Mba ker ken inyom igen yô, m hii u eren ufiim, man ashighe kpishi i lu mo m er kwagh u hemban zan gwa ken fiim ye. Mbatôônabaver yange ve soo ér mo m ôr ve kwagh, mbatôôn ufoto kpaa ve soo ufoto av, shi ior ve soo ér mo m za uiniongo mba i eren sha u duen a ufiim shin anumbe a he, kua uiniongo mba bughun ijiir i he, shi ior lôhôn mo iwer atetan man aikighe. Hanma ijiir i yange mea za cii yô, ishima i lu ior sha kwagh wam.

Kpa shighe kar yô, m nenge mer akaa ne cii doo er yange m hen la ga. Yange m hemban eren ufiim mba tesen akaa a cieryol, man iyolvihin lu ker kua ku. Mbaeren fiim mba ken Hong Kong yange ve faan tôôn ior mba eren ambaakaa la sha ityough vev, er mbaeren fiim mba ken gar u Hollywood eren nahan ga. Nahan m eren akaa a cieryol ken fiim iyol yam, er u seghan a agugu aver mato nahan. Ufiim kpishi mba m eren la lu mba tesen ipila man akaa a ijimbagh. Mbagenev lu mba tesen ahir.

Ken inyom i 1995 la, m vôso orgen u lu a ijiir na i eren ufiim yô. Shin er m nenge mer m ngu a hanma kwagh u nan mo msaanyol cii, er mdoom am man inyaregh kua nom u wan mo ikyo nahan kpa, saan mo iyol ga, m ure kpishi. Nahan m de u eren ufiim.

Yange m hide m hii u umbur kwaghaôndo u m eren shighe u m lu iyev la. Zum la mo vea anmgbian wam u kwase se zaan tsombor u Orshiada u Yehova ugen inya sha hanma iyange i Sati. Iti i or shon ér Joe McGrath, ka un yange hen Bibilo a vese kua ônov nav mbakasev mba ve lu utar la ye. Tsombor ne lu a dooshima man ieren i kundu kundu, shi Joe yange eren kwagh a kwase na kua mbayev nav sha icivir. Yange i doom u zan mbamkombo mba Mbakristu vea ve kpen kpen. Ashighe agen se za mbamkohol mba vesen kpaa. Ashighe ne lu a saan mo  iyol. Yange mea lu vea Mbashiada nahan, i kundum iyol kpishi.

Kpa hide hen ya wam di yô, lu akaa a vihin tseegh m lu tagher a mi ye. Terem yange er akaa a nan ngôm ishimavihin tsung, nahan ngôm ure kpishi. M va kom anyom er pue nahan yô, ngôm de u kohol imôngo vea Mbashiada mba Yehova. M za hemen u civir Yehova kpa lu sha ishima i môm ga. M va er batisema shighe u m lu anyom 17 la. Kpa shighe kar kpuaa yô, m gba eren aeren a Orkristu ga, shi m va undu tiônnongo kpaa.

Yange m eren ivese shighe kar kpuaa yô, mbatamen uhar mba ken tiônnongo u Mbashiada mba Yehova u hen ijiir yam la vam inya. Yange ve pasem er me er ve me hide hen Yehova Aôndo yô, nahan ve ôr Cindy, kwase mishen ugen ér a va wasem ken jijingi. Hen shighe ne, m kera lu a jighjigh u nan kpishi ga, nahan m kaa a na mer a pasem er i hii ve a fe ér mimi je Bibilo ka Mkaanem ma Aôndo la. Maa a tesem ikyav sha akaaôron a ken Bibilo a a lu kuren sha mi la. Kure kure tsô, mo vea na se va hingir azende a kôôsôô, nahan a kaa a mo ér se se hen atesen a Bibilo a i gbe u me hii fan la. Tsô m lumun. Se mba ngur henen kwagh yô, lu hiin yam fan mer Yehova ka Aôndo u dooshima, u a soo ér i saan mo iyol je la.

Yange m hiden m hiin u zan mbamkombo mba Mbakristu yô, hemba doon mo u lun vea Mbashiada a u lun vea mbaeren fiim. Kpa akaa a yange erem shighe u m lu yev la na yô, lum er or môm kpa me fatyô u nan nan jighjigh ga nahan, shi ishima vihim a iyol yam kpaa. Kwase ugen ken tiônnongo yange tesem ken Bibilo er me nôngo a uzayol mba ken ishima mban yô, shi m hen u kôron azende a mimi kpaa.

Ken inyom i 1997 la, mo vea nomom se yem hen gar u Hollywood, kpentar u California, tar u Amerika. Lu hen gar ne, m za hemba eren tom u wasen ior u zuan a mfe u ken Mkaanem ma Aôndo ye. Tom u tesen ior Bibilo la hemba nan mo msaanyol a mdoom ma fiim i eren kua u eren akaa a hemban zan gwa ken ufiim la. U tesen ikyav yô, ken inyom i 2002 la, m zua a Cheri, kwase ugen u yange se lu ken Hong Kong imôngo yô. Yange nôngo u eren akaa kpishi a mo kpa m er la. Yange ya iyua i kwase u hemban doon ashe ken Hong Kong la, ka kôron inyom igen yô, mo kpa m ya i. Jighilii yô, shighe u m ya iyua ne la, lu un je nam i ye. Shi yange va hingir kwase u eren ufiim, shighe kar yô, va lu a ijiir na i eren ufiim, shi eren tom vea ior mba duen ati mba ve tesen ior u eren ufiim yô. Un kpa yange yem ken Hollywood.

