“Aluer u soo u henen kwagh u Aôndo mimi mimi yô, luun vea Mbashiada mba Yehova.” Yange m ungwa mkaanem mara nahan kpiligh mo iyol kpishi. Shighe ne, Mbashiada mba Yehova hii u henen Bibilo a mo ica lu a gba ga. Kpa de m pase kwagh u uma wam kpuaa sha er u kav er hii ve kwagh lu nahan yô.

Yange i marem hen geri u Quezaltepeque, ken tar u El Salvador. Mbamaren asev mar se 15, mo m lu wan u sha 6. Mbamaren av yange ve tesem u eren kwagh a ior sha mimi shi eren kwagh sha tindi, hii iyev wam je. Ashighe agen Orshiada u Yehova ugen u i yer iti na ér Leonardo yô, vea Mbashiada mbagen ve va ér vea va tese se Bibilo. Kpa kwagh a gbam sha kwagh u i lu tesen mo la ga, nahan m shi eren akaabo didi. Shighe u m lu anyom 14 la, m hii msôrom ma man kua mcimbim ma bom vea azende am a sha makeranta. Azende am agen maa va hii u den makeranta môm môm za kohol nongo u mbaeren afer. Kure kure tsô ve cica cii ve de makeranta, ve za kohol nongo u mba eren afer, maa mo kpa m dondo ikyav ve i bo la. Yange se lu sha ugodobi, se ngohol ior inyaregh shi se iin sha er se zua a inyaregh ki eren inja i dang yô.

Nongo ne maa hingir er ka tsombor wam nahan. Yange m nenge mer, gba u me eren kwagh a ve sha mimi. Ikyav i tesen yô, iyange igen la, orgen u se lu ken nongo ne imôngo yô, ma mcimbim ityough gar ker, maa za ta num sha orgen u dondo ya a vese yô. Kpa, or u dondo ya a vese ne gosough orwam u se lu ken nongo ne môm la, kôr un maa yila dasenda. Er ishima vihim ker kpishi yô, m hii u hemben ajingi a mato u or shon a an-tiôn kon u m lu a mi la sha er me nôngo yô, a pase orwam ne yô. Or ne maa gba zamber mo, kpa m ungwa un her ga, m hembe un ajingi a sha mato cica cii, maa m mase vihin mato shon.

Shighe u m lu anyom 18 la, nongo wam la za hada num vea dasenda. Yange m hii mer me ker bom ugen u i var sha ave yô, maa bughur mo sha uwe, man m fa er hii ve kwagh er nahan ga. Kwagh u m umbur yô, yange uwegh agh hembe vughô vughô, maa m hume. M va za nderen sha iyouci yô, m mase kaven mer kwagh la tôndom uwegh ku ken iyan la, shi m kera lu ungwan ken togh agh ku ken iyan la ga, shi ishe yam i ken iyan la kpa shi kpuaa yange ma i pir.

Er m vihi iyol nahan kpa, m hongo gambe yô, m hide m za kohol ior av mbara. Nahan kpa, shighe kar di kpuaa tsô maa dasenda kôrom za wuhe ken purusu. M yemen purusu yô, m za hemba lun kangenaa vea ior av mbara cii. Hanma shighe cii se lu imôngo, shi se eren akaa imôngo, hii sha kwaghyan u pepe je; ka shighe u yange se hii man ikya je la, zan zan se va kar yaven.

Shighe u m lu ken purusu la, Leonardo za sôrom. Se mba ngur lamen yô, a ôr kwagh tese uwegh sha akaa a m kpela sha uwegh agh ku ken iyan la. Maa a pinem ér “U fa inja i akaa a u kpela iyol atar ne kpa?” M kaa mer “m fa ga ka nyi; ka kwagh u yaven a or man u man mcimbim ma bom kua ityogholough.” Leonardo maa kaa ér: “Mo yô, guda me kaa mer, ka ikyav i iyouci man purusu kua ku. Yange u lu ken iyouci, hegen u ngun ken purusu ne, nahan kwagh u a mase shin la yô, we kpa u fa.”

Leonardo yange ôr kwagh la nahan kundam iyol. Man ôr lu shami je. M lu timen uwar wam iyol yam sha ieren yam ne. Leonardo maa kaa a mo ér una hen Bibilo vea mo, nahan mo kpa m lumun. Kwagh u m lu henen ken Bibilo la maa mgbegham u geman uma wam. Ikyav i tesen yô, Bibilo kaa ér, “ujende mba bov mba vihin anza a dedoo.” (Mbakorinte 15:33, NW, ngeren u shin kpe) Nahan môm ken akaa a m hii eren yô, lu u keren azende a he. Kwagh ne na yô, m hii u bunden mbamkombo mba nongo wase la, m gema m hii u zan mbamkombo mba Mbashiada mba Yehova mba i eren ken purusu la. M ze mkombo u Mbashiada yô, m zua a orgen u un kpa i wuhe un ken purusu yô, i yilan iti na ér Andrés. Un yange i er un batisema ken purusu hingir Orshiada u Yehova. Yange lôhôm ér m za ya kwaghyan u pepe vea na imôngo. Hii iyange la je, m kera hiin iyange yam sha u man ikya pepe ga. Mo vea Andrés yange se time sha ivur Bibilo hanma iyange pepe.

