Yange i marem ken geri u Montreal, geri u hemban kehen ken ipaven i Kanada i Quebec la. Mbamaren asev mar se unyiin; yange ve soo se kpen kpen. Ve yese se hen ikyasen i Rosemont. Yange se lu imôngo bem bem shi i saan se iyol kpaa.

 Shighe u m lu wanye la, kwagh u Bibilo doom. M umbur shighe u m lu anyom 12 la, m ôr kwagh u uma u Yesu ken Ikuryan i He la nahan doom kpishi. Gbenda u ior doo Yesu ishima shi kunya u kôr un a ve la yange u kôrom ken ishima kpen kpen, nahan mo kpa m soo u lun er Yesu nahan. Kpa kwagh er vihi yô, m ngur vesen shi lun imôngo a ior mba bov yô, isharen la gba been kera.

 Terem yange lu or u tôngon busa, man a nam di busa na la tseegh ga, kpa na m soo kwagh u ityogholough je lu kwagh u m na ishima sha mi yô. Yange ityogholough mbi doom kpishi, nahan m ngôôr ga je maa m hen jita i kuhwan. Shighe kar yô, mo vea azende am agen maa se hii annongo u kuhwan ityogholough jang jang, shi se zende se kuhwa kwagh sha ajiir kposo kposo. Ior mbagen mba yange ve za iti ken kwagh u ityogholough mbi kuhwan yô, va kohol mo ér se kuhwan ityogholough imôngo. Maa m hii u eren ityogholough vea zege kômpeni ugen. Ityogholough yav za gwa, shi i kuhwan mbi sha mtôm ma redio ken kpentar u Quebec.

 Yange lu inja er m ngu a hanma kwagh u sarem nahan. Yange m lu gumor shi m za iti shi m lu zuan a inyaregh kpishi ken kwagh u doom u eren yô. Yange a lu atetan yô, m za er anumbe shi m lam a ior mba tôôn abaver shi m nenge a ior m nger ve sigeneca sha akaa shi m lam sha televishen kpaa. A luun tugh yô, ka u za kuhwan ityogholough shi zan upati. Yange m soo mer me cian ashe u eren kwaghmôm ga, nahan m hii u man ikyôhô shighe u m lu gumor la, ica gbe ga maa m gema man mcimbim ma bov kpaa. Yange m wa uma wam ikyo ga shi m er inja dang kpishi.

 Mbagen yange ve tômon ér ma ve lu er mo nahan sha ci u m lu er saan mo iyol nahan. Kpa ken atô yô, i lum inja er m ngu a kwagh môm ga nahan, hemban je yô, shighe u mea lu tswen yô. Yange m ure shi ishima i nyian mo. Kwagh er vihi yô, shighe u m lu zan ikyura ken ityogholough mbi kuhwan la, iorov uhar mba yange ve eren tom vea mo yô ve kpe Anakande. Kwagh la yange kundam iyol! Er ityogholough doom ishima nahan kpa, uma u ker la gema ndôhôr mo ishima.

 Er m lu zan ikyura nahan kpa, yange m fa je mer kwagh za iyol shin tar ne. Hii nan ve ka i shi nzughul a ior yum nahana? Yange lanem ishima er i hii ve Aôndo a lu eren kwagh môm sha kwagh ne ga yô. Jighilii je yô, ashighe agen m er msen m sôn Aôndo mer a wasem me kav kwagh ne. Kwa ugen la zum u m due m ningir m kuhwa kwagh sha ajiir kposo kposo m za hide yô, m hide shi m hii u ôron Bibilo. Er m kav kwagh u m lu ôron la keng ga nahan kpa, m kure ikyaa mer mkurtar zurum.