Zum u m va fa mer ishiôr i Cheri kpe angev mbu shimav yô, kunya kôrom a Cheri kpishi. Yange fatyô u zuan a ishimasurun ken Kwaghaôndo u Mbabuda u eren la ga. Un kpa mdoom nam yange ma na lu yôugh yôugh, je yô mbagenev tômon u lun er un nahan, kpa saan un iyol ga shi na or môm jighjigh ga, vough er mo kpa lu nahan. Tsô m hii u ôron un akaa a m hen ken Bibilo la, kpa er i yese un ken Kwaghaôndo u Mbabuda yô, taver un u lumun a mi.

Ken inyom i 2003 la, Cheri yilam sha iyange igen shighe u lu eren fiim hen gar u Vancouver, tar u Kanada yô. Kwagh ka a er i doo yô, Cheri kaa a mo ér yange un due un lu nahan mato ningir sha akômaigbenda, ica i gbe ga yô, un hii u eren msen genger genger ér: “Ôrom, u ngu Aôndo u mimii? Iti you ér ana?” Maa her je un naha mato un kar ikyua a Iyou i Tartor, un nenge i nger iti i Yehova sha iyou shon. Yange nenge ér ka msen na la je Aôndo a ongo ye, nahan soo u zuan a Mbashiada mba Yehova fele fele je. Tsô m ker gbenda sha kwagh ne, ayange nga kar kpuaa yô, a za  mkombo vea tiônnongo u lamen zwa Chinese ken gar u Vancouver.

Shighe kar yô, Cheri kaa a mo ér: “Ior mban soo kwagh wam sha mimi. Ka m pase ve ishima yam je kpaa.” Yange doom kpishi u ungwan kwagh ne, sha ci u shighe u Cheri eren ufiim la, kôron ijende a or ga. Cheri za hemen u zan mbamkombo mban. Kpa ken inyom i 2005 la, Cheri ngohol tom u eren ufiim mba gôgônan uhar ken tar u China, man kwagh ne na yô, gba hange hange u una hide a yem ken Hong Kong. Kwagh ka a er i doo yô, ken inyom i 2006 la, Cheri tsegha iyol na sha ci u Yehova, nahan i er un batisema sha mkohol u Mbashiada u i er ken Hong Kong yô. Shin er soo u civir Yehova kpoghuloo nahan kpa, tom na u eren ufiim la na yô, taver un kpishi u eren kwagh ne, nahan vihin un tsung je.

Ken inyom i 2009 la, mlu u Cheri cii kôr gema. Yange de u eren ufiim, sha er una seer zuan a ian i civir Yehova kpoghuloo yô. Yange kôr azende kpishi ken tiônnongo. Shi hingir kwase u pasen loho u dedoo u Tartor hanma shighe cii, shi saan un iyol u wasen mbagenev u fan gbenda u uma ne.—Mateu 24:14.

Nahan Cheri hii u henen zwa Nepali sha er una sue annongo u Mbashiada u hen Hong Kong, u a eren mkombo ken zwa Nepali la yô. Ka i nenge ior i Napali kpishi mba ve lu ken Hong Kong la ér ve gba kwagh ga, shi i nyagh ve je kpaa, sha ci u ve fa zwa Buter shin zwa Chinese kpishi ga, shi aeren a ve a ityôô kpaa kaha. Cheri yange ôrom er ka i doo un kpishi u wasen ior mban u kaven Bibilo yô. U tesen ikyav yô, shighe ugen la Cheri lu pasen kwagh sha uya uya, nahan za zua a kwase ugen u a lamen zwa Nepali yô. Kwase ne fa kwagh u Yesu cuku tseegh, kpa gema fa kwagh u Yehova Aôndo cuku kpaa ga. Nahan Cheri tese kwase ne ken Bibilo ér Yesu yange er msen hen Ter na u sha la. Kwase ne nengen ér una fatyô u eren msen hen Aôndo u mimi, u i yer iti na ér Yehova la yô, a lumun loho u dedoo gbar gbar. Ica i gbe ga yô, nom na kua wan na u kwase kpa lumun, nahan i hii u henen Bibilo a ve.—Pasalmi 83:18; Luka 22:41, 42.

Er m nenge mer saan Cheri iyol kpishi u eren tom u pasen kwagh hanma shighe la yô, m pine iyol yam mer, ‘Ka nyi jim i lu yangen mo u eren kwagh u un kpa a lu eren laa?’ Hen shighe ne mo kpa m hide m va lu ken Hong Kong. Nahan m sôr mbamlu av sha er me zua a shighe u tesen ior mimi u ken Bibilo la kpoghuloo yô. Yange m va kav mer ka mea kegh ato a ior shi mea wase ve u fan Mkaanem ma Aôndo yô, kwagh ne a nam msaanyol u mimi.

Ikyav i tesen yô, yange m lu henen Bibilo vea kwase u a lamen zwa Vietnamese yô. Kwase ne yange saan ma shighe môm ga, shi hanma shighe yô a nôngo u lun a mliam ashe. Hegen ne, ka a lu saan saan shi i doo un kpishi u lun imôngo vea tiônnongo.

Mo vea Cheri cii se zua a kwagh u a hembe doon a mdoom asem yô. Shin er yange doo se u eren ufiim shi kwagh ne na iti yase za gwa nahan kpa, tom u tesen ior kwagh u Yehova Aôndo ne hemba van se a msaanyol cii, sha ci u ngu ve Yehova a icivir. Se nenge a mimi u kwagh u Yesu yange kaa ér: “U nan a na kwagh hembe saan iyol a u ngohol a ngohol kwagh” la.—Aerenakaa 20:35.