Yange m vese hen Puerto Limón, geri ugen hen kpemnger, vegher u sha ityoughkitaregh, ken tar u Costa Rica. Mbamaren av mar se anigheni, mo m lu wan ve u sha utaankaruhar. Terem yange kpe shighe u m lu anyom anigheni la. Nahan ngôm za hemen u yesen se tswen.

Baseball yange ya tor ken a mo. * M hii u gbidyen bol ne shighe u m lu yev la je. M va zurum anyom ikundu yô, m nyôr kwebolough u gbidyen bol ne, u i kimbin u inyaregh ga yô. Shighe u m lu anyom 20 kar la, m lu gbidyen bol vea kwebolough ne, maa orgen u eren tom u zenden keren mbayev mba fan bol kaa ér mo m za gbidyen bol sha inyar vea kwebolough u vesen ugen ken tar u Nicaragua. Nahan kpa, er shighe ne ngôm lu dedoo ga, man m lu nengen sha a na yô, m soo u yemen za lun ken Nicaragua ga. Nahan m venda. Shighe kar yô, or u keren mbayev mba fan bol ugen di shi kaa ér mo m za kohol kwebolough u baseball u tar u Costa Rica la. Kwebolough ne lu a mba gbidyen bol mbagenev mba i tsua ve ken ikwe igen wue wue i i gbidyen bol u sha inyar ga yô. Kwa ne yô, m lumun. Yange m gbidye bol vea kwebolough u tar u Nicaragua ne, hii ken inyom i 1949 zan zan inyom i 1952 la. Hen shighe ne, se gbidye bol vea ikwebolough igen acin imôngo ken tar u Cuba man Mexico man Nicaragua. M lu orkeren bol, shi yange m ker bol tsembelee, shi shighe gen se zua bol ciligh ciligh i kuma kwa 17, man kwa môm kpa m gba bo sha bol wam u keren ga. Yange mbageren bol vea yilan mo iti nahan, i doom kpishi!

Kwagh er vihi yô, yange m lu eren ijimba kpaa. Shin er m lu a ishiôr i môm nahan kpa, m keren kasev mbagenev kpaa. Shi m maan msôrom kpishi. Iyange igen la, m gba msôrom, m va nderen yô, m kav iyol yam sha gambe, kpa m umbur er yange hii ve m hide hen ya ga! Shi yange m gbidyen do kpaa.

Shighe u m eren akaa ne la, ngôm er batisema ken kwaghaôndo u Mbashiada mba Yehova. Yange nôngo ér mo kpa m dondo kwaghaôndo na ne, kpa sha hiihii la fatyô ga, sha ci u m uve ityough ken kwagh u anumbegh. Yange mea gba karen iyol yô, a va kuma shighe u yan kwagh je kpa, ijen i kôrom ga! Ishima yam cii lu sha kwagh u anumbegh. Yange m soo baseball hemba hanma kwagh!

Nahan kpa, shighe u m lu anyom 29 la, m vihi iyol kehelee zum u m lu nôngon mer me kôr bol yô. M sôron iyolvihin la ngi been yô, m  de bol u gbidyen sha inyar. Nahan kpa, m lu tsaase kwebolough u baseball ugen u u gbidyen bol u sha inyar ga yô, ikyua a ya wam.

Ken inyom i 1957 la, i lôhôm mkohol u vesen u Mbashiada mba Yehova lu eren hen agirigi u anumbegh u yange m vande gbidyen baseball her yô. Er m za tema vea ior imôngo yô, m nenge Mbashiada mba Yehova lu eren kwagh sha icivir, man ieren ve ne kaha kposo a ieren i ikpelaior i yange i va u va nengen baseball, i i ngoron dang dang la. Kwagh u m nenge ne wasem m hii u henen Bibilo vea Mbashiada shi zan mbamkombo vev.

