Een. Or a fatyô u duen ken nongo wase kera sha igbenda i ihiar ne:

•   Sha u pasen wang. Or a fatyô u ôron sha zwa shin ngeren pasen wang ér nan kera soo u lun Orshiada u Yehova ga.

•   Sha Ieren. Or a fatyô u eren kwagh u tesen ér mayange je nan kera soo u lun ken mzough wase u anmgbianev mba sha tar cii la ga. (1 Peteru 5:9) U tesen ikyav yô, alaghga nan nyôr nongo u kwaghaôndo ugen, shi nan pase ér nan soo u lun ken kwaghaôndo shon.—1 Yohane 2:19.

 Ei. Ka se nenge nahan ga. U den kwaghaôndo shin duen ker sha la, ka kposo a u kera taver ker ga la. Ashighe kpishi, mba iyol ka i va kpe ve shin ve de u civir Aôndo la, ka ve due a due ken kwaghaôndo ve kera ga, kpa ka iyolkpen la ka i na ve hingir nahan ye. Se mba palegh amba la ga, kpa ka se nôngo se sur ve asema shi se wase ve. (1 Mbatesalonika 5:14; Yuda 22) Imba or la ka ia soo ér i wase nan yô, mbatamen mba nongo u Kristu ve hemen sha u nan nan iwasen i sha akaa a ken jijingi.—Mbagalatia 6:1; 1 Peteru 5:1-3.

 Nahan kpa i na mbatamen ian ér ve za or iyol shin ve kighir or nana za hemen u lun Orshiada u Yehova ga. Hanma or cii nan ngu a ian i tsuan kwaghaôndo u nan soo u eren yô. (Yosua 24:15) Se na jighjigh ser mba ve civir Aôndo yô, gba u vea civir un ér i kighir ve ga, kpa vea civir un ér a doo ve ishima sha mimi.—Pasalmi 110:3; Mateu 22:37.