Yange i maren hen anijiir ugen, i yilan ér Paddington, hen geri u London, ken tar u Ingila. Lu ijiir i ior ngee her kpishi yô. M lu vea ngôm man anmgbianev av mba kasev utar mba vesen. Ter wase yange lu vea vese kpa va undu se, sha ci u msôrom ya tor ken a na.

Shighe u m lu wanye la, ngôm tesem u eren msen hanma tugh. M lu a Bibilo i cuku, lu Upasalmi tseegh i nger ker ye. Shighe gen la m ôr kwagh ugen ken takerada wam ugen u u lu u kwaghaôndo ga yô, i kaa ér: “Iyange igen sev a hungwa a av or môm nana kera shi ga.” Kwagh ne na ishima zam iyol kpishi; tugh mbura cii m yav sha gambe per m lu henen sha kwagh u ken hemen. M kaa ken ishima yam mer: ‘Ka uma cii ne ga. Ityôkyaa i m lu uma jim yô ka nyi?’ Yange m soo u kpen ga!

Kwagh ne na yô, ahir a eren gba saren mo tsung. M hii u keren mer me lam a mbakpenev, m zaan hen iwar i iin mbakpenev vea azende am a sha makeranta, shi m nengen ufiim mba tesen akaa a cieryol vea ve. Yange se fa er i lu ufiim mba cieryol yô, kpa ve gema ve doo se u nengen.

Yange m hii dang u eren shighe u m lu anyom pue la. M hii u man taav, ica gba ga je maa taav u man ya tor ken a mo. Shighe kar yô, m va gema man ikya kpaa. M va nyer anyom 11 yô, m hii u benden ikyôhô. Shin er yange m soo ihuma i msôr ga nahan kpa, m gema m soo msôrom ma hunden. Shi m soo ityogholough man amar a vinen. Yange m neer upati mba zenden tugh, a̱ lu han han kpa m nôngo u zan. Yange tugh mbu a ile yô, m ôso liee m due, a̱ hiin u van waang waang yô, shi m ôso liee m hide. Sev mbu a aven yô, m vôr, nahan ashighe kpishi mea za makeranta kpa m za gba agbum m hide. Yange mea lagh mea lu sha mi her kpa m maan msôrom ken klase.

Yange m bee makeranta kpa ikyaren yam doo ga. Ngôm yange fa er m saa ashe m za kighir ga, nahan ishima vihi un a mo tsung. Se zôhô, maa m yevese m undu ya. M za lu vea Tony, shiôr yam igen sha anshighe kpuaa. Yange iin shi teen mcimbim ma bom, shi eren ipila kpoghuloo. Ica i gbe ga yô, m wa iyav vea na, m mar wan u nomso sha anyom 16 tseegh.

Yange m hii zuan a Mbashiada mba Yehova shighe u m tsaan hen iyaagh ki kasev mba maren ônov hen ya tsaan vea ônov vev yô. Mbahemenev mba enier yange ve nam ruumyou her môm m lu tsan ker. Kasev uhar mba ve lu Mbashiada mba Yehova yô, vaan va henen Bibilo vea mbayevkasev mbagenev mba ve kpa ve mar hen ya yô. Iyange igen yô, mo kpa m nyôr kwaghhenen la vea ve. Yange m soo u tesen ve mer mba shami ga. Nahan kpa, ve nam mlumun sha mbampin av ken Bibilo sha ishima i legh legh shi ve lam wanger. Yange ve lu inja kundu kundu, nahan kwagh ve doom kpishi. Maa m lumun mer ve va hen Bibilo a mo.

