Mbashiada mba Yehova hen Bibilo a Ubibilo mba i gem kposo kposo yô. Kpa ken ijô i i gem Bibilo i New World Translation of the Holy Scriptures la yô, ka se hemba soon u eren tom a mi sha ci u i nger iti i Aôndo ker shi i gema i vough, shi i wanger.

•   Ngi a iti i Aôndo ker. Mbageman Bibilo mbagenev na Aôndo u a ne i nger Bibilo la icivir ga. Ikyav i tesen yô, ken Bibilo igen la, i ter ati a iorov mba hemban 70 mba ve er tom sha Bibilo shon yô. Nahan kpa, ken Bibilo shon i môm i gema i dugh iti i Yehova Aôndo u a ne i nger Bibilo la kera!

   Kpa Bibilo i New World Translation la yô, i nger iti i Aôndo sha ajiir udubu imôngo, er yange i hii ngeren iti shon ken ungeren mba Bibilo mba hiihii la nahan. Kpa mba ve lu ken kômatii u a er tom sha Bibilo i New World Translation la yô, or ter iti ve ga.

•   I gema i vough. Ka Ubibilo cii i gema loho u yange u lu ken ungeren mba Bibilo mba hiihii mbara vough ga. Ikyav i tesen yô, Bibilo igen gema mkaanem ma ken Mateu 7:13 la ér: “Nyôr nen hen hunda u hogholoo la, gadia hunda u zan ken igyamusu la gbanger shi gbenda u zan ker la kpa ngu ican u zan sha mi ga.” Nahan kpa, ken ungeren mba Bibilo mba hiihii mbara yô, yange i nger lu “mtim,” lu “igyamusu” ga. Alaghga mbagemankwagh mbara nger ishember i “igyamusu” la sha ci u ve na jighjigh ér ka va nanden mbaaferev ken igyamusu, vea hia gbem sha won. Kpa ityesen la ka i Bibilo ga. Sha nahan yô, Bibilo i New World Translation la gema mkaanem mara vough nahan ér: “Nyôr nen hen hunda u hogholoo la, sha ci u gbenda u zan ken mtim la ngu bele bele, hunda u u kpa gbangese.”

•   I gema i wanger. Kwaghgeman u dedoo yô, gba u una lu vough tseegh ga, kpa gba u una wanger shi una taver u kaven ga. Nenge ase ikyav ne. Apostoli Paulu ter ishember igen ken Mbaroma 12:11, man inja i ishember la ken zwa Grika ér “hen jijingi u puur.” Er a fatyô u kaven inja i ishember la ken zwa Buter u ainge ne tsembelee ga yô, Bibilo i New World Translation gema ivur ne sha gbenda u u hembe taver u kaven ga yô. Ivur la kaa ér Mbakristu ve lu “mbatseen asema.”

 Bibilo i New World Translation la ngi a iti i Aôndo ker shi i gema i vough shi i wanger kpaa. Kwagh ugen yô, mba teen Bibilo ne ga, mba ne ior gbilin. Sha nahan yô, ior umiliôn imôngo zua a Bibilo ne ken ijô ve, kua ior mba ma ve fetyô u yamen Bibilo ga je kpaa.