Yange i marem hen angeri u San Juan Chancalaito, kpentar u Chiapas, ken tar u Mexico. Tsombor wam ka ior i Chol, se due ken ior i Maya. Mbamaren av mar se 12, mo m lu wan u sha utaan. Shighe u m lu wanye la, Mbashiada mba Yehova hen Bibilo a mo man anmgbianev av. Kpa kwagh er vihi yô, yange m dondo kwaghwan u Bibilo la shighe u m lu gumor la ga.

 Shighe u m nyôr anyom 13 la, m hii u man mcimbim ma bov shi iin ior akaa. Hen shighe shon môm shi m due hen ya m gbaa zenden sha ajiir kposo kposo tsô. M nyer anyom 16 yô, m hii u eren tom hen ijiir i kahan ikya. M er tom her kuma inyom jimin. Tugh mbu gen la se lu yemen a ikya poo shin tso maa mbaeren tom hen ijiir i teen mcimbim ma bov igen va a ikyav mbi tswamev va ta num sha vese. Yange m senda m tume shin mnger m ôô uwe m za due shin hemen ve m war ye. Maa m yem ken tar u Amerika.

 Ker kpa shi m za hemen u teen mcimbim shi m seer nyôron ken zayol. Shighe u m lu anyom 19 la, dasenda kôrom za wuhe sha ci u m ii shi m nôngo u wuan or. Ken purusu kpa shi m za kohol annongo u eren tswam, shi m er aferakaa agen kpaa. Kwagh la na yô, i yem a mo ken purusu ugen ken Lewisburg, kpentar u Pennsylvania.

 M yemen ken purusu u ken Lewisburg la yô, ieren yam shi za hemba vihin a vihi. Er yange m vande gberen akaa a annongo wam u eren tswam la iyol yô, m ngôôr kohol annongo ne ken purusu u he ne ga. Yange m seer vihin tu shi hanma shighe m nôngon num. Iyange igen la, annongo wam u eren tswam la nôngo num vea annongo ugen ken iyagh ki purusu la. Yange se nôngo num vihi kpen kpen, se lu gbidyen ior ikyon i gbidyen baseball shi tan ior akaa a eren anumbe a mi. Yange wada mba kuran purusu mbara va ta tia gaasi ve, ve kôrcio u kôron num la ye. Maa mba nengen sha purusu la yem a mo za verem shin ijiir i i hemban vihin i i ver sha ci u ubombaiorov la. Yange m ngôôr vihin ishima ga, shi m lam côu côu. Yange m ngôôr gbidyen or ga. Jighilii yô, lu ruam wam. Shi m wa ikyo cuku sha ieren yam la ga.

 Yange mba za kenden mo shin ijiir i i hemban vihin i i ver sha ci u ubombaiorov la yô, ashighe kpishi m lu ken sev wam la, nahan m hii u ôron Bibilo sha ci u m lu a kwagh u eren ga. Shighe kar yô, wada ugen la va nam takerada u Ú Fatyô u Lun Uma Gbem sha won ken Paradiso Shin Tar la. a M gbe ôron takerada u pasen Bibilo ne yô, m umbur akaa kpishi a yange m hen shighe u m lu wanye, Mbashiada mba Yehova ve va henen Bibilo a vese la. Yange m hide m gbidye kwar m nenge er ieren yam i pilagh ne i ne uma wam a ker kunya kpishi yô. Shi m hen sha kwagh u tsombor wam kpaa. Er anmgbianev av mbakasev uhar hingir Mbashiada mba Yehova yô, m kaa ken ishima mer, ‘Ve yô, vea va lu uma gbem sha won.’ Nahan m hide m pine iyol yam mer ‘Er nan mo yô, i lu nahan ga?’ Ka hen shighe ne maa m kange ishima mer me gema inja ye.

