kwagh u nyian a mi ga. Tertamen Yobu u sha ayange a tsuaa la kpa yange ya atsan atô kposo kposo. Yange na Aôndo ibo sha lan kaa ér: “M ngu vaan a We, kpa U bughum zwa ga, m mough, m tile sha, kpa U gba kenger mo ving tsô. U gema U kera ngum or u zungwen mhôônom ga; ka sha agee a uwegh Ough U tevem a ican ye.”—Yobu 30:20, 21.

Yobu yange fa kwagh u na ve nyôr ken zayol la ga, shi fa er i hii ve un lu yan ican shin Aôndo a de ér una ya ican ga. Kwagh ka a er i doo yô, Bibilo ôr se ityôkyaa i i ne ve ambaakaa ne a eren yô, man kwagh u i doo u se er zum u se tagher a mbamlu mban yô.

Bibilo ôr se kwagh u Aôndo ér: “Tom Na ngu vough; gadia igbenda Na cii, ngi jighilii. Ka Aôndo u jighjigh, ngu a ifer ga, Un ka u perapera man u mimi.” (Duteronomi 32:4) Sha nahan yô, ka shami u henen ér Aôndo u “perapera man u mimi” una soo ér ior ve ya ican, shin una va ior a kwaghtseren sha u tsahan ve shin u wanger vee?

Bibilo ôr se nahan ga, kpa i kaa ér: “Aluer á va mee ma or yô, nana̱ de kera kaan er ka Aôndo A meem ga, gadia á fatyô u meen Aôndo sha kwagh u ifer ga, man Un yô meen ma or ga.” (Yakobu 1:13) Jighilii yô, Bibilo pase se ér Aôndo yange gba orumace na nan uma u vough. Yange na Adam man Ifa, uumace mba hiihii mbara ya u doon ashe, man akaa a hange hange a kwagh gba ve a mi cii, kua tom u dedoo u vea er yô. Aôndo kaa a ve ér: “Mar nen kpishi, seer nen ngeen, iv nen tar, gema nen u, u̱ lu sha ikyev yen.” Nahan ityôkyaa lu i Adam man Ifa vea vihi ishima a Aôndo ga.—Genese 1:28.

Kpa nyian ne akaa nga vihin gban a gba kera. Jighilii yô, ken mlu u orumace cii, mbamtaver man mbamvihi mba kpishi. Kwagh u Bibilo i er ne ka mimi: “Akaa a i gbe a sha won cii la nga kinen imôngo nga toghor zan zan hegen.” (Mbaromanu 8:22) Ka nyi i ne ve kwagh a lu nahana?

Cii man se̱ fa er i hii ve se lu yan ican nyian yô, de se hii fan kwagh u yange hii van a ican i yan la. Lu ortyom u hemba ato, u i va hingir u yilan un ér Satan Diabolo la, yange na ve Adam man Ifa venda atindi a Aôndo wa ve sha kwagh u ieren i shami man i shami ga la ye. Yange lu u vea kura tindi u Aôndo wa ve ér ve de ye “kon u mfe u fan kwagh u dedoo man kwagh u bo” ga la, sha u tesen ér ve lumun a atindi a Aôndo la. Diabolo yange kaa a Ifa ér vea hemba Aôndo ato kpa vea kpe ga, nahan lu kaan ér Aôndo ka oraie. Satan shi wa Aôndo aie iyol ér ngu nyumen ior mba a hemen ve la ian i tsuan kwagh u dedoo man u bo. (Genese 2:17; 3:1-6) Satan lu kaan ér aluer uumace venda hemen u Aôndo, mba hemen ayol a ve yô, a hemba kpen ve iyol. Akaa ne cii na yô, mpin u vesen due ér: Aôndo kuma u hemen uumacee?

