Yange m vese hen ijiir igen hen kpe geri u Tampere tar u Finland. Yange i lu her ving shi i lu dishi dishi kpaa. Tsombor wam eren kwaghaôndo yum ga, kpa u nenge ér doo u or a za makeranta shi nana lu a inja i dedoo. Ngôm ka kwase Jaman, shi shighe u u m lu cuku la, ashighe agen se za ken Jamani ape mbamaren mba ngôm lu la.

Hii iyev wam je m soo anumbe a eren. Shighe u m lu vesen la, m er anumbe kposo kposo; kpa m va kom anyom 14 nahan yô, m tsua mer me na ishima sha tennis. Shighe u m lu anyom 16 la, m kar iyol kwa har gayô kwa tar ken iyange. Ikwa i ihiar la, ior ve tesen mo u gbidyen er i gbidi ken gesa la; a va luun aikighe yô, m gba za karen iyol tswen. Akaa a lu ken tennis u gbidyen kposo kposo la, lu kwagh u na iniumbe la doom yô. Kwagh ne lum gbenda u tsaase ishima yam man iyol yam. Er yange i doom u lun vea azende a am shi benden an-ikyôhô sha ashighe agen nahan kpa, mayange m ma mcimbim ma bom shin m ma ikyôhô kar ikyaa inya ga. Uma wam cii yange saa sha kwagh u tennis, bol ne lum tamenkwagh.

Yange m hii u gban gesa u ATP shighe u m lu anyom 17 la. * Yange m hemba gesa mban mbagen, maa m hii u duen iti ken tar wam. Shighe u m lu anyom 22 la, m lu môm ken iorov 50 mba hemban fan tennis u gbidyen sha tar cii.

Yange m zende sha ityar kposo kposo anyom imôngo, m lu gbidyen tennis. Yange m nenge a ajiir a doon kpishi, kpa shi m nenge a mbamzeyol mbagen mba ve lu sha tar kpaa, er ifer man mcimbim ma bom ma man kua akaa a vihin inya shin ahumbe man mngerem nahan. U tesen ikyav yô, shighe ugen se za ken tar u Amerika, i kaa a vese ér se de ze sha ajiir agen ken ugeri vev mbagen ga sha ci u ifer i dumbur yô. Kwagh ne yange vihim kpen kpen. Bee kera yô, shin er yange m lu eren kwagh u doon mo ishima nahan kpa, iyange a been yô, i lum a iwasen ga.

Ishiôr yam Sanna yange hii u henen Bibilo vea Mbashiada mba Yehova. Yange wa hômon mo kpuaa u nengen er a we iyol sha kwaghaôndo yô, kpa m yange un u henen kwagh ga. Ken inyom i 1990 la, se er ivese, maa inyom hurugh yô, Sanna er batisema hingir Orshiada u Yehova. Er m na jighjigh mer Aôndo ngu nahan kpa, m nenge mer m ngu or u me er kwaghaôndo ga. Yange m umbur er mama u ngôm yange a ôr Bibilo kpishi, shi yange tesem u eren msen je kpaa yô.

Iyange igen la, mo vea Sanna se za Orshiada ugen vea kwase na inya, iti i or la ér Kari. Kari yange tesem kwaghôron u profeti u ken Bibilo u a er kwagh u “ayange a masejime” la. (2 Timoteu 3:1-5) Kwagh ne yange doom, sha ci u kwagh ne pase er i hii ve akaa a vihi sha tar kpishi yô. Sha iyange la yô, se kera lam kwagh u kwaghaôndo kpishi ga. Hii shighe la je, m gema lamen vea Kari sha kwagh u Bibilo, man hanma kwagh u mea hen cii a wanger mo wang. Er m luun a shighe ga shi m zenden sha kpishi yô, yange i taver se u zuan fele fele, kpa Kari yina ishima ga. Yange a ngerem washika sha u nan mo mbamlumun sha mbampin mba m pine shighe u se lu henen kwagh yô. Bibilo na mbalumun mba wanger sha mbampin mba vesen mba m lu a mi ken uma la cii; nahan kure kure tsô, m va hii u nengen a loho u Bibilo jimin cii, ér Tartor u Aôndo ua va na a er ishima i Aôndo sha tar. Yange m hen iti i Aôndo kua akaa a A er sha ci wase la nahan kwagh la kôrom ken ishima saa her. (Pasalmi 83:18) Kwagh u yange hemba kôron mo ken ishima yô, lu nagh ku ipaan ku yange na la; nagh kun lu di kwagh u gba u a er shin kwagh u i er sha ci u tindi tese tsô ga, lu dooshima jighilii Aôndo tese ye. (Yohane 3:16) Shi yange m hen kpaa mer, me fatyô u lun ijende i Aôndo shi me fatyô u va lun uma ken paradiso u bem una lu ker yô. (Yakobu 4:8) Maa m hii u pinen iyol yam mer, “Me tese iwuese nena?”