 Nahan cii kpa, m nenge mer gba u me ker iwasen ve me fatyô u geman inja ye. Nahan hiihii yô, m er msen hen Yehova Aôndo, m zamber a na mer a wasem. U dondon yô, m nger washika m tindi a mi shin branci u Mbashiada mba Yehova u ken tar u Amerika mer i va hen Bibilo a mo. Afishi a branci maa tindi or ken tiônnongo ér nana va lam a mo. Hen shighe la, lu ior mba hen tsombor wam tseegh i lumun ér ve va nengen a mo ye, nahan Orshiada u ken tiônnongo la a tindim a uwashika mba taver mo ishima kua ityakerada i pasen Bibilo. Kwagh la na yô, seer saren mo u geman inja.

 Kwagh u vesen u yange m er yô, m tsua mer me due ken annongo u eren afer u m lu ker anyom kpishi la. Orvesen wase u ken annongo la kpa yange lu ken vegher u purusu u yange i verem la, nahan iyange igen ka ne se ian kpuaa yô, m za kohol un m kaa a na mer m soo u hingir Orshiada u Yehova. Kwagh er kpiligh mo iyol yô, a kaa ér: “Aluer u soo u hingir mimi yô, za hemen. Me fatyô u tagher kwagh a Aôndo ga. Kpa aluer u ngu keren a ker gbenda u undun se yô, u lan ga.”

 Ken anyom ahar a dondon la, wada mba hen purusu la nenge er m lu geman inja yô. Kwagh la na yô, ve kera eren a mo nyaghen nyaghen ga. U tesen ikyav yô, yange vea duen a mo u za ôôn iyol kpa ve kera wam ankwa sha ave ga. Wada ugen la je yô, yange va taver mo ishima ér m za hemen a mgem wam la. Jighilii yô, ken inyom yam i masetyô ken purusu la, yange i hide a mo ken purusu ape i kuran ior tsoomoon ga la. Yange m tsa ken purusu anyom pue, maa ken inyom i 2004 la, i pasem maa i tôôm shin bôôsu u mbakwarev i hide a mo ken tar u Mexico.

 M va nyer ken Mexico yô, m ker Iyou i Tartor i Mbashiada mba Yehova. Mkombo u hiihii u m za la, m hua akondo a ken purusu sha ci u lu cii ikyondo i injaa i m lu a mi je la. Er yange mluashe wam doo ga nahan kpa, Mbashiada mbara ngohol mo sar sar. Er m nenge a erdoo ve la yô, m fa je mer m ngu ken atô u Mbakristu mba mimi. (Yohane 13:35) Ken mkombo la je, mbatamen mba ken tiônnongo maa sôr akaa sha er or a hen Bibilo a mo yô. Inyom kar i môm yô, m er batisema sha iyange i Setemba 3, inyom i 2005, m hingir Orshiada u Yehova.

 Ken uwer u Janawari inyom i 2007 la, m hii u eren tom u pasen kwagh hanma shighe la, m tesen ior Bibilo ahwa 70 hanma uwer. Ken inyom i 2011 la, m za Makeranta u Henen Bibilo Ú Anmgbianev mba Nomso mba Lun Kwav la (hegen i yer ér Makeranta u Mbapasen Ivangeli i Tartor la). Makeranta ne yange u wasem kpishi u eren ityom yam ken tiônnongo.

 Ken inyom i 2013 la, m vôso Pilar, kwase wam u doon mo ishima. Ka a ôr sha asenge wener ka i taver un u lumun a akaa a ka m ôr un mer ngise m eren la. Mayange m kera hide m yem sha igbenda yam i tse la ga. Mo vea kwase wam cii se na jighjigh ser or u m lu nyian ne tese er Bibilo i lu a tahav mbu geman ior yô.​—Mbaromanu 12:2.

 M nenge mer mkaanem ma Yesu ma ken Luka 19:10 la ma kure sha mo. Yesu kaa ken ivur la ér: “[M] va sha u keren man u yiman kwagh u a saa yô.” M kera nengen mer uma wam ngu kwagh u saan ga. Shi m kera zenden m vihin ior iyol ga. Bibilo wasem yô, hegen m ngu a awashima ken uma, ka m lu bem bem a ior mbagen, man u hemban cii yô, m ya ikyar i dedoo vea Yehova u a gbem la.