Yange m hen akaa kpishi ken Bibilo a doon mo tsung. U tesen ikyav yô, Yesu yange tsengaôron ér, ken ayange a masejime yô, mbahenen nav vea pase loho u dedoo u Tartor u Aôndo a tser tar. (Mateu 24:14) Shi m fa er Mbakristu mba mimi ve eren tom u pasen kwagh sha u zuan a inyaregh ga yô. Yesu yange kaa ér: “Ne ngohol gbilin, na nen di gbilin kpaa.”—Mateu 10:8.

Er m lu henen Bibilo la, m tôô kwagh u i̱ ôr la m kar sha ieren i Mbashiada mba Yehova. M nenge er ve lu nôngon kpoghuloo ér vea pase loho u dedoo u Tartor u Aôndo sha tar cii yô, nahan kwagh ne doom kpishi. Shi m nenge er ve lu a ieren i nan mbagenev kwagh, i Yesu wa Mbakristu kwagh ér ve tesen i la. Yange m ôron kwagh u i nger ken Marku 10:21, ape Yesu kaa ér, “Va dondo sha a Mo” la yô, gba sarem mo u hingir Orshiada.

Nahan kpa, yange tôôm shighe u eren kwagh ne. U tesen ikyav yô, yange m gbidye do a namba wam u “doon ikyôr,” hen ijiir i gbidyen do i ken tar la anyom kar kpishi. Nahan kpa, m va kav ken Bibilo mer Aôndo venda mbacivir “akombo a doon ikyôr,” kua mbaeren hua. (Yesaia 65:11; Mbakolose 3:5) Nahan m kange ishima mer me de do u gbidyen. Ken kasua u m de do u gbidyen la, namba wam u “doon ikyôr” la ya ishor sha iyange i Lahadi jighjigh! Ior naham tar sha ci u m gbidye do ken kasua la ga yum, shi ve tuur mo ken ityô dông ér m hide m za gbidye do, kpa m venda. Hii shighe la je mayange m kera gbidye do ga.

Yange m tagher a ikyaren i karen “orhe” u m haa iyol la, sha iyange i í erem batisema sha mkohol u vesen u Mbashiada mba Yehova la. (Mbaefese 4:24) Sha iyange shon la aikighe, m hidi m za nyer hen hôtel u m tsa her la yô, m nenge ishiôr yam i tse tema hen hunda u ruumyou wam la ken won lu keghen mo. Maa a kende a kaa a mo ér: “Sammy wam, se ya tar i kundu se iyol.” Kpa her je m venda a na m kaa mer, “Ei!” Shi m umbur un mer hegen m ngu dondon kwagh u Bibilo i er sha kwagh u idya i eren la. (1 Mbakorinte 6:18) A gbidye iwer wener: “Uwu.” Maa a gba lahan mnenge u Bibilo sha kwagh u idya i eren, shi sendegh wener se hide se za hemen u lun imôngo. Kpa m kar ving m nyôr ken iyou, m kôr hunda m wuhe. Nyian ne, saan mo iyol kpishi u kaan mer, hii shighe u m hingir Orshiada u Yehova ken inyom i 1958 la je zan zan, ma shighe môm kpa m hide m er akaa a yange m de la ga.

Mbamtsera mba m zough a mi sha u dondon akaawan a Bibilo la ngee je er me nger takerada sha mi nahan! Mbamtsera mban mbagenev yô, m zua a azende a injaa, shi m ngu a ishimaverenkeghen sha akaa kpishi, shi m zua a msaanyol u mimi.

Zan zan hegen kpa ka i doom u gbidyen baseball, kpa kera ka kwagh u hiihii ken uma wam la ga. Shighe u m gbidyen baseball la, m zua a inyaregh man icivir, kpa akaa ne cii va bee. Nahan kpa, ijende i m ye vea Aôndo man anmgbianev av mba ken Kristu la yô, ia tsa gbem sha won. Bibilo kaa ér: “Tar yô, ngu karen kera kua isharen i u kpaa; kpa u nan eren ishima i Aôndo yô, nan ngu lun gbem sha won.” (1 Yohane 2:17) Hegen ne, Yehova Aôndo man ior nav doom ishima hemba hanma kwagh cii!