Fele nahan maa ior mba ken nongo wase la kav er m hii u geman inja yô. Nahan môm ken mba ve lu mbavesen la kaa a mo ér un soo u lamen a mo. Yange cier mo iyol. M fa kwagh u una za kav awashima wam ve una er a mo ga, sha ci u yange i taver kpishi u or nana undu nongo la. A kaa ér: “Se mba kera nengen a we ken mbamkombo asev ga, u gema yemen mbamkombo mba Mbashiada mba Yehova. Ka nyi u we ishima u erene?” M kaa a na mer m soo u zan hemen u henen Bibilo shi geman uma wam kpaa. Kwagh u kpiligh mo iyol yô, a kaa a mo ér er m tese sha mimi mer m soo u hingir Orshiada u Yehova yô, nongo la kpa ngu a kwagh u ôron sha mi ga. Maa shi a kaa ér: “Aluer u soo u henen kwagh u Aôndo mimi mimi yô, luun vea Mbashiada mba Yehova. Se ver ishima ser u de u eren afer. M sugh u, u nôngo kwagh. U ngu zan sha gbenda u dedoo. Mbashiada vea fatyô u wasen we. Yange ve hen kwagh vea mo shighe u m lu ken tar u Amerika la, shi mbagen hen tsombor wam ka Mbashiada mba Yehova. De cie ga. Za hemen u eren kwagh wou.” Yange lam a mo nahan je kpa, cier mo iyol her, kpa shi saan mo iyol je gande. Yange m sugh Yehova Aôndo ken ishima kpishi. Lum vough er ka annyon u ka a dugh un ken ikyeji kera nahan. M mase kaven mkaanem ma Yesu yange ôr man, ér: “Né fa mimi, mimi kpaa una pase ne una tuhwa.”​—Yohane 8:32.

Nahan kpa, azende am a tse ne agen karem sha u nan mo mcimbim ma bom ér m ma. U ôron sha mimi yô, ashighe agen m gba, m ngohol m ma. Kpa m eren msen kpoghuloo, shi shighe kar yô, m de anza a am a bo la.​—Pasalmi 51:10, 11.

Yange mba va dughun mo ken purusu kera yô, mbagenev kpishi hen ér me hide sha uma wam u tse la, kpa m er nahan ga. Yange m hiden m zaan ken purusu sha er me za pase mbagen mba ve lu ker la kwagh u m hen ken Bibilo yô. Ken masejime yô, azende am a tse la cii kav wang ér m gema inja. Kpa kwagh er vihi yô, ior mba ngise se lu ihyom la di yô, fa nahan ga.

Iyange igen la, m due m za kwaghpasen, ica gbe ga yô, ior va kasem kua anmgbian u se lu pasen kwagh imôngo la wa atô; man lu ior mba ken nongo ugen u yange se shi eren ayôôso yô. Yange ve soo u wuan mo. Anmgbian u se lu pasen kwagh imôngo la taver ishima lam a ve kundu kundu, pase ve ér mo m kera ngu ken nongo u eren afer la ga. Mo di m tile ving. Yange mba gbidyen mo cii yô, ve kaa ér iyange i môm m de kera ze hen haregh la ga, maa ve hide ijime a akaa a tswam a ve lu a mi la, ve de se se yem. Mimi je, Bibilo gema uma wam. Mo u ngise la yô, ma m ker mer me or iyev. Kpa hegen ne, m dondo kwagh u Bibilo i we ken 1 Mbatesalonika 5:15 la, ér: “Nenge nen sha er ma or nana̱ de oron iyev i̱ ifer sha ifer ga. Nôngon nen sha kwagh u doon gbem je hen a ven ayol a en man shi a mbagenev cii kpaa.”

Hii shighe u m hingir Orshiada u Yehova la je, ka m nôngo mer me eren kwagh sha mimi. Ka i lum zange ga. Nahan kpa, sha iwasen i Yehova Aôndo kua kwaghwan u Bibilo man er azende am a he ne kpaa a lu suen mo yô, m kôrcio. Mayange m soo u hiden yemen sha uma wam u tse la ga cii.​—2 Peteru 2:22.

Yange m lu ipilaor u nyoon ishima kpishi. M na jighjigh mer luun er yange mea ze hemen a uma u bo la yô, hegen nahan ma m kera lu ityough ndor ga. Kwagh u yange m hen ken Bibilo la gema uma wam. M de akaabo a ngise m eren la. M hen u lun bem bem vea ior mba ngise ve lu mbaihyomov av la kpaa. (Luka 6:27) Hegen ka i doom u lun imôngo a azende a a lu wasen mo u lun a aeren a dedoo yô. (Anzaakaa 13:20) Hemba saan mo iyol hegen, shi uma wam ngu a awashima kpaa; m ngu civir Aôndo u a kegh a kegh iyol u den mo a akaabo a yange m er la cii yô.—Yesaia 1:18.

Ken inyom i 2006 la, m za makeranta u tsaase mbapasen ivangeli mba lun kwav, i za tsaase mo. Anyom nga kar yô, m vôso kwase wam u doon mo ishima. Se mar wan u kwase, se mba yesen un imôngo. Hegen ne, m hembe nan shighe wam sha u tesen mbagen akaawan a Bibilo a a wasem la. M ngu ortamen ken tiônnongo, shi ka m nôngo mer me wase agumaior a de gbe ken kwagh u ngise m nyôr ker shighe u m lu gumor er ve nahan la ga. Hegen ne m ngu wan imaagh ki va lun gbem er Aôndo a tendezwa a vese ken Bibilo nahan, m kera ngu timen uwar wam ga.