Yange m hii u gbidyen kwar zulee sha gbenda u m lu eren uma wam la. M hen ken Bibilo mer u nan or kwagh ve a msaanyol u hemban cii, shi sarem u pasen ior mbagen akaa a m ne jighjigh a mi la. (Aerenakaa 20:35) Er yange m eren anumbe u zuan a inyaregh yô, ayange 200 ken inyom cii m lu hen ya ga, m yem gesa u gban. Uma u tsombor wase cii har sha mo; u karen iyol shi eren akaa agen shi duen iti ken anumbe a am. Nahan m nenge mer gba u me gema.

Yange m fa je mer aluer m de tennis u gbidyen sha ci u m soo u eren kwaghaôndo yô, ior kpishi a lu ve dang, vea kav ga. Kpa ian i seer fan Yehova shi va zuan a uma u tsôron la yange i hemba gban mo kwagh a nyityô iyua i me zua a mi sha u gbidyen tennis cii, nahan yange taver mo u tsuan kwagh u me er yum ga. M kange ishima mer me wa ikyo sha kwagh u ior a ôr ga, lu mo gba u me tsua kwagh u me er ye. Ivur Bibilo i yange i hemba wasen mo u vendan mkighir ne yô, lu Pasalmi 118:6, i kaa ér: “TER ta ikyaa a mo, me kera cia ga, ka nyi je or á ereme?”

Hen shighe shon môm ne, ior mbagen va ér vea nam kôntrat, vea lu kimbin mo inyaregh; lu kwagh u anyom imôngo, nahan ma m lu a zayol shio. Nahan kpa yange m vande tsuan kwagh u me er yô ken ishima yam, nahan m venda tom la shi m de u gban ugesa mba ATP la. Yange m za hemen u henen Bibilo, nahan sha iyange i Julai 2, inyom i 1994 la, m er batisema m hingir Orshiada u Yehova.

Mo yô, yange kwagh er ken uma wam u vihin tsung u na m hii u henen sha kwagh u Aôndo ga. Shi ka m nenge mer yange m lu keren mimi kpaa ga. Yange m nenge mer uma wam doo shi m ngu a hanma kwagh u m soo yô. Kpa m za asegh sha mimi u ken Bibilo la aburabur, inja er a tema ngu keghen mo ér m va zua a na nahan; m mase kaven mer uma ngu a inja jim, shi uma wam doo hegen hemba er yange m hen la! Tsombor wase ngu kôôsôô shi ngu ken mzough. Doom kpishi er ônov av mba nomso utar cii ve dondo ikyav yam yô, ve hingir ior mba eren anumbe ga, ve hingir Mbakristu.

Zan zan hegen kpa ka i doom u gbidyen tennis. Ka m eren tom u u gbe u zough a tennis u gbidyen yô, sha er me zuan a kwagh yô. M ngu kooci shi m nengen sha ijiir i gbidyen tennis igen. Kpa uma wam kera shi sha kwagh u anumbe ga. Ngise la, hanma kasua yô, m kar iyol ahwa kpishi sha er me seer fan tennis u gbidyen shi me hemban ugesa yô. Kpa er hegen m lu eren tom u pasen kwagh hanma shighe ne, ka i doom u tôôn shighe wam wasen ior u henen akaawan a Bibilo a yange gema uma wam la, shi dondon a ken uma ve. M zua a msaanyol u hemban cii sha u veren kwagh u mlu wam vea Yehova hiihii ken uma shi pasen mbagen ishimaverenkeghen yam i doon tsung ne.​—1 Timoteu 6:19.