Satan shi yange va a ikyaa igen kpaa. Yange wa uumace kwagh iyol ér mba civir Aôndo sha ci u mtsera ve tseegh. Satan yange na Aôndo imo sha kwagh u orjighjigh Yobu kaa ér: “U wa un igyar, U kase un a ya na kua akaa a a lu a mi cii gaa? . . . Kpa naregh ase uwegh Ough, bende akaa a a lu a mi la cii, tsô una venda U sha ishigh Yough je!” (Yobu 1:10, 11) Kwagh u Satan ôr sha kwagh u Yobu la tese wang ér lu kaan ér uumace cii mba civir Aôndo sha ci u mtsera ve tseegh.

Ka nyi i hembe doon u Aôndo una er sha u been a ahon a Satan gba sha atôakyaa a vesen ne la elegh eleghe? Aôndo u a hembe kwaghfan cii la fa kwagh u a hembe doon u una er yô, man ka kwagh u una na se  ishimavihin ga yô. (Mbaromanu 11:33) Nahan Aôndo de ér uumace ve hemen ayol a ve anshighe a kar, sha er a fa hementor u u hembe la yô.

Akaa a vihin a a lu eren sha tar nyian ne tese ér hemen u uumace cii wase ga. Ugomoti mba tar ne fatyô u van a bem shin mkor shin msaanyol ga, shi ve na tar man akaa a a lu sha mi cii nga nôngon u timin kera. Kwagh ne na yô, mimi u i nger ken Bibilo ne hemba duen tseer tseer: “Or u zenden la, mvershigh u iaven i angahar a nan ngu sha ikyev i nan ga.” (Yeremia 10:23) Ka hemen u Aôndo tseegh ua fatyô u van uumace a bem man msaanyol kua mkpeyol u mimi ye, sha ci u ka awashima u Aôndo je la.—Yesaia 45:18.

Kpa Aôndo una kure kwagh u a we ishima u eren sha ci u uumace ne nena? Umbur wer Yesu yange tese mbadondon un u eren msen ér: “Tartor Wou u̱ va, i̱ er ishima You shin tar kpaa vough er i eren i Sha nahan.” (Mateu 6:10) Nahan ica a gba ga tsô Tartor u Aôndo ua bee a hanma kwagh u ican i yan i ve a mi cii kera. (Daniel 2:44) Ua kar a ican man angev kua ku kera. Bibilo ôr kwagh u mbaibanave ér Aôndo “una yima oribanave zum u nana vaa yô.” (Pasalmi 72:12-14) Bibilo tôndo zwa a mbauange ér: “Ma or u nan tem ker kpaa nana kera kaa er: Kwagh nyoon mo, ga.” (Yesaia 33:24) Yesu ôr kwagh u mbakpenev mba Aôndo a hungur kwagh ve ga la ér: “Shighe ngu van u mba ve lu shin iwar cii vea ungwa imo Na, vea due” yô. (Yohane 5:28, 29) Nenge imba ityendezwa i doon tsung ne sha wono!

Sidnei, u se vande teren kwagh na la yange er aikyôr anyom nga kar 17 yô, a kaa ér: “Mayange m na Yehova Aôndo ibo sha aikyôr la ga, kpa u ôron sha mimi yô, ishima yange vihim a na. Ashighe agen yange ishima i vihim kpishi, shi yange mea hen sha kwagh u iwan yam la nahan, m vaa. Nahan cii kpa, Bibilo wasem u fan mer aikyôr la lu u tesen ér Aôndo ngu tsahan mo ga. Bibilo kaa ér ‘shighe man aikyôr mba ve sha a vese cii.’ Er m lu eren msen hen Yehova shi m lu ôron avur a ruamabera a a zough sha kwagh wam yô, kwagh ne wasem u taver ken jijingi shi lun a mnenge u vough.”—Orpasenkwagh 9:11; Pasalmi 145:18; 2 Mbakorinte 4:8, 9, 16.

Aluer se umbur kwagh u a ne ve Aôndo a de se ye ican, shi se umbur ser ica a gba ga tsô una kar a ican i yan kera yô, kwagh ne una na se kera vihi ishima a Aôndo ga. Bibilo kaa a vese ér Aôndo “ne mba ve lu keren Un la injar.” Or u nan ne un kua Wan na jighjigh cii nana va ahenge ga.—Mbaheberu 11:6; Mbaromanu 10:11.