Anwankwase ugen yange nenge mnyim ma ilen kunô kunô lu duen hen iyou i kômpeni ugen u varen akaa, lu yemen sha aôndo war war, za hingir er ka abeen nahan. Maa anwankwase ne nenge ér kômpeni la ka u eren abeen. Gbenda u anwankwase ne a kav kwagh u mnyim mara sha inja ga la hôm kpishi. Nahan kpa, akaa agen nga a ka sea kav shami ga ve, se nyôr ken zayol yô. U tesen ikyav yô, aluer u kav kwagh u i nger sha ikpe-ciigh ga man u ma ki yô, kwagh ne una va u a zayol u vesen.

Ior ka vea kav akaa a ken jijingi shami ga yô, mlu ve a hemba vihin cii. U tesen ikyav yô, ior mbagenev yange ve kav ityesen i Yesu igen shami ga. (Yohane 6:48-68) Sha ityough ki yange ma ve seer henen la yô, ve kera soo u keghen ato a kwaghmôm u Yesu lu tesen la ga. Nenge imba er kwagh yange saa ve la sha wono!

Ka u ôr Bibilo wer u zua a kwaghwan kere? Aluer ka nahan yô, u kuma iwuese. Nahan kpa, akaa agen nga ken Bibilo a ka u ôr kpa u kav sha inja ga yôô? Kwagh ne er ior kpur kpur. De se nenge akaa atar a ior kpishi ve kav a sha inja ga yô.

• Ior mbagenev kav inja i kwagh u Bibilo i kaa ér se̱ “cia Aôndo” la tsembelee ga. Ve hen ér inja na yô mba kaan ér se cian Aôndo gighir gighir (Orpasenkwagh 12:13) Kpa Aôndo soo ér mbacivir un ve cian un imba la ga. A kaa wener: “De cie ga, gadia M ngu a we; de enger kenger sha mcie ga, gadia Mo M ngu Aôndo wou, M taver we, shi M wasen we.” (Yesaia 41:10) U cian Aôndo la inja na yô, ka u nan un icivir tsung.

• Mbagenev di kav mkaanem ma ken Bibilo ma i nger heen man sha gbenda ugen kposo. Ma kaa ér: “Hanma kwagh ngu a ayange na; . . . Shighe u maren ngu, man shighe u kpen.” Ve nenge ér hanma orumace yô, Aôndo ver nan shighe u nana kpe yô. (Orpasenkwagh 3:1, 2) Nahan kpa, ijiir ne ngi ôron ka di kwagh u mtse u uma wase tsô, shi ngi pasen er ku u lu kwagh u hanma wase nan tagher ishigh a mi yô. Shi Mkaanem ma Aôndo tese ér akaa a se tsough u eren a uma wase la aa na se seer tsan shin se ngôôr ku ga. U tesen ikyav yô, Bibilo kaa ér: “Mcie u cian TER seer ayange.” (Anzaakaa 10:27; Pasalmi 90:10; Yesaia 55:3) Sha nyi gbenda? Ikyav i tesen yô, aluer se mba ne Mkaanem ma Aôndo icivir yô, kwagh ne una na se palegh aeren a vihin uma wase, er ihundugh ki msôrough man idya nahan.—1 Mbakorinte 6:9, 10.

• Ior mbagen ka vea ôr kwagh u Bibilo i kaa ér usha man tar cii mba “kuran ve sha ci u usu” la yô, ve hen ér Aôndo ngu va timin tar u se tem sha u ne cii kera sha usu. (2 Peteru 3:7) Kpa Aôndo tôndo zwa ér mayange je una de ér i tim tar u se tem sha u ne kera ga. Aôndo “tim tar sha amagh a u, sha er u̱ de tenger mayange ga yô.” (Pasalmi 104:5; Yesaia 45:18) Ka uumace mba wan afer i lu va timin ve kera gbem sha won ye, ka tar u se tem sha u ne ga. Mtim ve la una lu er ka a̱ nande kwagh sha usu nahan. Ishember i usha la di ashighe kpishi ka a ter i yô, i ôron kwagh u kwavaôndo shin abeen ape asan a lu la, gayô ijiir i Aôndo i teman. Akaa ne cii mba timin a ga.

Er i tese sha heen nahan, ior kpishi ka ve kav akaa a ve ôr ken Bibilo la shami ga. Kpa er nan Aôndo a de ér kwagh a lu nahana? Alaghga mbagenev vea kaa ér: ‘Er Aôndo a hembe kwaghfan cii shi a fe akaa cii yô, yange ma na se takerada u i nger u wang sha gbenda u hanma or nana ôr kpa a taver nan u kaven ga yô. Kpa er nan ve a er nahan ga?’ Nenge ase atôakyaa atar a a ne ve ior kpishi ka ve kav akaa agen a i nger ken Bibilo la shami ga yô.

