Ken uwer u Julai, inyom i 2013 la, Mbahemenev mba Shin Itine mba Mbashiada mba Yehova tindi a washika u sagher iyol tsung hen mbamishen kua anmgbianev mbagenev mba ve mough sha ajiir a ve ve za eren tom u pasen kwagh hanma shighe ken ityar igen la cii. Washika la pase er i soo ér a wase anmgbianev mba ve yem ve lu za eren tom u pasen kwagh hanma shighe ken ityar igen la cii ve za mbamkohol mba vesen man mbamkombo mba ityar ityar mba lu u a er ken inyom i 2014 kua ken mhii u inyom i 2015 la yô.

Yange i soo ér a er kwagh ne sha u wasen mba ve za eren tom u pasen kwagh hanma shighe ken ityar igen la ve za mbamkohol tseegh tsô ga, kpa ve zua a shighe kpuaa u lun vea ior mba hen icombor ve kua azende ve kpaa. Washika la yange tese ér lu u nongo u Yehova ua kimbi hanmô ve injar i girgi, u zan man u hiden cii.

Shin er i eren imba kwagh ne ashighe a ken ijime la nahan kpa, ken inyom ne yô, a kera lu er i vanden eren la ga. Kômatii u Tesen u Mbahemenev mba Shin Itine kaa ér i lu gbaatom u he u i sember veren, i yer ér, Gbaatom u Shin Itine u Nengen sha Kwagh u Zende la, a kimbin injar i girgi ye.

Yange mba tindin anmgbianev mba ve za eren tom u pasen kwagh hanma shighe ken ityar igen la a washika u lôhôn ve mbamkohol mba vea za zua a ior vev yô, fese je maa ve gba tindin a ilyoho hen Gbaatom u Shin Itine u Nengen sha Kwagh u Zende la iuu, ér i tôndo ve utikeeti mba agirgi. Ken uwer u Janawari, inyom i 2014 la nahan, ilyoho nyôr poo. Anmgbianev mba i tsua ve ér ve nenge sha kwagh u zende ne la tôv fa ashighe man ajiir a yange gba u anmgbianev mba sha tar cii, mba ve yem tom u pasen kwagh hanma shighe ken ityar igen la vea za mkohol yô, shi i tôndo hanmô ve tikeeti.

Ashighe a zende man ajiir a mbagenev lu ican kpishi. Lu u mbagenev vea nyôr girgi hen gar u Reykjavík, ken tar u Iceland, vea yem hen gar u Cochabamba, ken tar u Bolivia. Mbagenev di lu u vea nyôr girgi hen gar u Nouméa, ken tar u New Caledonia, vea yem hen gar u Antananarivo, ken tar u Madagascar. Mbagenev nyôr girgi hen gar u Port Moresby, ken tar u Papua New Guinea, purugh za gba hen gar u Washington, ken tar u Amerika. Shi mbagenev di shi nyôr girgi hen gar u Ouagadougou, ken tar u Burkina Faso, yem hen gar u Winnipeg, ken tar u Kanada.

Yange anmgbianev utaan mba ve eren tom hen afishi a Gbaatom u Shin Itine u Nengen sha Kwagh u Zende la tôndo utikeeti 19,000 sha ci u mba nyôron agirgi. Yange ve tôô inyaregh ki atôônanongo na sha kwagh u zende ne la, ve tôndo utikeeti sha ci u anmgbianev mba ken ityar 176, mba kuman iyenge er 4,300 nahan.

Yange anmgbianev mbara wuese iwasen ne kpishi. Ormishen ugen vea kwase na yange ve nger ér: “Nyian ne, se mba hiden se yem tom wase ken Southeast Asia. Se mba sughun ne kigh kigh er ne wase se u hiden van ken tar u Ingila, ape se dugh ne, shi va nengen a ior asev mba yange se undu ve je kuma anyom ataan la yô. Nea ne iwasen ne ga yô, ma se fetyô u van ga. Yô se mba sughun ne mba ne ne se fetyô u van la cii a ishima i môm.”

Ormishen ugen u a eren tom ken tar u Paraguay yô nger ér: “Mo man kwase wam se mba sughun ne kigh kigh sha ian i se zough a mi u van mkohol u ityar ityar ken kpentar u New Jersey, ken tar u Amerika ne. Ken inyom i 2011 la je, se hii u kohol iyol i van zende ken Amerika va nengen afishi a shin itine. Yange se koso inyaregh sha ci u zende shon. Nahan kpa, ken uwer u Jun ken inyom shon la, i tindi se ér se zende se sôr atôônanongo a iliam i sha ave a ken tar u Paraguay jimin cii. Nahan gba u se zende sha kpishi. Se mba henen sha kwagh ne dông yô, se tsua ser se kera za zende ken tar u Amerika ga, se yam mato sha er se hemba eren tom u he u i na se ne tsembelee yô. Maa se zua a washika u lôhôn se mkohol u ityar ityar. Ian maa bugh se u kuren isharen yase i zan ken Amerika la! Se wuese Yehova kpishi sha erdoo na man dooshima u a tese se ne.”

Anmgbian ugen ken tar u Malawi vea kwase na yange ve tindi a loho sha Intanet ér: “Se mba tindin ne a an-loho u kpuaa ne sha u kaan a ven ser, se sugh ne gbing! Se fa ken ishima er yange i tôô shighe shi i er tom kpoghuloo shi i vihi inyaregh kpishi sha kwagh u zende u anmgbianev za ajiir wue wue man sha ashighe kposo kposo la yô. Se mba wuese ne sha tom u yange ne er sha gbashima la, kpa u hemban cii yô, se mba wuese nongo u Yehova sha kwagh u yange u na mgbeghaa sha u se za mkohol u ityar ityar ken ityar i se dugh ker, shi se zua a shighe kpuaa u lun vea ior mba hen icombor yase man azende a ase kpaa la.”

Anmgbianev mba ve yaren hen afishi a Gbaatom u Shin Itine u Nengen sha Kwagh u Zende la soo tom u ve eren la kpishi. Anmgbian ugen u i yer un ér Mileivi yô kaa ér, “Tom u wasen mbamishen ser ve hide ve za ken ityar ve ve za nenge a ior mba hen icombor ve man azende a ve la yange u lu se kwagh u vesen kpishi.” Anmgbian ugen u i yer un ér Dorise yô kaa ér, “Kwagh ne yange wasem u nengen er anmgbianev mba ve yem ve za eren tom u pasen kwagh ken ityar igen la ve doo nongo u Yehova ishima tsung yô.” Shi Rodney, anmgbian u a lu ortamen u nengen sha tom u i eren hen afishi a gbaatom ne la kaa ér, “Saan mo iyol kpishi er m lu eren tom ne yô.”

Yange doo Mbashiada mba Yehova mba sha tar cii u tôôn ian ne nan kwagh sha u eren anmgbianev mba nomso man mba kasev mbara iyua i tesen dooshima ne sha tom u pasen kwagh u ve eren kpoghuloo, a iyol tangen shio la.