Se mbashiada mba Yehova ka se wase icombor yase man i ior mbagenev u lun ken mzough. Ka Aôndo yange hii kwagh u tsombor ye, nahan se mba ne un icivir. (Genese 2:21-24; Mbaefese 3:14, 15) Aôndo tese se akaawan ken Bibilo a a wase icombor sha tar i taver shi i lu saan saan yô.

 Ka se nôngo sha afatyô wase u dondon akaawan a Bibilo, sha ci u kwagh ne ka a wase se, se hemba lun noov man kasev kua mbamaren mbainjaav. (Anzaakaa 31:10-31; Mbaefese 5:22–6:4; 1 Timoteu 5:8) Kwaghfan u a lu ken Bibilo la, ka a wase ior mba ve lu hen tsombor u hanma or nan ze adua u nan la je kpaa. (1 Peteru 3:1, 2) Nenge ase akaa a ior mba ve lu Mbashiada ga, mba noov shin kasev vev, ve hingir Mbashiada la ve ôr yô:

•   “Yange se er ivese, kpa ken anyom ataratar a hiihii la cii, se shi zôhôn zwa shi saan se iyol ga. Kwase wam Ivete va hingir Orshiada yô, hemban eren kwagh sha dooshima shi wan ishima a mo. Ieren na ne yange i wase ivese yase kpen kpen.”—Mkaanem ma Clauir, tar u Brazil.

•   “Yange nomom Chansa, hiin u henen Bibilo vea Mbashiada mba Yehova yô, m hii u hendan a na. Yange m hen mer Mbashiada mba Yehova mba paven icombor. Kpa yange m va mase nengen er Bibilo wase ivese yase yô.”—Mkaanem ma Agness, tar u Zambia.

 Ka sea due kwaghpasen yô, se tese ior er vea dondo akaawan a injaa a ken Bibilo la ve kwagh la una wase ve u

•   Zuan a kwase shin nom u injaa yô

•   Hemban mbamtaver mba ka ve va ken inyom i hiihii i ve er ivese la yô

•   Eren kwagh a wonov yô

•   Vihin inyaregh sha inja yô

•   Den ayôôso a eren yô

•   Den ayol a ve kwaghbo yô

•   Yesen mbayev vev yô

 Een, ashighe agen kwagh la ka a va a ayôôso. Ikyav i tesen yô, kômpeni ugen u tôvon sha kwagh u i yer ér Sofres la, yange u tôv sha kwagh u ivesegh ken inyom i 1998, nahan u kaa ér, aluer i kohol avese 20 yô, ka ivese i môm tseegh nom shin kwase yange nan hingir Orshiada ve, ve tagher a mbamtaver mba vesen ye.

 Yesu yange tsenga ôron ér ior mba ve dondon ityesen na cii mba hen tsombor ve, vea tôv ve a ican ashighe agen. (Mateu 10:32-36) Orgen u timen sha kwagh u yiase u i yer un ér Will Durant yô, ôr kwagh u Mbakristu mba ken Tartor u Roma ér: “Yange i wa Mbakristu kwagh iyol ér mba paven icombor,” a man nyian kpa Mbashiada mba Yehova mbagen mba tagher a imbakwagh ne. Nahan kwagh ne tese ér ka Orshiada la ka nan va a mpav yee?

 Yange Atejir u Yuropa u̱ Nan Or Ian i Eren Kwagh sha Ishima i Nan la ngur kuren ijir i i wa Mbashiada aie iyol ér mba paven icombor yô, a kaa ér ashighe kpishi ka i lu ior mba hen tsombor mba ve lu Mbashiada ga la ka ve va a ayôôso ye. Ityôkyaa yô: “Ka ve soo ér vea kighir or u hen tsombor la ér nana de ze adua u nan soo shin nan lu a ian i zan la ga.” Atejir la shi kaa ér: “Kwagh ne ka a nôngo u eren hen icombor i ior ve ze mbaadua her kposo kposo yô, ka hen icombor i ior mbagen ve va hingir Mbashiada mba Yehova la tseegh ga.” b Shi shighe u ior mba zan adua ugen ve venda u keghen atô a Mbashiada mba Yehova je kpa, Mbashiada ka ve dondo kwagh u Bibilo i kaa ne, ér: “Or a̱ er u ifer kpa, we de eren nan ifer ga. . . . Aluer gba sha mi yô, er kwagh u u fetyô la sha u lun ken bem a ior cii.”—Mbaroma 12:17, 18.

 Mbashiada ka ve dondo kwagh u Bibilo i kaa ér, i vôso nom shin kwase “ken Ter tseegh,” inja na yô, ka u vôson or u ve ze adua imôngo je la. (1 Mbakorinte 7:39) Tindi ne ka u ken Bibilo shi ngu a inja kpaa. Ikyav i tesen yô, ngeren ugen u ken inyom i 2010 u takeda u i yer ér, Journal of Marriage and Family la kaa ér: “Nom man kwase u ve zan adua môm shi ve eren kwagh imôngo shi akaa a ve ne jighjigh a mi la kpa a lu kwaghmôm yô,” ka ve hemba soon ayol a ve cii. c

 Nahan cii kpa, Mbashiada mba Yehova mba kaan a or u nan lu Orshiada la ér nana pav a nom shin kwase u nan u nan ze adua ugen la ga. Bibilo kaa ér: “Aluer anmgbian ngu a kwase u nan ne jighjigh ga, man kwase la lumun u lun vea nan yô, nana̱ de undun kwase shon ga; shi aluer kwase ngu a nom u nan ne jighjigh ga, man nom la lumun u lun vea nan yô, nana̱ de undun nom u nan la ga.” (1 Mbakorinte 7:12, 13) Mbashiada mba Yehova mba kor tindi ne.