Ica i gba ga je maa m hen kwagh ken Bibilo u yange gema uma wam yô. Hii yev wam je yange m soo u kpen ga. Kpa hen shighe ne, m va hen kwagh u Yesu yange tese sha kwagh u mnder u shin ku yô! (Yohane 5:28, 29) Shi yange m va fa mer kwagh wam gba Aôndo ishima. (1 Peteru 5:7) Kwagh u i er ken Yeremia 29:11 la yange hemba kôron mo ken ishima cii. I kaa her ér: “Gadia M fa mbamhen mba M lu henen sha a ven ne, kape TER A kaa ne, ka mhen u bem, ka u bo ga, sha u nan ne ishimaverenkeghen i dedoo ken masetyô.” Tsô m hii u nan jighjigh mer mo kpa me fatyô u va lun uma gbem sha won ken Paradiso shin tar.—Pasalmi 37:29.

Mbashiada mba Yehova yange ve tesem dooshima u mimi. Shighe u m hii zan mkombo vea ve la, yange kundum iyol kpishi, hanma or lu a mo sar sar! (Yohane 13:34, 35) Gbenda u ve er kwagh a mo la kaha kposo a gbenda u yange i eren kwagh a mo ken côôci igen i m vanden zan yô. Mbashiada mbara yange ve ngohol mo ken mbamlu mba m lu ker la cii. Yange ve wa ishima a mo, ve nenge sha mbamgbe av, shi ve wasem sha igbenda igen kpishi kpaa. Lum er m ngu ken zege tsombor u a wem ikyo nahan.

Bibilo i m lu henen la wasem u fan mer gba u me gema uma wam sha er una zua sha atindi a Aôndo a wang la yô. Yange lum ican u den taav u man. Shi yange mea ungwa ityogholough mbigenev yô, mbi kende isharen yam i man ikya la, nahan m de u ungwan mbi. Shi yange m soo u den msôrom ma hunden, nahan m de uiniongo man upati mba zan tugh, mba vea na me hingir u za man msôrom hunden la. Shi m kôr azende a dedoo a aa wasem me za hemen u sôron uma wam yô.—Anzaakaa 13:20.

Hen shighe ne, Tony kpa lu henen Bibilo vea Mbashiada mba Yehova. Er Mbashiada mban na un mbamlumun sha mbampin nav ken Bibilo yô, un kpa hingir u nengen ér ka mimi un lu henen ye. Yange gema akaa kpishi ken uma na: a undu azende na a yange eren ipila vea ve la, shi de iv man afer a eren kua ikya i man. Mo vea na cii se nenge ser saa se de u eren idya, se hide se vôso ayol a ase sha tindi ve a doo Yehova a vese shi se hemba nengen sha wan wase la tsembelee ye. Nahan se er ivese ken inyom i 1982 la.

M umbur er yange m ker ngeren mba ken magazin u Iyoukura man Awake! * mba ve er kwagh u uma u ior mba yange ve sôr akaa ken uma ve a mo kpa m lu nôngon mer me sôr la yô. Ikyav ve la yange i taver mo ishima kpishi! Kwagh ne yange nam agee a zan hemen u nôngon kwagh kpoghuloo vôron ga. M za hemen u sônon Yehova mer a de yen ishima sha kwagh wam ga. Mo vea Tony yange se er batisema se hingir Mbashiada mba Yehova ken uwer u Julai, 1982.

Ikyar i m ye vea Yehova la war uma wam. Mo vea Tony se nenge er Yehova a lu wasen se ken ashighe a taver yô. Se hen u suur sha Yehova ken ashighe a taver ne, shi se nenge ser ngu wasen tsombor wase hanma shighe cii.—Pasalmi 55:22.

Doom er m wase wan wase u nomso man u kwase la u fan Yehova er mo nahan yô. Shi saan mo iyol u nengen er ônov vev kpa ve lu fan Aôndo seer yô.

M kera lun per tugh henen sha kwagh u kuugh shin mlu u ken hemen ga. Mo man Tony cii se mba eren tom kpoghuloo u zenden sha atôônanongo a Mbashiada mba Yehova hanma kasua taver ior asema. Ka se za kohol ve se tesen ior ser aluer ve na Yesu jighjigh yô, ve kpa vea fatyô u lun uma gbem sha won.