Alaghga we kpa yange sar u u ôron Bibilo, kpa gema lu u ken ishima er ior mba i er kwagh ve sha heen ne nahan. Ior kpishi hwev ka u haa ve iyol u ôron Bibilo. Kpa aluer u gema u fa wer Bibilo i ôron ia na uma wou una hemba doon shi a hemba saan we iyol di ye? Man shi aluer u fa wer igbenda igen ngi i u dondo ve Bibilo ia hemba maan we iyol u ôron di ye? A doo u u fan mtsera u Bibilo i ôron ia va u a mi la kpa?

Nenge ikyav sha kwagh u iorov kpuaa mba yange ve hii Bibilo i ôron ve ve zua a mtsera yô.

Ezekiel ngu anyom 20 kar, a kaa wener: “Ngise la, m lu er or u nan lu nahan mato yemen, kpa nan fa ape nan lu zan ga nahan. Kpa m va er Bibilo yô, kwagh la na uma wam hemba ngun mo a inja. Ngi a akaawan a injaa a m dondon ayange ayange yô.”

Wankwase ugen u un kpa a hembe anyom 20 yô, mba yer iti na ér Frieda, a kaa ér: “Yange m gba eren kwagh gagher, er i kendem ken ishima la tsô. Kpa Bibilo yam i ôron wasem u kôron iyol tsaha. Kwagh ne na yô, ka kera lun ior ican u van ikyua a mo ga, nahan m hemba ngun a azende hegen.”

Kwase ugen u lun anyom 50 kar, iti na ér Eunice, a ôr kwagh u Bibilo a kaa ér: “Ngi wasem mo u hemban lun kwase u dedoo, i gema aeren am a a doo i kom ga la.”

Aluer u ngu ôron Bibilo yô, uma wou a hemba doon, vough er ior mbara, kua ior umiliôn imôngo mbagenev kpa i lu nahan. (Yesaia 48:17, 18) Bibilo ia wase u sha akaa kpishi, er u tsuan akaa a u soo u eren la sha inja, man u kôron azende a mimi, kua u nôngon a mbamtaver nahan, man u hemban cii yô, u fa mimi sha kwagh u Aôndo. Kwaghwan u a lu ken Bibilo la due ka hen Aôndo, nahan aluer u ngu dondon i yô, shighe môm kpa u er kwagh a gba ken inya ga. Mayange je, Aôndo we or kwagh u bo ga.

Kwagh u vesen yô, ka u we hiin Bibilo i ôron la. Ka igbenda i nyi nahan u dondo ve a lu u zange shi a hemba maan we iyol u ôron Bibilo?