1. I nger Bibilo ér i lu mba ve hiden a iyol ijime shi ve keghen iyol u henen kwagh la tseegh ve kav i ye. Yesu yange kaa a Ter na ér: “M ngu sughun We, Tere, Ter u Sha man tar, sha  er U yer mbafankwagh man mbakavenkwagh akaa ne, kpa U gem U pase anikyundanev a yô.” (Luka 10:21) I nger Bibilo sha gbenda u a lu mbaasemaamimi tseegh vea kav i ye. Ka ior mba ve kenden a iyol sha, ve nengen ér ve mba “mbafankwagh man mbakavenkwagh” la je ka ve nôngo u kaven akaa a i nger ken Bibilo la shami ga ye. Kpa ior mba ve ôron Bibilo a iyolhiden a mi ijime, ve keghen iyol u henen kwagh er “anikyundanev” shin mbayev nahan la, mba hembe kaven loho u Bibilo sha inja. Sha kpôô yô, Aôndo na i nger Bibilo sha kwaghfan!

2. Bibilo ngi sha ci u ior mba mimi mba ve keren iwasen hen Aôndo sha u kaven i la tseegh. Yesu yange tese ér gba u saa a wase ior ve, vea kav ityesen na ye. Kpa yange gba u a wase ve nena? Yesu pase ér: “Orsurunshima, ka Icighan Jijingi je la, u Ter Una tindi ken iti Yam yô, ka Un je, Una tese ne akaa cii” ye. (Yohane 14:26) Sha nahan yô, Aôndo ka a na icighan jijingi, u a lu tahav nav mbu hemban cii la, a wase se u kaven akaa a se er ken Bibilo la. Nahan kpa mba ve suur sha Aôndo ér a wase ve u kaven Bibilo ga la cii ka a ngohol jijingi na hen a ve kera, nahan i lu inja er loho la taver ve u kaven nahan. Shi icighan jijingi ka a mgbegha Mbakristu mba ve lu a mfe sha kwagh u Bibilo la u wasen mba ve soo u seer kaven i la.—Aerenakaa 8:26-35.

3. Akaa agen a i nger ken Bibilo la ka i gba u shighe a va kuma cii ve orumace nana kav inja i a ye. U tesen ikyav yô, yange i kaa a profeti Daniel ér a nger loho ugen sha kwagh u ken hemen. Nahan ortyom u lu lamen a na la kaa ér: “We Daniel cir akaaôron man ver ikyav sha ruamabera ne zan zan sha shighe u mkur.” Ken anyom uderi imôngo a karen ken ijime la, ior kpishi ôr akaa a i nger ken takerada u Daniel la, kpa fatyô u kaven inja i a jighilii ga. Jighilii je yô, Daniel iyol na je kpa yange kav inja i akaa agen a yange nger la ga. Yange kaa a iyolhiden a mi ijime ér: “M ungwa, kpa m kav ga.” Kpa ken masejime yô, ior va hii u kaven kwaghôron u profeti u Aôndo, u Daniel yange nger inya la, kpa ka er yange va ar sha shighe u Aôndo ver la nahan ve, ior hii u kaven ye. Ortyom la yange pase Daniel wang ér: “Yem tsô Daniel, gadia i cir akaaôron la; i ver a ikav zan zan ar sha shighe u mkur la.” Ka unô yange lu u vea va kav loho shono? Lu u or “môm ken mbaaferev nana kav ga; kpa mba ve lu a kwaghfan yô, vea kav.” (Daniel 12:4, 8-10) Aôndo pasen inja i akaa agen ken Bibilo ga, saa ka i va kuma sha shighe u a soo ér ior ve fa la.

Shighe ngu u yange Mbashiada mba Yehova kav ma kwagh u ken Bibilo shami ga, sha ci u shighe lu a kuma u a fa un ga yôô? Een. Kpa shighe va kuman yô, Aôndo ta iwanger sha kwagh shon, nahan Mbashiada mba Yehova nyôôso mkav ve la. Ve na jighjigh ér, u eren nahan la, ve mba dondon ieren i mbaapostoli mba Yesu. Yange Yesu una kôôm ve yô, ve hide a iyol ijime ve sôr mnenge ve la.—Aerenakaa 1:6, 7.

Mnenge u shami ga u anwankwase la yange lu a mi sha kwagh u abeen la a fatyô u lun kwagh u wan sha ada ga. Nahan kpa, kwagh u Bibilo i tese la ka kwagh u vesen u una wase uma wou yô. Loho u Bibilo ngu a inja tsung je ka kwagh u or môm nana ker u ôron u sha tseeneke u nan kaven ga. Sha nahan yô, ker iwasen sha er u kav kwagh u ú lu ôron la yô. Ker i hen mba ve henen Bibilo a iyolhiden a mi ijime, shi ve suur sha icighan jijingi u Aôndo ér a wase ve u kaven i, shi ve ne jighjigh ér se mba sha shighe u Aôndo a soo ér ior ve zua a mfe u Bibilo i hemba ave a tse la. De kera we a wa ahô ga, lam a Mbashiada mba Yehova, gayô za ôr ityakerada ve, i ve tôv sha kwagh zulee ve gber la, hen ijiir ve i sha Intanet i jw.org/tiv la. Bibilo kaa ér, ‘aluer u yila mkav’ yô, u zua a “mfe u fan Aôndo.”—Anzaakaa 2:3-5.