 Yange m ngur ôron Bibilo yô, i kaa ér kwa ugen la Yesu hôr kwaghyan ken deserti ayange 40. (Mateu 4:1, 2) Maa m kaa ken ishima yam mer aluer mo kpa m er kwagh ne yô, alaghga Aôndo una pase iyol na hen mo. Maa m ver iyange i me hii yô. Ka va shin kasua uhar u me hii kwaghyan u hôron yô, Mbashiada mba Yehova uhar va kumam uwegh sha hunda, maa m kaa a ve mer ve nyôr ker inja er m tindi loho a ve nahan. Orshiada ugen la iti na lu Jacques, m kenger un ken ishi jighilii maa m pine un mer, “Se er nan ve se fa ser se mba ken ayange a masejime a tar nee?” Maa a bugh Bibilo a nam ikyar, yange ôr 2 Timoteu 3:​1-5. Maa shi m sendegh ve uhar mbara mbampin kpishi, shi ve nam mbamlumun mba kuman ken ato shi wanger kpaa, nahan doom kpishi sha ci u mbamlumun vev cii har sha Ruamabera. Yange mba va sôron mo acin kpuaa yô, m mase kaven mer ityôkyaa ngi i hôron kwaghyan ga.

 M hii u henen Bibilo vea Mbashiada mba Yehova. Shighe kar yô, m hondo ityough yagh ki ki tav kpishi la, shi m hii u zan hanma mkombo ken Iyou i Tartor i i lu ikyua a mo la. Gbenda u yange ior ve ngohol mo hen mbamkombo mban ne shi seer tesen mo je ér m zua a mimi.

 Cii man m dondo kwagh u m lu henen ken Bibilo la yô, yange gba u me gema akaa ken uma wam kpishi. Kwagh ugen yô, gba u me de u man mcimbim ma bov shi me de uma wam u ijimbagh la. Shi gba u me de ieren yam i wan iyol yam ikyo tseegh la, me hemban wan mbagen ikyo. Er m lu yesen mbayev tswen yô, gba u me hen u wan ikyo sha kwagh u mlu u ken ishima man u ken jijingi u mbayev av mba uhar mban cii. Nahan m de kwagh u ityogholough mbi kuhwan, m za ker tom ugen u i kimbin mo inyaregh kpuaa yô.

 U den akaa ne la yange lum zange ga. Er m lu nôngon mer me de mcimbim ma man la, ashighe agen i va lum er doom iyol ga nahan, shi ashighe agen kpuaa m nôngo kpa i gandem nahan m ma. (Mbaromanu 7:19, 21-24) U den dang u eren la yange hemba taver mo cii. Shi tom wam u he la kpa u na m vôr kpishi man yô, lu tom u kimbin inyaregh kpishi kpaa ga, nahan iyol i kpem. Inyaregh ki yange i kimbim ken iwer itiar la lu inyaregh ki yange m zua a mi ken ahwa ahar tseegh shighe u m kuhwan kwagh la yô.

 Msen yange wasem m yina ishima u nôngon mer me sôr uma wam ga. Shi Bibilo i ôron hanma shighe la yange i wasem kpishi. Avur a Bibilo agen yange a taver mo ishima kpen kpen. Ivur igen yô, lu 2 Mbakorinte 7:1, ape Bibilo i taver Mbakristu ishima ér ve ‘wanger ayol a ve sha hanma kwagh u hôngorough u ken iyol kua ken jijingi cii’ la. Ivur igen i yange i taver mo ishima ér me fatyô u hemban aeren am a bo ne yô, lu Mbafilipi 4:13, ape i kaa ér “m ngu a agee a eren akaa cii je ken Un u A taver mo” la. Yehova Aôndo yange ungwa mbamsen av shi wasem, ken masejime yô m kav mimi u Bibilo la shi m lu dondon un ken uma wam. Kwagh la maa mgbegham u tseghan iyol yam sha ci na. (1 Peteru 4:1, 2) Yange i erem batisema ken inyom i 1997 la, m hingir Orshiada u Yehova.

 M fa dedoo mer luun er yange mea ze hemen a uma wam u tse la yô, hegen ma m kera lu ityough ndor ga. Nahan kpa hegen ne yô, saan mo iyol kpishi! Kwase wam Elvie ka kwase kpen kpen, shi ngum iveren i Yehova kpaa. Se mba eren tom u pasen kwagh hanma shighe la imôngo man ka i saan se iyol u tesen ior Bibilo kpen kpen. Kwagh ne ngu a nam iember man msaanyol je i gande. M sugh Yehova kpishi er a urugh mo a ve a mo hen na nahan.​—Yohane 6:44.